جھێ داخێ یە کۆ سەرەڕای ھندێ ئێک ژ لایەنێن سەرەکیێن پشکدار د سەرکەفتنا پرۆسێسا ڕیفراندۆما سەربخۆییا کوردستانێ پارتەکا ئایینی-ئیسلامی ل کوردستانێ بوویە، بەلێ ئەڤرۆکە ھندەک کەس، وەکی گەلەک جارێن دیتر، بناڤێ ئایینی دژاتییا وێ ڕیفراندۆما پیرۆز دکەن و بزاڤا تێکدان یان ژناڤبرنا بەرھەمێن وێ دکەن.
گەلی خەلکێ کوردستانێ، بۆ چەندین سالانە ڕژێمێن بەغدایێ، جاران و نۆکە، چ تشتەک نەمایە نەکری، و ژ ئەنفال و جینۆساید و کێمیابارانێ و ... بگرە، ھەتا ھەر تشتەکێ مرۆڤایەتی شەرم بکەتن بناڤێ ئایینی بکەتن، و ھەتاکۆ ئەڤە دوو سێ سالە مووچە و قویتێ خەڵکی یێ ھاتیە بڕین ژ لایەنێ وێ دەستھەلاتێڤە و بناڤێ دەستووری، بەلێ جوامێرەکێ وەکی عەلی سیستانی، ( مەرجەعێ شێعەیێن ) جیھانێ کلماتەک نەکر و نە ب خێر و نە ب خرابی تشتەک نەگۆت، نەگۆت:"بابۆ وەرن ڤی مووچەی ل وی ملەتی بزڤڕینن. نەگاڤا دەستوورییە. ما دەستوور ژ قۆرئانێ پیرۆزترە؟ ..."، بەلێ نۆکە و پشتی ڤی نەتەوەی ب ڕێژیا پترتر ژ (٩٢%) بڕیار دا یێ ئازاد بیتن ژ بندەستیێ، شونیکا عەلی سیستانی یا زانی " وەع ! وەی بابۆ حەچکۆ تشتەکێ ھەی بناڤێ دەستووری !". بڕەنگەک نەڕاستەوخۆ داخازێ بۆ ھندێ دکەتن کوردستانی وازێ ل سەربخۆیێ بینن و بێنە بن ڕکێفا بەغدایێ.باشە " ئێکپارچەیی " د ھزرا ئایەتۆلا سیستانی دا چ دگەھینیتن؟ بۆچی بۆ عێراقێ و کوردستانێ دخوازیتن، و نەشێتن ئێکپارچەییا جیھانا ئیسلامی بکەتن. ھندەک کەس و لایەن گۆتنێن وی ب ئەرێنی دزانن، لێ ئەوا ڕاستی بیتن یا پێدڤی بوو کەسەک وەسا بناڤێ ئیسلامێ دخۆڕیتن ھەلوێستەکێ جامێرانەتر و باشتر ھەبایە. پێدڤی بوو ( فەتوایەکا) ڕاست و ڕاست لسەر پیرۆزییا ئەنجامێن ڤێ ڕیفراندۆمێ دابایە. وی تنێ بزاڤاکری مە کڕ و بێدەنگ بکەتن، و بۆ لایەنێ دیتر تشتەک نەگۆتیە. باشە مائەڤە ل دژی کوردستانێ، ھیچ کێمتر نینە ش (فەتوایەکێ)، ھەرچەندە ب وی ناڤی نەھاتیە، و دیارە فەتوایێن ( مەرجەعێن بلند) گرنگی و کارتێکەرییا خوە یا ھەی. یا وی ھیچ نەبیتن بلا وەکی مەرجەعێن سۆننە بایە، ھەرچەند کۆ سۆننە ژی نە ش قەنجیا خۆ، بەلکۆ ش تەنگاڤیێ و بێھیڤیبوونا خۆیە ژ وی جھێ ھزر دکر دێ بۆ وان بنە پشتەک.
ئایەتۆلا سیستانی ژی پێھنەک ل بابۆکالێن خۆ و نەڤیێن وان بابۆکالان دا، و بزاڤێ دکەتن ئەو نەتەوە بزڤڕن بن پێھنێن چەند عەربێن شۆڤینی و دەمارگیر و ڕەگەزپەڕێست. ئەڤە ئەنفالەکا ژ وان جۆرێن جەنابێ سەرۆک بارزانی دفەرمووتن:" بڕینا مووچەی ئەنفالەک بی وەکی ئەنفالا ٨٨ ێ". ما چ جیاوازییە و ئەو ئەنفال ژی وەکی ڤێ بناڤێ ئایینی بی، ھنگی فلان زانایێ نەزانێ ئایینی، و نۆکە زانایەکێ دیتر وی کاری بۆ ھەمان مەبەست و بناڤێ ئایینی دکەتن. ئەنفال ئەنفالە چ ڕەنگ و ناڤ ھەبن، و چەند گویفک و ڕیشالۆک ژی پێڤە بن ھەر ئەنفالە.
