٢٠١٧ بۆ گەلی کوردستان ساڵێکی سەخت و پڕ لە نەهامەتی بوو، لە مێژووی نێزیکدا، مەگەر ئەنفالی ١٩٨٨ هێندە دژوارو پڕ لە ئازار بووبێت،هەروەک بۆ کورد ساڵێکی چارەنوسسازیش بوو، بۆ یەکەم جار لە مێژوودا گەلی کوردستان هەست و نیەتی دڵی خۆی لە ڕێفراندۆمێکی ئازاد و دیموکراتدا بۆ دەوڵەتی سەربەخۆیی ئاشکرا کردو سەرباری دژایەتی و دوژمنایەتی بەغدا و تاران و ئەنکەرەو ناڕازیبوونی کۆمەڵگەی نێودەوڵەتی ڕیفراندۆم سەرکەوت و ٩٣ ڕێژەی دەنگی بەڵێی وەدەستهینا.
ئەم رووداوە بۆ کوردانی هەرچوارپاڕچەی کوردسان دەرکەوتنی خۆری ئومێدوسەرکەوتنی ئیڕادەی سەربەخۆییخوازانەی ئەم گەلە بێ دەوڵەتە بوو، خۆشترین مژدەی وەرچەرخانی قۆناغێکی نوێی جوولانەوەی ڕزگاریخوازی گەلی کوردستان بوو، ناخۆشترین هەواڵیش (خیانەتی ١٦ ی ئۆکتۆبەر بوو) کە گروپێکی لاساروهەڵگەڕاوە لە یەکێتی و گەلی کوردستان، بوونە دەستکێشی هێزی هاوبەشی داگیرکەری عێراق و ئێران، کەرکوک و خورماتوویان ڕادەستکردن و ئەوانیش داگیرو وێرانیان کرد، سەدان هەزار کەس ئاوارەو دەربەدەرکران.
چی بکەین قەدەری ئێمەی کورد وایە؛ جیرانی سوید و نەمساو سویسرا نین، لە مەملەکەتێکدا دەژین، هەرچی پاشماوەی کارەسات و ململانێی مەزهەبی و سیاسی ڕژێمە تۆتالیتاریەکانی ناوچەکە هەیە بە میرات بۆمان ماوەتەوە، ناوچەیەک پڕە لە هەڵە وپەڵەت وخواروخێچیی وچەقەبەردی دژوار کە مرۆڤ بە چەکمەی ئاسنین نەبێ ناتوانێ بەسەریاندا بڕوات.
عێراق بۆ کورد تەنیا نەهامەتی و کارەسات بووە، هیچ ناسنامەیەکی کولتووریی و ئینتیمانیەکی نیشتیمانی ئەم وڵاتە داگیرکەرە نییە، کورد بە خۆیەوە وابەستە بکات، بۆیە هەمیشە کورد لە دینامیکییەتی مێژووی عێراق و ناوەچەکەدا بە دوای گۆڕانکارییەک دەگەڕێ کە ڕۆژێک لەم دەوڵەتە نەگبەتییە جوودابێتەوە، چونکە عێراق ناخۆشتری چیرۆکە لە دەفتەری بیرەوەرییەکانی هەر کوردێکدا.
بە هیواین سالی ٢٠١٨ ساڵی سەرەتای کۆتایی نەهامەتییەکان بێت، حکومەتی کوردستان بە ئیشی باشتر پێشوازی لە خەڵک بکات، گوزەران و بژێوی باشتریان بۆ دابین بکات، کوردستان دوور بێت لە کارەسات و شەڕو ئاشوب و ناکۆکیی ناوخۆیی، ئەقل و مەنتیق میوانی بەغداو مێشکی عەببادی بێت، هەموو گوشارە شۆڤێنیی و دوژمنکارانەیان مایەپوچ بێت، حزبە کوردیەکانیش ناکۆکی ناوخۆیی و هەڕەشەو تەحەدای دەرەکی بە عەقڵیەتی نوێ و چاوی دووربینتربخوێنەوەو بە خۆیاندا بچنەوە، چاکسازی ڕیشەیی لە خۆیانەوە دەست پێبەکەن و ڕیفۆرمی ئابووری و کۆمەڵایەتی دەست پێ بکەن، ڕاستگۆیانەتر بە تەنگ خەڵکەوە بێن، گەنجان ئومیدیان بۆ درووست بکرێت و پەرووەردە بکرین بۆ کار، لە کەشیکی ئازاد و سەقامگیریی دەروونی و خۆشی ژیان و مرۆڤدۆستیدا بژین و گەشە بکەن.
بە هیوای سالێکی پڕ لە خۆشی و کامەرانیتان، بە هیوای گەیشتن بە ئاواتەکانتان و لە بیر کردنی هەموو ئەو ئازاڕەی لە ساڵانی ڕابردوودا چێشتوتانە بە هیوای بارینی خۆشبەختی بۆ هەمووتان.
چەند ڕۆژێکی تر مرۆڤایەتی چاو لە ساڵێكی نوێ هەڵدێنێ، با هەواییەکی خاوێن بۆ ژیانێکی نوێ هەڵمژین، سییەکان و دڵ و دەروونمان پاککەینەوە، ئارام بینەوە،تا بەهەستێکی نوێوە گوێ لە ئاوازێکی تازە بگرین، نەرمتر بیربکەینەوە. بۆ ئەوەی پێكەوە بەرگەی سەختییەكانی ئەمڕۆ بگرین و ڕووبەڕووی چارەنووسی هاوبەشمان ببینەوە!