كوردستانی پاش جەنگ و سیاسەتی حكومەتە یەك لەدوای یەكەكانی عیراق بۆ وێرانكردنی ژێرخانی ئابووری و خزمەتگوزاری و ڕێگەوبان لە كوردستان و بەتایبەتی ناوچەی خەباتگێڕ و قوربانیدەری گەرمیان وای كردووە لەم وێرانكاریەدا بەشێكی زۆری بەركەوێت هەر لە ئەنفال و وێرانكردنی گوند و رێگەوبان، ئەگەر بەچاوێكی واقع بینانەوە بڕوانینە گەرمیان پێش سهردان و بهسهركردنهوهكانی نێچیرڤان بارزانی وهك سهرۆكوهزیرانی حكومهتی كوردستان بۆ گەرمیان له كابیهكانی پێنجهم و حهوتهم، و دوای سەفەرەكانی دەبینیت زۆر گۆڕانگاری ڕوویداوە لە دروستكردنی قوتابخانە و نەخۆشخانە و پارك و ڕێگەوبان و پڕۆژەی ئاو ئاوەڕۆ و تۆڕیگەیاندنی ئاوی پاكی خواردنهوه بۆ ماڵان و قیرتاوكردنی كۆڵانەكان ..... هتد، بەشی هەرە زۆری پڕۆژەكان كە ژمارەیان ( 326 ) پڕۆژەیە جێبەجێ كراون یان كاركردنی تێیاندا بەردەوامە بەگوژمەی (500) ملیۆن دۆلار لەسەر شیرینی نەوت، كەئەمانە منەتیك نین بیكرێن بەسەر هاوڵاتیاندا چونكە هاوڵاتیانی كوردستان شایەنی زۆر لەوە زیاترن كە خزمەتبكرێن و لە ژیانێكی ئارام و ئاسودەدا بژین، سەرۆكی حكومەت بۆ ههر ناوچه و دهڤهرێكی ئهو كوردستانه چووبێت و بەڵنیدابێت لەكەمترین كاتدا بەڵێنەكانی خستۆتە بواری جێبەجێ كردنەوە، لە ئێستادا زیاتر لە (1200)خانوو بۆ وارسی سەربەرزی ئەنفالكراوانی گەرمیان دروستكراوە بەگوژمەی (30)ملیۆن دۆلار ڕادەستی خاوەنەكانیان كراوە، بۆ ئەو ژماریەشی كەماوەتەوە پڕۆژەی دروستكردنی خانووەكانیان لە جێبەجێ كردندایەو كاری تێدا بەردەوامە، لێ بەڵام بە هۆی قەیرانی داراییەوە كارەكانیان بە سستی دەڕوات، بۆیهش وارسی ئهنفالكراوان وێڕای سوپاس و خهمخۆری سهرۆكوهزیران بۆیان داواكارن حكومەت بەزووی ئەم بهشهی تری كه ماوهتهوه پرۆسەی تەواوكردنی خانووەكان خێراتربكرێن .
هاوكات لەبواری ڕۆشنبیری و مەعریفیەوە بڕی پارەی پێویست بۆ كڕینی تاقیگە و دروستكردنی هۆڵ بۆ تاقیگەكان و بینایەی سەرۆكایەتی زانكۆی گەرمیان و ڕاگرایەتی بەشەكان تەرخان كراوە بە كوژمەی (15) ملیۆن دۆلار كە خراوەتە سەر حسابی زانكۆی گەرمیان، لهگهڵ ئهوهی بە هۆی قەیرانی داراییەوە بڕێكی كەم لەو پارەیە خهرجییهكهی وهستێندرا، بهڵام لە ئێستادا سەرۆكایەتی ئەنجومەنی وەزیران فهرمانی دهركردووه جارێكیتر و بەزوترین كات ئەو بڕەپارەیەی كەماوە خەرج بكرێت بۆ ئەوەی پرۆژەكانی زانكۆی گەرمیان نەوستن. ههروهها لە بواری چاپەمەنییەوه ئامێریكی چاپكرنی زۆر پێشكەوتوو لەوڵاتی ئەلمانیا كڕاوە و لە كۆگاكانی ئیدارەی گەرمیاندا دانراوە چاوەروانی ئەوەن كە بینایەكی تایبەتی بە كوالیتیەكی بەرزی بۆ دروست بكرێت بۆ ئەوەی دەست بكرێت بەبەكارهێنانی، چاوەڕوانیش دەكرێت بەخستنەكاری ئامێرەكە گەرمیانییەكان ناچار نەبن لە جێگەیەكی تر ڕۆژنامە و كتێب و بڵاوكراوەكانیان چاپ بكەن .
لێرهدا ئهوهی گرنگه ئاماژهی بۆ بكرێت تا بهرچاو ون نهبێ هەموو ئەو كار و پڕۆژەبوونیادنهرانهی لەسەرەوە ئاماژەمان پێداو بەبڕی پارەی تەرخان كراو بۆی. وهك بهڵگهیهك تهواوی خهرجی و كاروپڕۆژهكان به داتا و ژماره لای من پارێزراون، چونكە هەندیك كەس و لایەن بەمەبەست دەنگۆی ئەویان بڵاوكردۆتەوە كە گوایه نێچیرڤان بارزانی لە گەرمیان تەنها قسەی كردووە و پارەی تەرخان نەكردووە بۆ جێبەجێكردنی بەڵێنەكانی، لیرەشەوە ئامادەم تەوای ئەو پەڕاوە فەرمیان بدەمە ههر دهزگایهكی میدیایی تا بەدوادا چوونی بۆ بكەن .