بزاڤێن ستراتیژی یێن نێچیرڤان بارزانی
January 21, 2018
وتار و بیروڕا
![بزاڤێن ستراتیژی یێن نێچیرڤان بارزانی](https://gulanmedia.com/public/old_images/nusaran/27043151_1659388970847212_1427148001_n.jpg )
پشتی تێکچوونا پەیوەندیێن هەرێما کوردستانێ و حکومەتا ئیراقا فیدرال، هەروەسا تێکچوونا پەیوەندیێن هەرێمێ د گەل وەلاتێن جیران و تایبەت ئیران و تورکیا، رەوشا هەرێمێ بەرەڤ تارییەکا نەدیار ڤە چووبوو، لێ نها بزاڤێن ستراتیژی ژ بۆ دوبارە ڤەگەراندنا پەیوەندییان و ڤەگەراندنا وێ هیزا هەرێما کوردستانێ د قەوارەیێ ناڤخوە و هەرێمی دا دەستپێکرینە.
نێچیرڤان بارزانی، سەرۆکێ حکومەتا هەرێمێ پشتی وەرگرتنا دەستهەلاتێن سەرۆک مەسعوود بارزانی ب بریارەکا پەرلەمانێ کوردستانێ، نێچیرڤان بارزانی بریار دایە هێزا هەرێما کوردستانێ ڤەگەرینیت قەوارەیێ خوە یێ راستەقینە و رەوشا سیاسی و ئابۆری یا هەرێمێ ژی بۆ هەمان ئاوایێ بەرێ و باشتر ڤەگەرینیت.
سەرەدانێن نێچیرڤان بارزانی بۆ وەلاتێن دەرڤە و تایبەت یێن ئەورۆپا گرنگییەکا باش بۆ دەستپێکرنا دانوستاندنێن د ناڤبەرا شاندێن هەرێم و بەغدا هەبوویە کو بەری نها ئیراق ب چ رەنگان رازی نەبوو دانوستاندنان دەستپێبکەت.
سەرەدانا نێچیرڤان بارزانی بۆ بەغدا و کۆمبوونا وی د گەل حەیدەر عەبادی، سەرۆکوەزیرێن ئیراقێ هەموو هەڤسەنگیێن رەوشێ گوهرین کو گەلەک ئالییان ئەو سەرەدان چاڤەرێ نەدکر.
سەرەدانێن بارزانی بۆ وەلاتێن ئەورۆپا و تایبەت بۆ فرەنسا فشارەکا زێدە ل عەبادی هاتە کرن داکو رازی ببیت د گەل نێچیرڤان بارزانی کۆم بیت و ب دیتنا من عەبادی نەچار بوویە د گەل نێچیرڤان بارزانی دا کۆم بیت ژ بەر کو ئەو پێشوازییا گەرم یا ل نێچیرڤان بارزانی ل وەلاتێن ئەورۆپی هاتییە کرن بوویە جهێ حێبەتیێ ل دەف عەبادی کو ئەو هزر نەدکر ئەو وەلات دێ پشتەڤانییا خوە بۆ سەرۆکێ حکومەتا هەرێمێ دیار کەن.
بارزانی رۆژا شەمبی سەرەدانا بەغدا کر و د گەل عەبادی کۆمبوو و عەبادی نەچار بوو ب سیفەتا سەرۆکێ حکومەتا هەرێمەکا ب هێز پێشوازیێ ل وی و شاندا دگەل دا بکەت.
سەرەدانا بارزانی بۆ بەغدا چەندین مفا بۆ هەرێما کوردستانێ هەنە کو ژ وان مفایان، رێخوشکرن بۆ بەردەوامییا دانوستاندنێن د ناڤبەرا هەردو ئالییان دا و هەماهەنگییا سیاسی یە.
مفایێن دی ژی عەبادی نەچار بوویە چەندین تەنەزولا ژ وێ غرورا چەندین رۆژە د سەرێ وی دا درووست بووی، بکەت و بەرژەوەندیێن هەرێمێ ل بەرچاڤ وەربگریت.
تا نها عەبادی دانوستاندنان ل سەر دانا مووچەیێ فەرمانبەرێن هەر وەزارەتێن پەرەوەردە و ساخلەمیێ رازی بوویە و چ ئاماژە ب دانا مووچەیێ وەزارەتێن دی نەداینە، لێ ب دیتنا من پشتی سەرەدانا بارزانی بۆ بەغدا، د قوناغا بهێت یا دانوستاندنان دا چوارچووڤێن زێدەتر دێ ب خوە ڤە بینن و پرانی یان هەموو سێکتەرێن حکومەتا هەرێمێ دێ مفادار بن.
پێدڤییە هەلبژارتنێن بهێت یێن پەرلەمان و جڤاتێن پاریزگەهان ژی ل بەرچاڤ بهێنە وەرگرتتن کو عەبادی نەچارە ژ بۆ وەرگرتنا پۆستێ سەرۆکوەزیرێن ئیراقێ بۆ دوەم جار، نەرمیەکێ د سیاسەتا خوە دا بکەت و نێچیرڤان بارزانی ڤی تشتی باش دزانیت لەورا بزاڤان دکەت ڤێ دەلیڤێ ژ دەست نەدەت.
بزاڤا هەرە گرنگتر یا نێچیرڤان بارزانی، سەرەدانا وی بۆ ئیرانێ یە، چونکە تەهران درووستکەرا بریارێن بەغدایێ یە و هەر بریارە ژ بەغدا دەر د کەڤیت بێ رازیبوونا تەهرانێ نینە.
بارزانی ب پێدڤی زانی کو داکو گوهرینەکێ د سیاسەتا ئیراقێ ل هەمبەر کوردستانی دا بکەت پێدڤییە سەرەدانا تەهرانێ بکەت و د گەل حەسەن رۆحانی، سەرۆککۆمارێ ئیرانێ کۆم بیت.
سەرەدانا بارزانی بۆ تەهرانێ گرنگییەکا زێدەتر ژ سەرەدانا بەغدا هەیە و نێچیرڤان بارزانی ب بزاڤێن خوە یێن ستراتیژی دێ بزاڤان کەت پەیوەندیێن هەرێمێ د گەل ئیرانێ ڤەگەرینیت و ل هەمبەر دا بەرپرسێن ئیرانێ دێ فشاران ل حکومەتا بەغدا کەن، داکو ب زووترین دەم هەموو ئالۆزیێن د گەل هەرێمێ چارە بکەن.
مومن سالم