تەمەنی مناڵی و هەرزەكاریم لە ئێران و لە ئاوارەییدا بەسەر برد. زۆر زوو بۆم دەركەوت كە ناتوانم دڵ بدەمە جوانی و سروشت و چیا و كوچە و كۆڵانەكانی. ئەوێ وڵاتی من نەبوو و هەردەم لە دوودڵیدا دەژییام. زانیم بۆم نییە لەوێ ڕەگداكوتم و، ئەبوایە لەگەڵ با ژیابام. لەگەڵ بای ڕووداو و چارەنووسی نادیاردا نەمدەتوانی خەونم هەبێ. تەنانەت نەمدەتوانی چێژ لە بینینی ئەستێرەكانیش وەرگرم، لەگەڵ ئەم بایەدا نەمدەتوانی گوڵەكان بۆن بكەم. بۆم دەركەوت ئاوارەم و بێ وڵات، ئەوەیان هەستێكی قووڵی هەتیبوونی تێدا ڕسكاندم.
دوای نەوەدویەك و نەمانی داگیركار چیتر هەتیو نەبووم و وڵاتم هەبوو. ئەو هەستە خۆشە زۆری نەخایاند و شەڕی براكوژی دەستی پێ كرد. ئێستایش بۆم ڕوون نەبووەتەوە كە گەلێك ئەنفال و كیمیاباران كرا بێت چۆنی دڵی هاتووە دەست بۆ گیانی خۆی ببات و یەكتر بكوژێت.
ئێستا ئەو جیوگرافیایەی ناوی هەرێمی كوردستانە بەهەشتێكە بۆ خەونی گەلێك كە بە درێژایی مێژوو هەتیو ماوەتەوە. نەمانی هەتیوی ڕزگاركەر نابێت ئەگەر بێ ناوی هەر مابێت. بۆ نەهێشتنی یەكجارەكیی هەتیوی و پاشكۆییش ئەبێ ناو و پەرژین هەبێت بۆ ئەم جیۆگرافیایە. هەروەكچۆن بۆم ڕوون نەبوو كە بۆ گەلی ئەنفالكراو دڵی هات دەست بۆ شەڕی ناوخۆ ببات، ئێستایش بەدوای وەڵامی ئەم پرسیارەدا وێڵم كە چۆن لەنێو ئەم گەلە ستەمدیدەیەدا هەن كوێرانە لەدژی سەربەخۆیی و پەرژین و ناو دەوەستنەوە.
سەربەخۆیی و دەوڵەت بە تەنیا نان یان ئازادی نییە. بە تەنیا لق و مەلبەند و بازنە و شار نییە. شێوەزار و ناوچە نییە. بە تەنیا قوتابخانە و نەوت و دار بەڕوویش نییە. دەوڵەت هەر هەموویەتی و زیاتریشە چونكە پەرژینێكە بۆ هەمووی، بۆ نان و ئازادی.