مخابن کەسێن وەکی سیستانی ئاریایی بوونا خۆ ژبیر کر و سامیەتا خۆ ب پیرۆز دزانیتن. سیستان ل وەلاتێن ئیران و پاکستانا نۆکە، ھزاران سالە جە و وارێ جوینەک ش ئاریایێن ڕەسەنە، ژ بەرەبابێ جەمشید شاھێ مەزن، و ھندەک ژی ژ بەرەبابێ وی فەرەیدوونی دزانن یێ شاھێ ئاریاییان بی و ب ھێزا دەست و باسکێن بابێ قەھرەمانێن کوردان، کاوەیێ ئاسنگەرێ ئەسفەھانی، ئێک ژ مەزنترین دیکتاتۆرێن جیھانێ، زۆھاکێ خوینمێژ دکۆژیتن، و دیرۆک دبێژیتن ئەڤ زۆھاکێ دەمارگیر و ڕەگەزپەرێست ب ڕەگەز عەربە، و کاوەیێ کوردی ھەمی نەتەوەیێن ئاریایی نەژاد و عەرەبێن جامێر و جیھان ژ دەستێ وی دیکتاتۆری قۆرتال و ئازاد کرن، کۆ ماوەیێ ھزاران سالان دەڤەر کربیە ئاگر و دۆزەخ.
بەلێ ئەڤرۆ ژ وێ دویندەھا سیستانێ، وارێ پەھلەوانێن ئاریایێ یێن کۆ جیھان چ جاران ناڤێن وان یێن وەکی زاڵ و ڕۆستەم و ... ھتد، ژبیرناکەتن، بۆ دلێ چەند کەسەک ناسیۆنالیستێن شۆڤینی، دخوازیتن کوردستان، کۆ ژبلی گەلەک نەتەوە و ئایینێن دیتر و ژ نەژادێ سامی(ئاشووری و کلدانی و سریانی و عەرەب و جۆھی) تێدا یێن ھەین، دوو نەتەوەیێن ڕەسەنێن ئاریایی بخۆڤە دگریتن، کە کورد و ئەرمەن، بن، و پشتی ڕیفراندۆما دیمۆکراسیانەیا جیھانێ گەواھی لسەر پاقژییا وێ دای، و بڕیارا ئازادییا خۆ دای، جارەک دیتر بھێنە بندەستێ چویڤێ زۆردارییا وان دیکتاتۆران.
بێگۆمان ھەکەر کەسەک ئاسایی ڤی کاری بکەتن دبیتن تشتەک ئاسایی و سروشتی و نەبەرکەفتی بیتن، بەلێ دەمێ کەسەک بناڤێ ئایینی وەک ( مەرجەعێ بلندێ شێعە مەزھەبان) ھەمان ڕەفتار و بزاڤێ بکەتن، مەترسییەک مەزنە و گۆمانێ ل ناخێ مرۆڤاتیێ پەیدا دکەتن، و یان ژی ھەمان ھەستی بەرامبەر پیڤەرێن مرۆڤی و ئایینی و زانستی و سایکۆلۆژی، لنک مرۆڤاتیێ و نەخاسمە ئەوێن ھزاران سالە دڵی خۆ ب ئایینی خۆش کری پەیدا دکەتن، چونکی ئەڤە نەتشتەک ئاساییە، و ئەڤ کەسە نە زارۆک و نە سنێلەکە، و گۆمانێ دئینیتە گۆڕێ کا چەوا وەکی گەلەک جارێن دیتر ژ لایەنێ ھندەک مرۆڤانڤە، ئایین بۆ مەرەمێن تایبەت دھێتەچەواشەکرن، و بۆ مەبەستی بندەستکرنا مرۆڤان دھێتەبکارئینان، لدەمەکی فەلسەفا ئایینی بەختەوەرییا مرۆڤانە، بڕێکا ئازادکرنا وی ژ ھەر تشتەکێ نەباش و ب زیان بۆ وی.
