ئازادكردنی موسڵ, شەڕی حزبی و مەترسیە , یان شەڕی خاك و وەرچەرخانێكی ئومێدبەخش
قارەمان مەهدی
بۆ دەبێ راگەیاندن لە ناوخۆی كوردستاندا بێت، كەچی وا كار بكات, گوایە شەڕی موسل شەڕی كورد نیە؟! لەكاتێكدا ئەو پارێزگایە بە خاك و خەڵكەكەیەوە بەشێكی زۆری كوردو كوردستانیە, زیاتر لە %30 دانیشتوانی شارەكە كوردن, لە رووی زەمانەتی ئاسایشی و سەربازییەوە ئەگەر داعشی تیا بێت هەڕەشەیە بۆ سەر هەر سێ پارێزگای كوردستان (هەولێر, دهۆك, كەركوك) بە هۆی نزیكیان لە موسڵەوە, ئەمانە جگە لە پێگە سیاسی و ئابووری و جوگرافیەكەی ئەو شارە كە چەقێكە لە نێوان عێراق و سوریاو توركیادا. جگە لەوەی ئەو شەڕە شەڕی هاوپەیمانێتیەكی نێودەوڵەتیە لە دژی داعش و كوردو هێزی پێشمەرگەی كوردستانیش بەشێكی كاری هاوپەیمانێتیەكەن و هیچ هۆكارو سودێك لە پاشەكشەی كورد لەو هاوپەیمانیەدا نیە لەم كاتە هەستیارو یەكلاكەرەوەیەدا.
هەر ئەو راگەیاندنانە مەسەلەی چەند سەد سەربازێكی توركیا, كە بە داواو رەزامەندی بەغدا, هاتونەتە نزیك موسڵ، كردویانە بە دێوەزمەیەكی تۆقێنەر. لەکاتێکدا تا ئێستا جوڵەیەكیان نەكردوەو هیچ مەترسیەكیش رووینەداوە بە هۆی ئەوانەوە. ئەو شێلوكاری و موزایەدەیەی لەمبارەیەوە دەیكەن, هەرچەند پاڵنەرو مەرامەكەی روونە, وەلێ هەقە ئەوان واز لەو کارتە دەرەکیە دژی پارتی و پێشمەرگە بهێنن، هەقە جەمسەر بەندی ناوچەكە ببینن كە هەنوكە لە موسڵ دا چڕ بوەتەوە. هەقە ئەوەش ببینن كە میلیشیاكانی شیعە زۆر لەو ژمارە سەربازەی توركیا مەترسی زیاتریان بۆ ناو شەڕەكەو دوای شەڕەكە هەیە كاتێ دەبینن هەر لە ئێستاوە سوكایەتی بە عەرەبە سونەكان دەكەن و فەرمانی دەستگیركرنی ئەسیل نوجێفیان دەركردوەو هەر ئەوانیشن لە خورماتوودا بونەتە دێوەزمەو مایەی خوێنڕشتن و ماڵوێرانی بۆ كوردانی ئەو شارە كوردستانیە.
كەواتا بۆ رۆڵی پێشەنگانەی پێشمەرگە لەو دوا قۆناغەی شەڕدا بێ بایەخ بكرێ لە كاتێكدا لەو ساتەوەی موسڵ لەلایەن سوپاكەی مالكیەوە تەسلیم بە داعش كرا هەتا ئێستا هەر پێشمەرگە بووە لەو سنورە بەرفراوانەدا بەرگری كردووەو هەر دەرئەنجامی خۆڕاگری و پێشڕەوییەكانی پێشمەرگەیە ئێستا ئەم سنورە بوەتە مەیدانی مەرگی ئەو خەلافەتە تیرۆریستی و خوێنڕێژە. بۆ جەخت لەسەر چەسپاندنی بەرهەمی بەرگری و قوربانیدانەكانی پێشمەرگە نەكەینەوە, نەك دروستكردنی هەرایەك لە ناوخۆماندا !! لە كاتێكدا دەیان جار دووپاتكراوەتەوە كە پێشمەرگە لە ناوچە كوردستانیەكان ناكشێتەوە, هەروها لە دوا رێكەوتنی نێوان هەردوو حكومەتی كوردستان و عێراقیش بڕیار دراوە, دوای شەڕەكە پارێزگای موسڵ لەلایەن لیژنەیەكی هاوبەشی كوردستانی و عێراقی چاودێری بەڕێوەبردنی دەكرێت و تەنانەت لە دیمانەكەی لەگەڵ كەناڵی (cnn)، سەرۆك بارزانی داوای ئیدارەیەكی هاوبەشی بۆ شارەكە كردو وتیشی, ئەو شوێنانەی كوردستانن هەر بە كوردستانی دەمێننەوە.
سەیرە نادیدەگرتنی ئەم هەموو راستی و خاڵە ئەرێنیانەو پەنا بردن بۆ ئاراستەیەك كە پێچەوانی هەلومەرجەكەیەو پڕە لە رەشبینی و شەن كردن بە كونەبایەكی سیاسی ناكوردستانی. ئایا لەبری ئەو سیاسەت و ئاراستە ناواقیعی و بێ مەفایە باشتر نیە ئەو راگەیاندنانە وەك گرەنتیەكی سەرەكی بۆ بەرهەمی كوردستانیانەی شەڕەكە جەخت لەسەر چارەسەری ململانێی سیاسی و ئامادەسازی ناوخۆیمان بكەن. ئایا زەروریتر نیە ئەو راگەیاندنانە ئاوڕێك لە باشوری كەركوك و لە گەرمەسێر بدەنەوە. لە شنگالەوە تا رۆژئاوای كەركوك نزیكەی تەواوی خاكی كوردستان گەڕاوەتەوەو دەگەڕێتەوە دەست پێشمەرگە, کەواتە لە قازانجی كوردو بەرژەوەندی خۆیاندا نیە ئەوانیش زومی سیاسەت و میدیاكانیان بخەنە سەر سنوری باڵادەستیەكەیان و بیرێك لە چارەسەری زامەكانی خورماتوو بكەنەوە, خەمێك لە گەیاندنی پێشمەرگە بە حەویجەو حەمرین بخۆن, تا دەرفەتە ناسنامەی کوردستانیانەی جەلەولاو سەعدیەو گوڵاڵە بچەسپێنن, یان ئاوڕێك لە بەدرەو جەسان و مەندەلی بێنازو بەجێهڵدراو بدەنەوە. ئەرك و دەرفەت بوو لە ماوەی ئەم شەڕدا وەك ناوچە كوردستانیە دابڕێنراوەكانی سنوری هەولێرو موسڵ ئەو شوێنانەی سنوری دەسەڵاتیان كۆنتڕۆڵ بكرانایەتەوە. بۆ لەم بەرپرسیارێتیەو لە گرتنەبەری سیاسەتێكی خەمخۆرانە بۆ رزگاركردنی ئەو ناوچە کوردستانیانە بێ هەڵوێست و بێدەنگ بوونەو ئەو دەرفەتە گونجاوەیان لەدەست ئەم گەلەو خاكەكەی دا ؟!.
