هاوپەیمانی نیشتمانی كە هێزە سیاسییەكانی شیعە لەخۆ دەگرێت، رەشنووسێكی وەك دەستپێشخەرییەك، بە ناوی (چارەسەری نیشتمانی) بۆ ئاشتەوایی مێژوویی ئامادەكردووە، هەرچەندە ئەو دەستپێشخەرییە بەشێوەیەكی فەرمی رانەگەیەندراوە، بەڵام بەپێی ئەوەی لە میدیا بڵاوبۆتەوە، رۆژی 25/8/2016 لە بەغدا نووسراوەتەوە و لە چەند ماددە و بڕگەیەك پێكهاتووە، ئەمەش ئامادەكاریی شیعەیە بۆ قۆناغی دوای داعش.
بەداخەوە ئەو ئامادەییە لە كوردستاندا دەنگی نییە، هەرچی هێز و توانای میدیایی و حزبی هەیە، بۆ ناكۆكیی حزبی خراوەتە گەڕ، تەنانەت رقەبەرایەتی وایكرد، دۆخی ناهەمواری خەڵكی كوردستان، بۆ بەرنامەی سیاسیی حزب بقۆزرێتەوە، بەجۆرێك كە وا لە هاووڵاتی بكرێت، هاوار بۆ عەبادی ببات، ئەم دۆخەی لە كوردستان هەیە، زەمینەیەك بۆ تێڕوانینی هێزەكانی هاوپەیمانی نیشتمانی دروست دەكات، لە كاتی گفتوگۆكردن لەگەڵ لایەنەكان، بەتایبەتیش كورد، زیاتر پێ لەسەر بڕگە و ماددەكانی دەستپێشخەرییەكەیاندا دابگرن.
دەستپێشخەرییەكە كە بە حیساب بۆ ئاشتەوایی و عێراقی فرە پێكهاتەیە، بەڵام لە پەنای هەر وشە و رستەیەكدا، مینێك داندراوە، ئەگەر بێتو سەربگرێ، پاشەكشەیەكی گەورە چاوەڕوان دەكرێ، چونكە تەنیا كار بۆ تایبەتمەندیی تایفەیەك كراوە، ئەوان دەیانەوێ، لەم دەستوورە پەشیمان ببنەوە، دەستورێكی دی دابڕێژن، ئەم دەستپێشخەرییە ببێتە ناوەرۆك، چونكە باس لە هەمواركردنی دەستوور دەكات.
بەم پێیە كورد ئەوەی لەم دەستوورە هەیەتی لە دەستی دەدات، پرۆژەكە ئاماژە بەو پرەنسیپانە دەكات كە لە چارەسەرییەكەدا بە نەگۆڕ دەیانخاتەڕوو، وەك:" بڕوا و پابەندبوون بە قسە و كردار بە یەكێتی خاك و گەلی عێڕاق و رەتكردنەوەی دابەشكردنی لە هەر بارودۆخێكدا" یان " نەوت و غاز موڵكی هەموو عێڕاقییەكانە" و "ئاو و رووبار و دەریاچە و بەنداوەكان و شوێنەوار موڵكی هەموو عێڕاقییەكانە و رێگە لە هەر كارپێكردنێك دەگیرێ كە زیان بە گەلی عێراق بگەیەنێت" هەروەها داوا دەكات "لایەنەكان پەیوەندی و بەرژەوەندیی خۆیان لەگەڵ دەوڵەتانی دراوسێ و جیهان لەبەر رۆشنایی هاوكارییان بێت بۆ پرۆژەی چارەسەری نیشتمانی" لەبارەی فێركردنیش دەیانەوێ بەرنامە و پرۆگرامی خوێندن بە جۆرێك دەستكاری بكرێ كە مۆركێكی تایفی پێوەبێت. لە دەستپێشخەرییەكەدا داوای رێزگرتن لە حەشدی شەعبی كراوە، هێشتا نەخراوەتەڕوو، دوێنێ یاسای حەشدی شەعبییان لە پەرلەمانی عێڕاق تێپەڕاند.
ئەگەر كورد ناچار بكرێ لەسەر ئەو بەند و ماددانە گفتوگۆبكات، ئەوا دەستی لەبنی هەمبانەكە دەردەچێت، ئەوان دەیانەوێ بەناوی ئەوەی "دەوڵەت لە پشك پشكێنەی ئیتنی و تایفی بەرەو ماف و شایستەی سیاسی ببەن" مافی پێكهاتەكان نەمێنێ و زۆرینەی سیاسی كاری پێبكرێ، زیانمەندی یەكەم لەم پرۆژیەەدا كوردە، بۆیە پێویستە هەموو لایەنەكان، وێڕای هەوڵدان بۆ كۆتایی هێنان بە دۆخی ئێستای كوردستان، خەمێكیش لەو پرۆژەیە بخۆن، دەنا مینەكانی ناو ئەو (پرۆژە) یەمان پێدا دەتەقنەوە.