ڕاپەڕین یان سەرھلدان پشکەکە ژ دیرۆکا مرۆڤاتیێ. ھەکەر گیانەوەران ڕاپەڕین ھەبتن ژی سروشتێ وێ جیاوازە ژ یا مرۆڤان و گیانەوەران. ڕاپەڕینێن دیرۆکی ژ ڕاپەڕینێن پێغەمبەران دژی دەستھەلاتداران، و یا کاوەیێ ئاسنگەرێ ئاریایی، و یا خەلکێ دژی خەلیفەیان و دەستھەلاتدارێن پشتی خەلیفەیێن ئێکەمێن ئیسلامێ، یا خەلکێ ئەورۆپایێ لدژی دەستھەلاتدارییا کەنیسەیێ، یا فرەنسا و ڕۆسیا و ...ھتد، و یا کوردان لدژی ڕژێما بەعسا فاشی و سەدامێ گۆڕ بگۆڕ ھەمی د خالەکێ دا ھەڤپشکن و ئەو ژی فاکتەرێ پالدەر بۆ سەرھلدانێ زۆرداری و ستەما جڤاکی بوویە ل ھەمی وان سەردەمان و قۆناغان و دناڤ ھەمی وان نەتەوان وەلاتاندا.
ڕاپەڕینێن بەرێدژوار و تەژی تووندوتیژی بین و تێدا ھژمارەکا گەنج و خۆرت و مێرخاس و عەگیدان دا ڕابن و تیروکەوان و شێر و مەتالان ھەلگرن و چنە بەرسینگێ نەیارێن خوە و دوژمنێ زۆردار و ستەمکار. خوینەکا مەزن دھاتە ڕشتن. ئەم ڤێ چەندێ ژ ھەمی ڕاپەڕینێن باب و باپیرێن خوە، ھەر ژ کاوەی ھەتا جەنگێ دژی تیرۆریستێن ڕێکخراوار ئیسلامی یا داعشێ دزانین. تنێ ل دژی داعشیان زێدەتر ژ ھزار و پێنج سەد پێشمەرگێن قەھرەمان گیانێ گۆری ئاخا پیرۆزا کوردستانێ کرن. ئەڤرۆکە و ل ھزارەی سێھەم دا، قۆناغێن دیرۆکی و جڤاکی گەلەک یێن ھاتین گھۆڕین. ئەڤرۆکە پێلێن دیمۆکراسیەتێ ھەمی جیھان یا ڤەگرتی. ئەڤرۆکە ڕەنگێ ڕاپەڕینان ژی وەکی گەلەک دیاردێن دیترێن مرۆڤایەتی وەکی جاران نەمایە. ئەڤرۆکە دیمۆکراسیەتێ مۆدێلێ تیروکەوانان نەھێلایە یان باشترە بێژین ڕۆلێ وێ یێ کێمتر ژ جاران لێکری. ئەڤرۆکە ھەلبژارتن و ڕفرادنۆم و دەنگدان یا بوویە مۆدێلێ ڕاپەڕینێ. مستر لیمان، نڤیسەرێ بناڤودەنگێ ئەمریکی،دبێژیتن: " نەتەوێن دیمۆکرات ل شوینا گۆللەیان کارتێن دەنگدانێ بکار دئینن" (ballots instead of bullets). ل ڕاپەڕینێن بەرێ تنێ ئەوێن بھێز و ب زەڤلەک ڕاپەڕین دکرن و یێن زیرەک و ژیر بڕێڤە دبرن، و ژن و زارۆک و دانعەمران چ باھرەک تێدا نەبی. بەلێ د شێوازێ دیمۆکراسیێ ڕاپەڕینان دا، ئەڤرۆکە، ھەتاکۆ بچویکەکێ شەش ھەفت سالی ژی دشێتن ڕۆل ھەبیتن و بچیتن باپیرێ خوە یێ ھەشتێ نۆت سالی ژ خەو ڕاکەتن و دەستێ وی بگریتن و ببەتە بنگەھەکێ دەنگدانێ. بەرێ ژنێ تنێ ب تلیلیێ و داھۆلێ خاریکارییا ڕاپەڕینێ دکر، بەلێ ئەڤرۆکە ھەر