هیچ هێزێك ناتوانێت لە بەدیهێنانی سەربەخۆیی كوردستان پاشگەزمان بكاتەوە
رێبوار حەمەلاو شوانی
دوژمنانی كورد لە بەدرێژایی مێژوو خەبات و كوردایەتی ئەوەندی سوودیان لە ناتەبایی كورد وەرگرتووە بۆ رێگریكردن لە گەیشتن بە ئامانجەكان ، لە كاتەكانی یەكهەڵوێستی كورد زەلیل و بێ توانا بوونە .بۆ ئەوەی بگەین بە سەربەخۆیی و دەوڵەتی كوردستان دابمەزرێنین، پێویستمان بە ئیرادەیە، چونكە ئیرادە وەرچەرخان دروست دەكات كە پێشتر مرۆڤ بە ئەستەم پێی دەگەیشت یاخۆ عەقڵی پێی دەشكا، بۆیە دروستبوونی ئیرادە لای گشت تاكێك و بەرپرسان، كۆمەڵگە بەرەو ئاقارێك دەبات، ئەو ئەگەرانەی دێنە بەردەمیان زۆر بە ئاسانی بەسەریدا سەردەكەون و ئەگەر دەگۆڕن بۆ كردار. یەكهەڵوێستی و یەككخستنی ماڵی كورد. فاكتەری گەیشتن بە سەركەوتن یاخۆ گەیشتن بەو ئامانجەی هەوڵی بۆ دەدەیت، بریتییە لە یەكگرتوویی و یەكهەڵویستی، چونكە پایەكانی گەیشتن بە سەربەخۆیی یا دروستبوونی دەوڵەتی كوردی پتەوتر دەكات، بۆیە تا زیاتر سەر بكەوین بەسەر پایەكاندا، ئەوەند هێزمان زیاتر دەبێت لەسەر پایەكان، ئەگەر پایەكان بە جوانی و بەهێزیی پێكەوە نەبەستینەوە، بێگومان لە نیوەی رێگەدا تووشی داڕمان دەبین، ئەم خاڵە پێویستییە پێمان دەڵێ كاتێك دەتانەوێ سەربەخۆ بن، پێویستە ناوماڵمان یەك بخەن، چونكە تا زیاتر نزیك بینەوە لە سەربەخۆیی بەرپرسیاریەتی زیاتر دروست دەبێت لەسەر دەسەڵاتداران و دوژمنانیش كاری زیاتر دەكەن لەپێناو سەرنەكەوتنی ئەو پرۆسەیە، بۆیە یەكگرتوویی لەم قۆناغەدا لە هەموو كاتێك زیاتر پێویستترە، بۆ ئەوەی زاڵ بین بەسەر گشت ئەو كۆسپ و ئاستەنگانەی دێنە بەردەم سەربەخۆیی كوردستان....
دوای 13 ساڵ بەشداری كورد و دروستكردنی حكومەتی بەغدای دوای روخانی رژێمی بەعس رۆلێكی سەرەكیی بۆ دروستكردنی دەسەڵاتێكی دیموكرات لە عێراقدا ،بەڵام بە خێرایی دەسەڵاتی شیعە و بەتایبەت نووری مالیكی هەوڵەكانیان بۆ گەرٍانەوەی تاكرٍەیی و دیكتاتۆری زیادكرد و تا ئێستاش بەردەوامە.بۆیە پێوستە گەلە كورد ئەمە بزانێ، مانەوە لە بەغدا مانای شەرعەیت دانە بە حكومڕانیەتی تاكڕەوی. ئەگەر لە پێشوودا پاساو ئەوە بێ، كە سێ یەكی عێراق لەلایەن ڕێكخراوی تیرۆریستی داعش داگیركرابوو، دوای ئازادكردنی موسڵ، ئەو پاساوە هیچ بەهایەكی نامێنێ. گومان لەمەدا نییە، شیعەكان تەواوی توانای سیاسی خۆیان دەخەنە گەڕ، بۆ ئەوەی كورد لە كاتی دانوستانەكانی جیابوونەوە، لەحوكمڕانیەتی نەكشێنەوە تا دەگەنە پێگەیەكی بەهێزتر لە قۆناغەكەدا. دانوستانەكان خێراو یەكلایكەرەوە نابێ، كە ئاڵۆزبوو شلی دەكەنەوە، كە