لە119 مین ساڵیادی رۆژنامەنووسی كوردیدا
سەباح شێخانی
22ی نیسانی ئەمساڵ، 119 ساڵ تێدەپەڕبێت بەسەر دەرچوونی یەكەمین ڕۆژنامەی نۆبەرە (كوردستان) كە لە 22-4-1898 دا لە ئاوارەییدا جووتەبرا میقداد بەدرخان و عەبدولڕەحمان بەدرخان لە چاپخانەی دار ئەلهلال لە قاهیرە چاپكراو بووە سەرقافڵەی رۆژنامەگەریی كوردی لە كوردستاندا.
رۆژنامەی كوردستان، یەكەمین ڕۆژنامەی كوردی ئەهلی تاكەكەسی بووەو ناوەخنێكی ئەدەبی و ڕۆشنبیری ناوازەی هەبووە، ئەم تایبەتمەندییەش وامان لێدەكات بپرسین: بۆچی یەكەمین رۆژنامەی كوردی ئەم تایبەتمەندییەی هەبووە، میقداد بەردخان رۆشنبیرێكی سەردەمی خۆی بووە، هاوكات زانیوویەتی كورد حكوومەتی نییە، هیچ دەزگایەكی دیكەش نەبووە تا ئەركی دەڕكردنی رۆژنامەیەك بە زمانی كوردی لەئەستۆ بگرێت، بۆیە خۆی دەستپێشخەری دەرچوونی یەكەمین رۆژنامەی كوردی كردووە.
شەست و یەك ساڵ دوای دەرچوونی ڕۆژنامەی كوردستان، لە باشووری كوردستان، لە 11ی كانوونی دووەمی 1959 مۆڵەتی دەركردنی رۆژنامەی خەبات لە جكوومەتی عێراقی وەرگیرا، رۆژنامەی خەبات، لە ماوەی تەمەنیدا، مێژووییەكی پڕ لە سەروەری و شانازی تۆماركردووە، شوێنی شایستە و بەرچاوی لە كاروانی رۆژنامەگەری كوردیدا پڕ بە باڵای خۆی پڕكردووەتەوە، هەمیشە هەڵگری پەیامی راستی وكوردایەتی بووە.
رۆژنامەی خەبات، بووەتە ئەو مەشخەڵەی كە گڕوتینی چاوی دوژمنانی كوێر كردووە و كوانوی جۆشدانی شۆڕشی رووناك كردووەتەوە، شوێنی شایستە و بەرچاوی لە كاروانی رۆژنامەگەری كوردیدا هەیە، هەمیشە هەڵگری پەیامی راستی و كوردایەتی بووە، ئەوە لە كاتێكدایە، جگە لە ژمارەیەكی كەم رۆژنامە و گۆڤار و سایتی جیددی، رۆژانە لە كوردستان ژمارەیەكی بەرچاو رۆژنامە و گۆڤار دەردەچن و زۆربەیان رووپۆشی (ئازاد) بوون و سەربەخۆ بوونیان پۆشیوە، بەڵام ئازادی و سەربەخۆییەكەیان تا ئەو شوێنە بڕ دەكات كە هاوتەریبە لەگەڵ بەرژەوەندی ئەو (كەس) یان ئەو (لایەن)ەی كە خەرجی داراییەكەی لە ئەستۆیە، نەمانی میسداقیەت، هەڵگێڕانەوەی راستی، بوون بە مەكینەی بوختان، قەڵەم بەكرێدان، دووری لە پیشەیی بوون، لە دەردەكانی بەشێكی بەرچاوی رۆژنامەگەری ئەمڕۆن، دانانی رۆژنامەیەك، كردنەوەی سایتێك یان دەركردنی گۆڤارێك، پڕۆژەیەكی بازرگانی لێهاتووە بۆ خاوەنەكەی، پێش وابەستەبوون بە ئیتیك و بەها ئەخلاقییەكانی كاری راگەیاندن.