ژنەکێ و پیرەژنەکێ دەنگەک و گۆللەیەک یێ ھەی. ئەڤرۆکە و ل چەرخێ بیست و ئێکێ و پشتی جەنگێ دژی داعشێن کافر و کەدحەرام و بێ وێژدان و دفن بلند و قوتابیێن ئەبووجەھلی و ئەبی لەھەبی و زۆریەتا وان، کاوەیەکێ ئاسنگەر و موسایەکێ بەنی ئیسرائیلیان، یێ بۆ ڕزگارییا نەتەوەیێ کوردی و کوردستانیان پەیدا بووی و سەرباری گڤاشتنێن نەیارێن ناڤخۆیی و دەرەکی و جیھانی، دخوازیتن سەرێ مە لبەر زۆھاکێ بەغدایێ و فیرعەونێ خەلیفە بلندتر بکەتن و مە بگەھینیتە کەنارێن ئارامیێ و ئازادیێ و سەربخۆیێ. جەنابێ سەرۆک مەسعۆد بارزانی ئالایێ ڕاپەڕینێ یێ ھەلگرتی و پێشمەگەرھێ گیانفیدا و چاڤنەترس و خۆدان سۆز ژی ب مێرخاسییا خۆ کێماسی نەکرییە و کورد و کوردستانی ھەتا دۆماھیکا ڤێ جیھانێ قەرداری وانن، و تنێ یا مای ئەم ژی ملێ خۆ بدەینە بەر ڤی بارێ گران و ب ژن و زەلام ، پیر و شیر، مامۆستا و قوتابی، ساخ و نەساخ، دۆست و ھەڤڕک، سکۆلاریزم (علمانی) و ئیسلامی، مەسیحی و مۆسلمان و ئێزدی و ...ھتد، ڕاپەڕینێ تمام بکەین و ب دەنگێ ل بنگەھێ، دەنگدانێ ڤێ ڕاپەڕینێ بگەھینینە دۆماھیک قۆناغێن خۆ. ئەم ل وان بنگەھان دێ بڕیارێ لسەر ھندێ دەین کا مە وەکی جاران بندەستی دڤێتن یان ئەم دخوازین سەربخۆ و ئازاد و سەربەست بین، و ئایا مە دڤێتن دیڤەلانک بین یان دەولەت بین. زانستێ سایکۆلۆژیا دبێژیتن ئێک ژ بنەمایێن ئاڤابوونا دەولەتان ئەو زۆرداری و ستەما جڤاکییە یا خەلکێ ب چاڤێن خۆ دیتین و ھەستپێکرین. دەولەت ب گۆتنا دروست نابیتن، دەولەت ب کریارێ و دەنگدانێ ئاڤا و دروست دبیتن. وەرن دەنگێ خوە بدەن و بەخیلیێ تێدا نەکەن. پێدڤییە مامۆستایێن ئایینی ھند ھشیار بن و شوینا ھندەک تشتێ بەرنەکەفتی بلا ( فەتوایا) لسەر دەنگدانێ بۆ سەربخۆیێ بدەن و ب ( شریعەت ) وی کەسێ بێ ھیچ ئەگەرەکێ ( شەرعی) تێدا بەشدار نەبیتن ب کافر و بێ باوەر ھژمار بکەتن و ب حەرام بزانیتن، چونکی وەکی ئەو دزانن فەلسەفەیا حەرامکرنا ھەر تشتەکی د ئیسلامێدا بۆ ھژمارەکا زیانێن تایبەت و گشتی یێن وی تشتی و ڕەفتارێ و کاری دزڤریتن کە بۆ خۆدێ مرۆڤی و جەستە و سایکۆلۆژیایا وی و یا جڤاکێ ھەین.
*ئەڤ بابەتە ل ژمارا (٢٠٥٦) ێ ڕۆژناما ئەڤرۆ ل ( ١٥/٢/٢٠١٧) ل لاپەڕێ(١٣) ھاتە بەلاڤکرن.
*بسپۆرێ ئەکادیمی د زانستێن سایکۆلۆژی و پێداگۆگی/ زانینگەھا زاخۆ