زانیان لە كۆتایی نزیك دەبنەوە، دووبارە توندی دەكەنەوە. گەیشتن بە كۆتایی ئاسان نییە، پرۆسەی جیابوونەوە لە بنەڕەتدا كۆمەڵێك بەربەستی زۆر گەورەی لەپێشە، لەوانە ناوچە جێ ناكۆكەكان، كە سوننەكان ڕۆڵیان لەو بابەتە دەبێ، شیعەكانیش سوودی زۆر لەو ناكۆكیە وەردەگرن، ڕەنگە ژێراو ژێر هانی سوننەكان بدەن، بەتایبەتی لە بابەتی كەركووك. كوردە عێراقچییەكانیش ڕەنگە ڕۆڵیكی لاوەكی ببینن لە گەمە سیاسییەكاندا.شیعەكانی بەرەی مالكی گرەو لەسەر پێكهێنانی حكومەتی زۆرینە دەكەن، كشانەوە پلانەكە تێكدەشكێنێ. هەڵبژاردنی ئایندەی عێراق، جگە لە بێهوودەیی لە چاوەڕوانیدا، هیچی دیكە بۆ كورد ناهێنێ، لەبەرئەمە كشانەوە لەبەغدا، نیوەی ڕاگەیاندنی سەربەخۆیی كوردستانە.
پێشمەرگە خوێن وگیانی بۆ دیاركردنی سنوور بەختكرد ، تەنیا ئیرادەی هێزەسیاسییەكان بۆ سەربەخۆیی كوردستان ماوە كە ناكرێت چیتر دوا بخرێت . رەوشی هەرێمی كوردستان سەرەڕای كەموكوڕی و كێشە ناوخۆییەكانمان، لەسەر ئاستی نێودەوڵەتی بەرەوپێشچووە، لەبەر ئەوە پێویستە گەلی كوردستان ئەم دەرفەتە لەدەستنەدات و ساڵی نوێی 2017 بكەینە ساڵی دامەزراندنی دەوڵەتی كوردستان، سەبارەت بەریفراندۆم پێشتر گەلی كوردستان بەرێژەی لە 98% دەنگیان بۆ سەربەخۆیی داوە و ئیتر كاتی ئەوە هاتووە ئێمەش خاوەن كیان و دەوڵەتی سەربەخۆی خۆمان لەژێر ئاڵا شەكاوەكەی كوردستان بین.هەندێك لەو نەخشە رێگایانە لەسەر ئەرزی واقعدا لە عێراق و سووریا پیادە كراون ،دابەشبوونی عێراق بۆ سێ پارچە بەپێی مەزهەب و نەتەوە و دەستوورە تازەكەی سوریا لەلایەن روسیا بەنموونە،دۆخی هەرێمی كوردستان بەراورد لەگەڵ عێراق و سوریا زۆر جیاوازە،تەواوی بنەماكانی دەوڵەتی هەیە،وەكو ئاسایشی بەهێز و سوپایەكی تۆكمە و پرچەك و ئابوورییەكی سەربەخۆ،ئەمانە رێگەخۆشكەرن بۆ بڕیاری مافی چارەی خۆنووسینی گەلی كوردستان، لەسەر هەموو هێزە كوردستانییەكان ئەركێكی ئەخلاقی و نیشتیمانییە،بەیەك گوتاری سیاسی پشتگیری پرۆژەكەی سەرۆك بارزانی بكەن ،لەبری كلكایەتی بۆ نەیارانی كورد و شەرمەزاری مێژوویی،با هاوكار و پشتیوان بن بۆ پرۆژەكە و بەشێك لەو شانازییەتان بەركەوێ، شەرمەزارییە چەند هێزێكی بەناو كوردی و ئازادیخواز،لە جوولەیەكی سیاسی گەرم دان بۆ بەلاڕێدابردنی كاروانی سەربەخۆیی كوردستان،كە بەرهەمی خەباتی سەد ساڵی گەلی كورد و دەریایەك خوێنی گەشی رۆڵەكانی ئەم نیشتیمانەیە،پێشمەرگە نەمری تۆمار كرد و بۆ دیاركردنی سنووری كوردستان . ئەوەی لە ئێستادا ماوەی تەنیا ئیرادەی راگەیاندنی سەربەخۆیی كوردستانە ئەویش بە هیمەت ویەكریزمان دێتەدی .
