بزاڤا گوران ئه‌و ب ناڤ روه‌تا ئالا هه‌لگرێ گرنگی پێدانێ ب ته‌خا گه‌نجا و به‌رز کرنا ده‌نگێ دیموکراسیێ ل کوردستانێ سه‌رئه‌نجام د یه‌که‌م تاقیکرنا خوه‌دا رویێ خوه‌ یێ راست دڤی بورایدا دیار کر ،،ئه‌گه‌ر مه‌ هنده‌ک بباشی سه‌رنجا خوه‌ دابیت سه‌ر په‌یام و بانگه‌شه‌یێن ڤێ بزاڤێ د ماوێ هه‌شت سالێن بوریدا هه‌میشه‌ ڤێ بزاڤێ خوه‌ ب تاقه‌ بزاڤا ده‌نگێ ئازاد و ده‌ر‌گه‌هێ پێ گه‌یاندنا گه‌نجا دایه‌دیارکرن بو پوستێن گرنگ و هه‌میشه‌ وه‌سا دیار کریه‌ کو هه‌موو هه‌ول و بزاڤێن وان بو وێ یه‌کێ نه‌ کو گه‌نج دڤی ولاتی دا هه‌ست ب هه‌بوونا خوه‌ بکت و رێ بو گه‌نجا بهێت خوه‌ش کرن کو بگه‌هیت جومگێن ئه‌ساسی بو دارشتنا سیاسه‌تا وه‌لاتی و حزبێ و به‌رده‌وام رویێ گوتنێن وان ئاراسته‌ی هه‌ر یه‌ک ژ پارتی و ئێکه‌تیا نیشتمانی بوویه‌ و دڤێ ناڤبه‌رێ دا ژی پارتی زور تر جهێ قسه‌و باسێ وان بوویه‌ و ب وێ چه‌ندێ دهاته‌ تومه‌تبار کرن کو هیچ ده‌رفه‌ته‌ک بو گه‌نجا دناڤدا نینه‌ و پارتی گیانێ رکابه‌ریێ دناڤبه‌را وان دا نینه‌ و دیسان به‌رده‌وام پارتی و بازرانی ب حزب و که‌سێن سته‌مکار و دیکتاتور پێناسه‌کرینه‌ ،،ئه‌ڤه‌ ژ بلی هندێ کو کیشه‌یا کێم بوونا ژنان ل ئاستێ سه‌رکردایه‌تیا حزبا جهێ گله‌ و ره‌خنه‌یا گوران بوویه‌

لێ ئه‌وا ل به‌روارا 25/7/2017ێ روی دای د پروسا ئه‌نجام دانا هه‌لبژرادنا ئه‌ندامێن خانه‌یا راپه‌راندنێ و پوستێ رێکخه‌رێ گشتی یێ بزاڤا گوران نه‌ک تنێ گوران به‌روڤاژی قسه‌ و گوتنێن خوه‌ دیار بو بگره‌ زور خرابتر ژ وان پارتێن به‌رده‌وام وان ره‌خنه‌ لێ دگرتن ژی دیار بی و کێشه‌یا نه‌بوونا گه‌نجا دناڤا ئه‌نجومه‌نێ نیشتمانی و خانه‌یا راپه‌راندنا بزاڤا گوران ده‌نگڤه‌دانه‌کا زور ئێخسته‌ دناڤا میدیا و ده‌زگایێن راگه‌یاندنێ دا بگره‌ لایه‌نگرێن ڤێ بزاڤێ بخوه‌ ژی ژ ڤێ یه‌کی سه‌خت نیگه‌ران و دل ته‌نگ بووینه‌ ئه‌ڤه‌ ژ بلی هندێ کو ب گوتنا وان بخوه‌ هنده‌ک ژ وان گه‌نجێن به‌ربژێر بو پوستێ خانه‌یا راپه‌راندنێ ل ژێر گوشار و گه‌فێن هنده‌ک ده‌زگایێن تایبه‌ت ب ڤێ بزاڤێ ڤه‌ خوه‌ ڤه‌کێشاندینه‌ بگره‌ رابوون مه‌عروف ئه‌ندامێ په‌رله‌مانێ کوردستانێ سه‌ر ب ڤێ بزاڤێ ڤه‌ د دیدارا خوه‌ دگه‌ل که‌نالێ ئێن ئار تی ئه‌ڤ یه‌ک زور ب ئاشکه‌رایی دا دیار کرن کو ل به‌ری 25/7/2017ێ ئه‌ندام و به‌ربژێرێن خانه‌یا راپه‌راندنێ هاتینه‌ ده‌ست نیشان کرن و دانان و ئه‌ڤا نها وه‌ک پروسا هه‌لبژاردنا دهێت کرن تنێ پروسه‌کا مکیاج کری یه‌ و نه‌ تشته‌کێ دی به‌ربژێریا ته‌نها 5 که‌سا بو ڤی پوستی کو لگور یاسا و ده‌ستورێ بزاڤا گوران ئه‌ڤ خانه‌یا ژ7 که‌سان پێک دهێت کو یه‌ک ژوان رێکخه‌رێ گشتی یه‌ راستیا گوتنا رابوونی دیار و ئاشکه‌را دکت یا ژ ڤێ ژی سه‌رنجراکێشتر بزاڤه‌ک وه‌ک بزاڤا گوران کو وه‌ک مه‌ لسه‌ری ئاماژه‌ پێدای کو به‌رده‌وام شانازی ب وی گیانێ رکابه‌ری و دیموکراسی بوونێ دکر ئه‌وا دناڤ ئورگانێن وێ دا هه‌ین ته‌نێ یه‌ک که‌س بو پوستێ رێکخه‌رێ گشتی یێ بزاڤا گوران هه‌بی!!!ئه‌و ژی ژ لده‌ما نه‌خوه‌ش که‌فتنا نوشێروان مسته‌فا ژ لایێ وی ڤه‌ هاتبوو دیار کرن بو راپه‌راندنا پوستێ رێکخه‌رێ گشتی ئه‌ڤه‌ کو ئه‌ڤه‌ بخوه‌ جهێ لسه‌ر راوستیانێ یه‌ ئایا بزاڤه‌ک هنده‌ ب به‌ژن و بالا خوه‌ بنازیت هنده‌ ب به‌ژنا وان گه‌نج و که‌سایه‌تیا بێژیت کو ده‌نگێ وان د قادا سیاسه‌ت و لێهاتنێ دا به‌رزو بلند چه‌وا دبیت دناڤا ڤان هه‌میان دا ته‌نها یه‌ک به‌ربژێر بو پوستێ رێخه‌رێ گشتی هه‌بیت؟ کو ئه‌و ژی نه‌ گه‌نجه‌ ژ بلی وێ چه‌ند ێ ڤێ بزاڤێ سه‌ره‌رای داکوکیا وێ لسه‌ر رولێ ژنێ یه‌ک ژی وی وه‌ک ئه‌نداما خانه‌یا راپه‌راندنێ ده‌ستنیشان نه‌کر ته‌نانه‌ت وه‌ک کودا ژی؟!!! هه‌ر وه‌سا ئه‌و بزاڤا به‌رده‌وام ب ناڤێ رایا گه‌ل ده‌ربرینا دکت و خوه‌ ب نوینه‌رێ خه‌لکێ کوردستانێ دزانیت ته‌نانه‌ت یه‌ک وان ئه‌ندامێن خانه‌یا راپه‌راندنێ ژی خه‌لکێ هه‌ولێر و دهوک نینه‌ کو ئه‌ڤه‌ ژی بارگرانیه‌کا دی یه‌ بو گوران و بانه‌گوازێن وێ ئه‌وا ل ڤێرێ دمینیت کو پرس لێ بهێته‌ کرن و ئاراسته‌ی گورانێ وه‌ک ره‌وته‌کا سیاسی یا گوران خواز بهێت کرن ئه‌ڤه‌یه‌

