بیرا من دھێت دەمێ ئەم پشتی نسکۆیا(١٩٧٥) چۆینە وەلاتێ ئێرانێ و ل باژێریێ گۆرگان ئاکنجی بووین، خەلکێ گازندە ژ زۆلما شاھی دکر، بەلێ پا ئەم زارۆک بین و ل قۆناغا سەرەتایی و تنێ مە دزانی تشت ئەرزانە نەک تشتەک دیتر،بەلێ پا ھەمی ڕۆژێ خەلکێ ڕێپێوان دکرن و ئەڤە ئانکۆ نەڕازی بین. وەکی خەونێت شەڤا بیرا من دھێت ل وی باژێڕی کەسێ ناڤێ خۆمەینی و ئیسلامێ نەدئینا، بەلێ پا یێ ژ ھەمیا دیارتر ئێکی دگۆتنێ (ڕەجەوی) بی، پشتی ڕەڤینا شاھی و چۆلکرنا گۆڕپانێ بۆ شاپۆور بەختیارێ سەڕۆک وەزیران، کە کوردێ ڕۆژھەلاتێ ژی بی، ھێدی خەلکێ دەستھەلات ژ شاھی ستاند و خۆمەینی ھاتە سەر دەستھەلاتێ و د قۆناغا دەستپێکێ دا ھەمی پارتێن ھەڤڕک و نەئیسلامی و نەخاسمە کۆمۆنسیتی، کە ڕۆلەکێ بەرچاڤ د ھەڕفاندنا ڕژێمێ دا ھەبی، ژ گۆڕپانا سیاسەتێ و ب زۆرداری و فرت و فێل و کۆشتن دەرکرن، ئێک ژ وان پارتێن بھێز و خۆدان پێگەھێ جەماوەرێ ئێرانێ، پارتەک بناڤێ مۆجاھدینێ خەلق بی،کە پارتەکا کۆمۆنیستی و ھشکباوەر و تووندڕەو بی، کە پشتی دەرکرنێ بەرێ خۆ دایە عێڕاقێ و ئۆردیگەھێن خۆ یێن لەشکەری و سیاسی دئینیتە د خزمەتا سەدامێ گۆڕبگۆڕ دا. کەمپێن پارتا ناڤبری بینە ئێک ژ پیسترین سەنتەرێن ئازاردانا دەروونی و جڤاکییا مرۆڤێن ژ زۆردارییا مەلا و سەیدێن ئیرانێ دڕەڤین و دھاتن و دکەتن داڤا زۆلما وان لەشکەرخانەیان، چ ئەوێن ل ئیراقێ و چ ئەوێن ل ئەورۆپایێ و نەخاسمە ل فرەنسا، و چێڕۆکا ئەو کەسێن ژ ڤان ئۆردیگەھان ڕەڤین و قۆرتالبووین بیرا مرۆڤی ل ھۆلاکۆستا جۆھییا ل ئەلمانیا یا سەردەمێ جەنگێ ھیتلەری دھینیتن. ئەڤ پارتا سیاسی کۆمۆنیستی ژێدەرێ نەشرینترین بھایێن مرۆڤاتیێ بی، ھەتاکۆ ژنا سەرکردێ وێ پارتێ،مەریەم، دیارییەک بی زەلامێ وێ پێشکشی وی کربی و پشتی ھنگێ کەتە سەر ناڤێ وی و بیە مەریەم ڕەجەوی، و ژبلی کرێتکرنا ھزاران ژنێن بێخۆدان ل وان لەشکەرخانەیان و وەک کۆیلە سەرەدەریکرن دگەل وان و ژ ڕسقێ ھزاران مالبات و خێزان و زەلامانکرنا وان، و ... ھتد، مەزنترین کارەساتێن وان ژنان بین ئەوێن ژیانا خۆ دگەل ڤێ پارتا تووندڕەو ڤە گرێدای. دیارە ڕژێما ئیسلامییا ئیرانێ و مەلایان، وەکی گەلەک جاران، ئەو پارت پێ کافر بین لەوما ھەمی کرنە دەرێ و ڤیا ئەو بخۆ ببنە خۆدانێ وی وەلاتێ زەنگین. خەلکێ ڕاپەرین ل دژی شاھی کر دا ژ زۆلما وی قۆرتال بن بەلێ کەفتن بن زۆلمەکا خرابتر، وەکی ئینگلیز دبێژن (out of the frying pan into the fire)، ژ ئاقلەویکێ کەت کەتە ناف ئاگری. ل مۆسکۆ دەمێ من تێکەلی دگەل ھندەک قۆتابیێن ئیرانی