بیرەوەرییا ( ٨ ) مارسە و ل جیھانێ ئافرەت دھێتە شادکرن، لێ ل کوردستانێ ھزاران ئافرەت ئەڤە سەرێ چەندەھا سەد سالانە ھێشتان، قۆربانیێ نێریێ بیابانێن عەرەبییە، یێن وەک چ نەدیتییا ھێشتان ئایینی بۆ ھەمی مەبەستان و تەنانەت حەزێن سێکسی بکار دئینیتن، و ئافرەتا کوردستانێ ژ ھەمی ئایین و نەتەوان، و ب تایبەت ل سەردەمێ ڕژێما بەعسا شۆڤینی عەرەبی، مەزنترین قۆربانیێ ھەمی دیرۆکێ، نە ب سانەھی ژ وان ڕەشەخەونێن ترسناک و ئازارێن دەروونی قۆرتال نابیتن، وان ڕۆژێن ڕەش چ جار ژبیر ناکەتن چونکی تاوانەکا نەڕەوایە وان بەرامبەری کەرامەت و پرستیژا وێ کری و نە تشتەک کێمە و ھەوانتەیە. ژن ل بارزان و گەرمیان و حەلەبچە و ... و بادینان و دەرکار و مالا عەجەما سندییان ... ھتد، تنێ پشکەکن ژ یادگارێن تەحلێن وان ڕۆژان، کۆ بەعسیان و ڕەشەکێن وان ل کوردستانێ ( جاش و مۆستەشار و ئیستخبارات و ڕەفیق و ... ) زەلامێن وان بێ سەروشوین کرین. لڤێ ڕۆژا جیھانی ئەم دەستێن وان دەیک و ژنان ماچی دکەین و وەکی وان لەعنەت و نەفرەتێ ل بەعسا فاشیستی و ڕەشەکێن وان ل کوردستان و جیھانێ دکەین. و بھەمان ھەلکەفت داخوازەکێ پێشکەشی حکومەتا ھەرێما کوردستانێ دکەین ل پەرلەمانی ب بڕگەیەکا یاسایی بڕیار بھێتە دان، وەک چەوا بۆ ڕێزگرتن ل ماندیبوون و زەحمەتا پیامبەران تێگەە و وشە و کۆرتکریێ ( سلاڤێن خۆدێ لێ بن = س. )، و بۆ مرییان وەک داخوازییەک ژ خۆدایێ مەزن بۆ دلۆڤانی پێبرن وشەیا ( خۆدێ ژێ ڕازی ) و ... ھتد،دھێتەبکارئینان، وەسا ژی دگەل نڤێسینا ناڤێ "سەدامی" ل دام و دەزگەھێن میری، وشەیا " گۆڕ ب گۆڕ " لدویڤدا بھێتەبکارئینان، و نەپێگیری ب وێ سزایێن یاسایی بۆ بھێنەدەیناندن، چونکی وی ئەبووجەھلێ شۆڤینی ھندی ھەمی دیرۆکێ ئازارێن دەروونی و جڤاکی گەھاندنە ئافرەتا کوردستانێ. بژیت ژنا کوردستانێ، و سەرشۆڕی و مرن بۆ شۆڤینیزما عەربی یاکۆ نۆکە و ھەتاھەتایە ژبەر گۆنەھا ل ژنا کوردستانێ کری خێرێ و خۆشیێ بخۆ نابینیتن و ھەمی ڕوویدانێن تەحلێن دەڤەرێ بەرمایکێن وێ مێنتالیتێ و کارتێکرنا وێ یە و تیرۆریزما جیھانی ھەمان ڕوویێ دیترێ وێ شۆڤینیزمێ یە، وەلات و لایەنێن جۆدا پانزینێ ب ئاگرێ وێ دا دکەن. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