بارزانی نەمر ئەو سەرکردەیە بوو کە کێشەی کورد لە هەر شوینێکی کوردستان بووبی بە کێشەی کۆی کوردایەتی زانیوە دوژمنانیش لە هەر شوینێک بوبن دژیان جەنگاوە،هەیبەتی داگیرکاری کوردستانی دەخستە ژیرپێ،میژووی بارزانی نەمر میژووی کوردایەتیە ئەوەی بارزانی نەمر لە سەرکردە حیزبەکان جیا دەکاتەوە نەتەوەیی بوونە،گەورەیی سەركردە حزبیەكان لە هەموو دونیادا وەختیەو لە سنووری حزبەكەیان تێپەڕناكەن، لە قۆناغی گەشەو گەورەیی حزبیدا گەورە دەردەكەون و دواتر دەپوكێنەوە، تەنها لەو بەشەی مێژوودا ناویان دێت كە تایبەتە بە مێژویی حزبەكەیان بەڵام سەركردەی نەتەوە نەك هەر دەبێتە بەشێك لە مێژوو بەڵكو مێژوو دروست دەكات، بارزانی نەمر لە نێوان ساڵانی (1903-1979ز) یەكێك بوو لە دیارترین سەركردە و قارەمانەكانی بزووتنەوەی ڕزگاریخوازی نەتەوەی كورد. ئەو پێناسەیەش لە (76) ساڵی تەمەنییەوە سەرچاوەی گرت،(لازاریف)یشی وەك كوردناسێك لە بارەی ئەو كەسایەتییەوە گەیاندە ئەوەی، كە بارزانی نەمر كەسایەتییەكی نێوەند و دیاری سیاسی و سەربازی بزووتنەوەی ڕزگاریخوازی بوو نەك هەر لای كورد، بەڵكو لە خۆرهەڵاتی ناوەڕاستیشدا بێ وێنە بوو.
‎لە پەراوێزی ئەو ڕاستیانە،ئەوە بە بیر هاونەتەوە و هاونیشتمانییەكانمان بهێنینەوە،ئەگەر ئێمەی كوردیش وەك دەیان نەتەوە و گەلی تر خاوەنی سەركردەیەكی وەك (بارزانی نەمر) بین، ئیتر بۆ لە سەركردەیەكی تر بگەڕێن!! تا وەك سەركردەی خۆمان پێناسەی بكەین؟ یان ئەگەر ئەو بە درێژایی (76) ساڵ تەمەنی بۆ كورد و بۆ كوردستان ژیابێت، ئیتر بۆ تەمەن و خەبات و ژیانی ئەو بە هی خۆمان نەزانین، بۆیە پێم وایە هەڵەیەكی گەورەمان كردووە و هەڵەیەكی گەورە دەكەین، ئەو سەركردەیە تەنیا بە سەرۆك و سەركردەی (پارتی دیموكراتی كوردستان) بزانین، چونكە ئەو بۆ ئەوە خەباتی نەكرد، تا سەركردایەتی پارتێكی وەها بكات.
‎بەڵكو بۆ ئەوە خەباتی كرد، تا كوردستانێكی یەكگرتوو و بەهێز و گەورە بۆ داهاتووی نەتەوەكەی بەجێ بهێڵێت.