1/ ئایا ڤێ بزاڤێ چ ل ئاستێ حزبێن دی یێن سیاسی ئه‌وێن ل کوردستانێ و ئه‌و ب سته‌مکار ودیکتاتور بناڤ دکن گوهڕی ؟!و چ تشته‌کێ نوی ژ داهێنا و ل پروسا سیاسی زێده‌کر ژ ئیاندنا (گه‌نجا و فره‌ رکابه‌ریێ بو ه‌رگرتنا پوستا و دیسان هه‌بوونا رکابه‌را بو رێکخه‌رێ گشتی؟) کو ئه‌ڤه‌ سه‌ره‌کیترین ره‌خنێن گورانێ بین به‌رامبه‌ر ب حزبێن کوردی

2/ ئایا حزبه‌ک ب هه‌بوونا ڤان هه‌می کارئه‌کته‌رێن سیاسی و کاریزمایێن سیاسی و نیشتمانی یه‌ک به‌ربژێر بو پوستێ رێکخه‌رێ گشتی دناڤ هه‌موو ئالیگرێن خوه‌ و وان کاریزما دا هه‌بیت ئاخوه‌ بو پوستێ سه‌روکاتیا هه‌رێمێ دێ چ هه‌بیت؟ ئانکو بشێوه‌یه‌کێ دی بێژین ئه‌گه‌ر تنێ یه‌ک که‌س دڤێ بزاڤێ دا بیت کو بشێت ڤێ بزاڤێ سه‌رکێشی بکت دێ چه‌وا ئێک هه‌بیت هه‌رێمێ سه‌رکێشی بکت؟

3/ ئایا نێرینا بزاڤا گوران بو ژنێ ژ لایه‌کێ ڤه‌ نه‌بوونا یه‌ک ژن ژی وه‌ک وه‌ک مه‌ لسه‌ری ئاماژه‌ پێدای ته‌نانه‌ت وه‌ک (کود)ا ژی پرسه‌کا دی ئاراسته‌ی گورانێ ناکت؟

4/ ئایا گوران ب چ به‌لگه‌یه‌ک خوه‌ ب نوینه‌رێ خه‌لکێ هه‌ژار و صه‌قامێ کوردستانی دزانیت ده‌ما کو خانه‌یا راپه‌راندنێ ڤالا بیت ژ خه‌لکێ دوو پارێزگه‌هێن کوردستانێ؟

ئه‌وا ل داویێ دڤێت بهێت گوتن هیچ نه‌بیت گوران نه‌ک ژ پارتێن دی باشتر نه‌کر به‌لکو ژوان خرابتر ژی کر و ئه‌ڤه‌ وێ دگه‌هینیت کو ئه‌جیندا سیاسیا گوران تنێ گه‌یشتنا ب ده‌ستهه‌لاتێ بوویه‌ نه‌ک هیچ تشته‌کێ دی ...