کر بۆ من دیار بی ئەو ڕۆژێ سەد جاران لەعنەت و نفرینان ل دەیبابێن خۆ دکەن ئەو ئێخستین ئاگرێ ڕژێما نۆکە. دیارە زۆلما وان مەلایان ژ خۆڕا نینە، پارە و ژن و دەستھەلات ھەمی تشتان ب مرۆڤی دکەتن. ھندەک ژ وان، وەکی خەلکێ ئیرانێ بەحس دکەن نان نەبی بخۆن نۆکە نیڤەکا ئیرانێ یا کڕی و خەلک ل وی وەلاتی ژ برسان یێن تووشی تریاکێ و ھزاران ئاریشە و نەخۆشییان بووی و ژن وەکی کەرستەیەکێ لەشفرۆشیێ دکەتن. مەزنێن وان فارسان دبێژن:"ھەر چە بگندد نمکش میزنند وای بە روزی کە بگندد نمک"، ئانکۆ ھەکەر جاران تشتەک ڕزیبایە خۆیێ دکرن دا نەڕزیتن، بەلێ پا ھەکەر خۆێ بڕزیتن دێ چ کەنە خۆیێ و چ چارەسەریێ لێکەن؟ مەلایێن ئیرانێ ژی وەسا، شۆینا ببنە ملحەم یێن بووینە ژھر بۆ وی وەلاتی. ھەڤڕکییا وان یا بێ شۆل و مفا و بێ بنەما و بێڕامان دگەڵ جۆھی و سۆننە و عەرەب و ڕۆژئاڤا و نەخاسمە ئەمریکا و لسەر کیستێ مللەتێ ھەژارێ ئیرانێ ئەو وەلات وێران کر، بەلێ ئەڤرۆ ھەر وان سەید و مەلایان بۆ پاراستنا تاج و تەختێ خۆ ل وان پارتێن کۆمۆنیستی زڤڕین ودڤێتن مفای ژ شیان و مێنتالیتە و دەمارگیری و کەرب و کینە و دۆگماتیزم و ساویلکەییا وان، و ھندەک لایەنێن دیتر وەربگرن بۆ ھەڕفاندنا پرۆژێ ئاڤاکرنا دەولەتا کۆردستانێ، یاکۆ جەنابێ سەرۆک بارزانی، تنێ و تنێ ژپێخەمەت پاراستنا کوردستانیان ژ تیفان و باڕۆڤا دژوار و تۆوندا دەڤەرێ لڤان چەند سالێن دۆماھیێ، ھزر دکەتن باشترین چارەسەر و بژاردەیە، نەک چ تشتەک و ئارمانج و بەرژەوەندیەک دیتر، بەلێ وەلاتێ کۆ ڕژێما ئیرانێ ئەڤرۆکە سەرکردایەتیا وێ دکەتن و ( بەخیلیێ ) ب مە و کوردستانێ و جەنابێ بارزانی دبەتن، وەک عەرەب دبێژن"الغریق یتشبپ بکل حشیش"،لسەر لێڤا ھەڕفینێ یە و ھەر تشتەکی دکەتن دا ڤێ چەندێ پاش بێخیتن و ئێک ژ وان ئەوە یا مە گۆتی، دبیتن ل ئایندەی خۆ بھاڤێژیتە بەردەستێ جۆھی و بەلکۆ کۆمۆنیستان ژی، و بەلکۆ ژی ھەتاکۆ ناڤێ وەلاتێ خۆ بکەنە:"جمھورییا ئیسلامی کۆمۆنیستییا ئیرانێ"! ھەمی ژ خۆدێ دھێتن، بەلێ پا چ بکەین دوژمنێن کۆردستانێ نە کێمن، ناڤخۆ و دەرڤە، و تیفانەک مەزن بڕێڤەیە و ھیڤی تنێ ب خۆدێ و یەزادنێ مەزن و پێشمەرگێ قەھرەمان و کوردستانێ و ژ ھەمیان ژی جەنابێ سەرۆک بارزانییە. چۆنکی: "ڕەشۆ بدەستێن خۆ ھەکەر دێ ئاڤ وی بەتن"! بەلێ پا دێ بۆ کێ بێژی و ئەز دبێژم" دیوارۆ بۆ تە دبێژم مشکۆ گۆھێ خۆ بدەیێ"!
*ئەڤ بابەتە ل ژمارا (٢٠٦١) ێ ڕۆژناما ئەڤرۆ ل ( ٢٢/٢/٢٠١٧) ل لاپەڕێ(١٢) ھاتیە بەلاڤکرن.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