دەروونناسییا وەرارێ یان گەشەی ( علم النفس النمو) لقەکە ژ دەریایا زانستێ دەروونناسیێ، و بزاڤێ دکەتن مفای ژ بنەمایێن زانستی وەربگریتن د شرۆڤەکرنا قوناغێن سنێلەیێ و گەنجاتی و پیراتی و دانعەمریێ، و دیارکرنا ھەمی وان جیاوازیێن ژ لایەنێ جەستەیی و جڤاکی و سایکۆلۆژی و زمانەوانی دا دناڤبەرا وان دا ھەین، و دیارکرنا ھندێ کە ئەڤ گھۆڕینە چ جاران ناڕاوستن ھەتامرن بسەر وی مرۆڤی دا دھێتن. ھندەک قوناغێن ژیانێ سروشتەکێ وەسا یێ ھەی کە مرۆڤ تێدا وەکی برسییەکی یان کەسەکێ تێھنییە و لدویڤ تێرکرنا پێدڤیاتیێن وەکی خوارنێ و ڤەخوارنێ نەچار دبیتن ھەر ڕەفتارەکێ بکەتن. ئێک ژ وان قۆناغان سنێلەیی یان ھەرزەکارییە کە مرۆڤ، وەک ئێریک ئێریکسۆن و گەلەک زانایێن دەروونناسی دبێژن، قەیرانا ناسنامەی ( ئەزمەیا ھەویێ) یا ھەی و ئەڤ قەیرانە، وەکی مرۆڤەکی دناڤ پێلێن ئاڤێ، وی ھرڤە و وێڤە دبەتن و بەلکۆ وی بگەھینت کەنارەکێ ئارام و بەلکۆ ژی ل تەحتەکێ یان کەڤرەکێ بدەتن کە ئەو لایەن دبیتن لایەنەکێ وەکی دەستەکەک و گرووپ و ڕێکخراوەکا تووندوتیژ و تیرۆریستی و دەمارگیر بیتن. بڤێ چەندێ ئەڤ زانستە دێ شێتن ھاریکارییا لایەنێن پەیوەندیدار، دایک و باب، مامۆستا و ھەڤال و جڤاک،... ھتد، بکەتن، ب نیاسینا ڤان تایبەتمەندییان سنێلەی و کەسێن وەکی وان ژ گەھشتن ب تاخم و گرووپێن لادای ژ بۆھایێن جڤاکی بدەنە پاش و کەسایەتیا وان بپارێزن.
*بسپۆرێ ئەکادیمی د زانستێن سایکۆلۆژی و پێداگۆگی/ زانینگەھا زاخۆ