ڕیفراندۆم مافی تاكە كەسە و هەر حیزبێ بیەوێ ئەو مافە بەخۆیەوە گرێ بدات، ستەم لە ئەندامەكانی خۆی دەكات، هەر تاكێ لە كومەڵدا مل بدات بۆ حیزبەكەی لە دژایەتیكردنی ریفراندۆم و سەربەخۆییدا، ستەم لە خۆی و نەتەوەو نیشتمان و داهاتووی نەوەكانمان دەكات، چونكە ریفراندۆم و سەربەخۆیی پێش ئەوەی ببەسرێتەوە بە حیزبەوە، پەیوەستە بە نەتەوەو نیشتمان و داهاتوومانەوە. هەر حیزبێ بەرژەوەندی خۆی بخاتەپێش بەرژەوەندیی نەتەوەكەیەوە، بەخیانەتی گەورە لە قەڵەم دەدرێ، كە هەرگیز بڕوا ناكەم حیزبێكی كوردستانی ئەو ڕێگەیە بگرێتەبەر، چونكە كورد واتەنی (كێچی ئەدا بە گایە) لەبەر ئەوەی هیچ پاساوێ نییە بۆ ئەو حاڵەتە و نابێ بە دوودڵی و گومانەوە بڕوانینە ریفراندۆم و سەربەخۆیی كە هەر پێوەندی بە ئێمەوە نییە تەنیا، بەڵكو پێوندی بەداهاتووی نەتەوەو نەوەكانی داهاتووەوە هەیە، ئەگەر ئیستە ستەم هەبێ، بۆ دەبێ لەسەر حیسابی خەمڵاندن ئەنجامەكەی بشكێتەوە بەسەر نەوەكانی دوای خۆشماندا، خۆ لە ئەگەری خراپ ڕوانین بۆ ڕیفراندۆم و سەربەخۆیی لە ئیستادا كە من تەنیا بە گومانی دەزانم كە ئەڵتەرناتیڤەكەی قبوڵكردنی مانەوەمانە لەگەڵ دەسەڵاتێكی عێراقیدا بە هەموو ڕەنگ و لایەنەكانیەوە هیچ گومانێكم نییە لەوەی گەڕانەوەیە بو جەولەیەكی خراپتر لە ئەنفال كردن و وێران كردنی دێهات و شارو شارۆچكەكان و دووبارە بوونەوەی تەهجیرو تەرحیل و تەعریب كردنێكی تر، چونكە هزری شۆڤێنیزمی عەرەبی هەرگیز وشەی كوردو كوردستانی قبوڵ نییە و پێی نامۆو مەترسیدارە، نابێ خۆپەرستانە مامەڵە لەگەڵ ئەم كەیسەدا بكەین چونكە زیاتر لەوەی پێوەندی بە ئیستای خۆمانەوە هەیە، پێوەندی بە داهاتوی نیشتمان و نەتەوەكەمانەوە هەیە. نابێ لەبەر بە خراپ زانینی دەسەڵاتی ئێستە، یا بە پاساوی باری ناهەمواری ئابووری و بەبیانووی ناكۆكیی نێوان پارتە سیاسییەكانەوە گەورەترین دەستكەوتی نیشتمانی و نەتەوەیی لە دەست بدەین و ئەو هەلەی ئێستە ڕەخساوە لە دەستمان بچێت.


من پێموایە هەتا كورد لەژێر سایەی ئاڵای بێگانەدا بێت، یەك ڕیز و تەبا نابێت، بەلایەنی كەمەوە دوژمنەكانی ناهێڵن ئەو هەلەی بۆ بڕەخسێ و هەردەم هەوڵی درز خستنە ناو ڕیزەكانیان دەدەن، بەڵام كە كیان و دەوڵەتی هەبوو، كاریگەریی دەستی دەرەكی لەسەر كەمتر دەبێ، چونكە بەرژەوەندیی وڵاتان بەتایبەتی دەوروبەری ناكەونە یەك، هەروەها كە دەوڵەت هەبوو، زۆر ئاسانترە گۆڕینی رژێمی حوكمڕانی تیایدا. ئەوەی بیرمە لەسەردەمی حوكمی پاشایەتی عێراقەوە تا ئیستا ڕەنگە بە وانەی دوای ڕووخانی سەدامەوە زیاتر لە دە گوڕانكاری بەسەر دەسەڵاتدا هاتبێ، بەڵام تائێستا عێراق هەر عێراقە، خۆ كورد ئەگەر ئەو پشتیوانییەی ئێستا هەیەتی لە دەستی بچێت، دەبێت بە ئاردی ناو دەوەن، بەڕاستی بیانووی دۆخی ناوخۆ و بەستنەوەی بە مەسەلەی ڕیفراندۆم و سەربەخۆییەوە، وەك ئەوە وایە كوڕێك بیەوێ ژیانی هاوسەری دروست بكا لەگەڵ كچێكی باش كە یەكتریان پەسند كردووە، دوای ئەوەی كوڕەكە ئەم پێشنیارە بە باوكی دەڵێ، وەڵامی باوكی ئەمە بێ: با خانوویەكی باش و ناوماڵێكی تێروتەسەل و ئۆتۆمبێلێكی مۆدێل بەرزو هەروەها دە دوانزە دەفتەر دۆلاری خەوتووت هەبێ، بەسەرچاو، دەچینە داوای، كە ئەمە تەنیا بیانوویەكە باوكەكە بە كوڕەكەی دەگرێت!
ئیمە خۆمان باش دەناسین و دوژمنەكانیشمان لەخۆمان باشتر ئێمە ئەناسن كە دەردی گرانمان ناكۆكیی ناوخۆمانە، بەڵام پێموایە ئەگەر كیانێكمان هەبێ، بەلایەنی كەمەوە كاریگەری دوژمنەكان لەسەرمان كەمتر دەبێتەوەو بەڵكو خوابكا دوای ئێمە نەوەی نوێ بتوانێ یەكبوون و برایەتی بكات بە بنەمای ئەو دەوڵەتەی ئێمە بۆیان بنیاد دەنێین، پشت بە خواو بە هیممەتی دڵسۆزان و لەخۆبوردووان لەو پێناوەدا، لەپێناوی بەفیڕۆنەدانی خوێنی هەزاران شەهیدو دەیان بەسەرهاتی جەرگبڕ كە بەسەر ئەم میللەتەدا هاتووە.