باشە مانە بەعسێ و سەدامێ گۆڕ ب گۆڕ ھەمان کار نەکر، و ھەمان تشت داعشێ دووبارەنەکر، و چەوا ئەڤرۆکە سیستانیەک بناڤێ ئایینی زۆرداریێ بۆ نەتەوەکێ ب ڕەوا دبینیتن؟ ئەڤی نەتەوەی گۆت" بەلێ" ئازادی و " نە" بۆ بندەستیێ، ڤێجا سیستانی ب کیژ پیڤەری ناھێلیتن وەک ڤێ حەشامەتا خەلکێ بیتن و ئەو پێ خەلەت بن، بەلێ ئەوێن ل جھەکی بناڤ پەرلەمانی نەعێراقا فیدرالی لسەر کۆرسیکێن نەرم و نیان، گەرم و ڕەحەت پالدای، و ب خوینا گەنجێن ڤی وەلاتی ھەر ئێک د ڕاستا خۆ دا زۆھاکەکە، و پارێ ڤی ملەتی بۆ کڕینا ڤیلە و (شۆققە)و کۆچک و ... ھتد، دمەزێخن و وان ل ڕۆژئاڤا دکڕن، و بۆ خۆەشییا خۆ ھەر چەند ماوە ھندەک ش وان دچنە وان وەلاتان و ل جھێن ... ڕادبۆێرن، و یان پارا ل پانقەیێن وان وەلاتان کۆم و عمباردکەن و ش پشتێڤە نەکامامییا ئەورۆپا دکەن و ب کافر و مەسیحی و ... ھتد، ددەنە نیاسین و زڕنایێ ل دویڤ و دژی وان لێددەن. و ھزاران تشتێن نەھەژی و زۆردارییا ل خەلکێ عێراقێ و نەبوونا خزمەتگۆزاری و ژیانێ، یاکۆ تنێ خەلکێ باشوور و ناڤەڕاستا عێراقێ بەحس دکەن و ... ھتد. ئەڤرۆکە ئەو پەرلەمان بەحسێ دەستووری دکەتن و دەستوور لنک وان ئەو تشتە یێ مافێ وان دەمارگیران و ئێکپارچەییا عێراقێ ( تڕۆھاتترین وشەیەک کۆ دھێتە دیتن و بھیستن) و بەرژەوەندیێن وان پێ بھێتە پاراستن بەلێ بۆ خەلکا کوردستانێ تنێ پارێزەرێ بندەستبوونا وان و گەرەنتیکرنا وێ سەرشۆڕیێ بیتن.
خەلکی شەڕەفمەندێ کوردستانێ ژ ھەمی نەتەوە و ئایین و نەژاد و مەزھەبان بلا ژ بیر نەکەن، ھەکەر د ئەنفالێن بەرێ دا نێزیکی ٢٠٠ ھزار مرۆڤێن بێتاوان و ژن و زارۆک و پیر و کال شەھید بین، بەلێ بۆ ڤێ ئازادیێ و ئەنفالا ھندەک مرۆڤێن نەزان بانگەشەی بۆ دکەن ھەکەر ئەم ٥٠٠ ھزار شەھیدێن دیتر ژی بدەین شانازییە و کێمە، چونکی دێ بیتە ئێک جار، و ژیانا ٥٠ مەلیار مرۆڤێن دیتر ل کوردستانی َو جیھانێ، و نۆکە و سۆباھی و بۆ ھەتاھەتایە ئێتە پاراستن.
ھەکەر سیستانی ڤێ جارێ شیا مە بینتە بن ڕکێفێن دەستوورێ بەغدایا دەمارگیر و شۆڤینی، ئەڤە ئانکۆ ئەم ھەمی ڕۆژێ و ڕۆژێ چەند جاران بھێینە ئەنفالکرن و ژن و کچ و خویشکێت مە وەکی گەلەک جاران بھێنە جارییەکرن و ل کۆلان و سویکێن جیھانا عەرەبی کڕین و فرۆتن پێ بھێتەکرن، و ژبلی گەلەک تشتێ کرێتێ دیتر. بەلێ ئایین بۆ ڤان تۆخمە کەسان یا بیە پێخوارن و ئالاڤەک بۆ بندەستکرنا مە کوردستانیان چونکی ھێشتان زانایەکێ مەزنێ وەکی ئایەتۆلا سیستانی و دیکتاتۆرێن بەغدایێ بچاڤێ مەوالی (عەبد) و بەندە و خزمەتکار و خۆلامێ خۆ و عەرەبان ( عەرەبێن پیرۆز و مۆمبارەک !) تەماشەی مە دکەتن، و وی قەنجیا کاوەیێ ئاسنگەر یا ژبیرکری. مخابن !
*پسپۆری زانستەکانیپێداگۆگی و پەروەردەیی/فاکۆلتیی پەروەردە/ زانینگەی زاخۆ