یا ب ساناهی نینە بتنێ ل سەر زمانی بێژین، جیهان هەموو دیدەڤانیێ ل سەر بارێ گرانێ خەلكێ پارێزگەها دهۆك د دەت كو (22) كەمپێن ئاواران هەنە، هەموو دپرن ژ ئاوارە و پەنابەران، ب رێژا (38%) ئەڤ خەلكە ل كەمپان دا دئاكنجی نە و (62%) ل دەرڤەی كەمپاندا، ڤێ گڤاشتنا ل سەر پارێزگەها دهۆكێ خودانكرن و ئارامی و ژین و ژیار دڤێت، دیسا رێژا هەرە مەزن ل ناڤ باژێرییە كار نەهێلایە بۆ خەلكێ پارێزگەهێ، سەرەرایی ئەڤێ قەیرانا دژوار و ئەڤێ رێژا زورا ئاوارە و پەنابەران نوكە بەرهەڤی بۆ دانانا (5) كەمپێن دی دهێتەكرن، پێشبینی دهێتەكرن نێزیكی ملیۆن ئاوارێن دی ژ پارێزگەها نەینەوا بگەهەنە پارێزگەها دهۆك، نەیا ب ساناهییە ئەڤ ژمارە بەلكو رۆژانە و هەر تشتەكێ گرێدایی ژیانێ بۆ دهێتە دابینكرن وەك (ئاڤ، كارەب، خواندن، خزمەتێن ساخلەمی، رێك و ئاڤەرو). هەیڤانە ئەرزاق ل سەر دهێتە بەلاڤەكرن و بێ بەرامبەرە، ل گەل چارەسەكرنا كێشێن جڤاكی و یاسایی، دەمێ دەستپێكێ ئاوارە هاتین و ل كەمپان بنەجه بووین بتنێ چاڤ ل خوارنێ بوو، نوكە هندەك خواستێن دی هەنە وەك قوتابخانێن ئامادەیی و زانكۆ و كافی وئەنتەرنێت، بازار و خوارنگەه و یاریگەهێن تەپاپێ و سەنتەرێن رەوشەنبیری دڤێن، و ئەڤە مافێ ڤی خەلكی یە، ئەڤە و لدیف ستانداردین نیف دەولەتی نابیت ژیانا پەنابەرا و ئاواران خوەشتر لێ بهێت ژ خەلكێ خوە جهێ دەڤەرێ، هندەك ئاستان دا دبیت ژیانا خەلكێ كەمپێ خوەشتر بیت و دبیت هندەك گوندێن پارێزگەهێ قوتابخانە و ئاڤ و ئاڤەرو نەبن ل كەمپان هەنە و ئەڤە ب ساناهی نەهاتینە دانان، راستە ئەڤە خزمەتە لێ ئەڤە روویەكێ دی ێی شارستانی و مرۆڤایەتی و نەتەوەیی نیشا دەرڤە دایە و ئەم هەموو كورد شانازیێ پێ دكەین، ئەڤە هەموو رۆژانە پێدڤی ب بودجەكێیە و دو ساڵە بەردەوام حوكمەت لسەر كار دكەت و ئەڤە تشتەكێ نەخازراو بوویە كو پێشتر بەرهەڤی بوو نەهاتبوونە كرن، ئەڤە سەرەڕایی ڤی بارێ گران لسەر ملێن خەلكی و حوكمەتێ و قەیرانا ئابووری و بڕینا بوددجە و موچەی كو قویتێ خەلكی كوردستانێیە، د دەمەكی دا مەزنترین چەپەرێن پێشمەرگەی دگەل داعش هەر یێن ڤێ پارێزگەهێ نە و بەهرا شێری یا شەهیدێن كوردستانێ هەر بەهرا پارێزگەها دهۆكێ بووینە، ئەڤێ هەموویێ دەروونێ خەلكێ پارێزگەهێ وەك هەموو كوردستانێ نە ئارام كریە، لێ خالا من دڤێت سەر ب راوستم و پتر پێداچوونێ تێدا بكەم كەرتێ پەروەردێیە، سەرەڕایی نەبووونا ژێرخانەكا پەروەردەیی یا بهێز ل پارێزگەها دهۆك و ئەڤە ژی هەر بۆ بەری سەرهلدانێ دزڤریت و ئەو سیاسەتا حوكمەتا گور ب گور لگەل خەلكێ پارێزگەهێ كو هەر دەم هزر و خەیالا وا ئەو بوویە، ئەڤ خەلكە یێ پاشڤەمای بیت، هەتا نوكە پێدڤی ب سەدان ئاڤاهێن قوتابخانایە و پێدڤی ب دامەزراندنا هزاران مامۆستایایە، ل دووڤ داتایێن وەزارەتا پەروەردێ ل سالا بوری ل پارێزگەها دهۆك (23) قوتابخانێن سێ دەوامی هەبووینە، بەرامبەر ل هەولێرێ (5)قوتابخانە وسلێمانیێ (16) قوتابخانە ئانكو ل دهۆكێ پتر هەردوو پارێزگەهێن دی هەبووینە، مامۆستایێن موولەتا بێ مووچەی وەرگرتی دیسا ل دهۆكێ پشكا شێری بەركەفتیە (285) مامۆستا بووینە، موولەتا دایكینێ ل پارێزگەها دهۆكێ (2089) مامۆستا بووینە، سەرەڕایی كێمبوونا ئاڤاهی یان نەبوونا پەیمانگەها كو ل دهۆكێ (7) هەنە و ل پارێزگەهێن هەولێرێ (13) سلێمانیێ (13) ئیدارا گەرمیان (5)، د دەمەكێدا سەرەڕایی نەبوونا ئاڤاهیا و سازیێن پەروەردیێن پێدڤی ل پارێزگەها دهۆكێ كێشا هەر مەزن نەبوونا مامۆستایانە ل سەرجەمێ (1604) قوتابخانە (27737) مامۆستا مە هەنە كو (1776) گرێبەست، (6500) هاتن و چوونێ دكەن ژ سەنتەری بۆ دەردوران (38300) قوتابی ل پارێزگەهێ هەنە، لێ سەرەڕایی ئەڤان هەموو كاودانێن بەرتەنگ و نەبوونا مووچان، مامۆستایێن پارێزگەهێ هەر دلسوزیا خوە دیاركرینە و بارێ گرانێن سەر ملێن خوە نە داناینە و ئەڤ مامۆستایە ژی خودان خێزان و مالن و مووچە و پارە دڤێن و مافێ ژین و ژیارێ هەیە، ئانكو بارێ ئابووری و قەیران و ئاوارە ل كوردستانێ هەموو پتر قورساتی لسەر ملێن خەلكێ دهۆكێیە، د دەمەكێدا ل هندەك باژێركان ئالیێن سیاسی كەرتێ پەروەردێ و دلسوزی و كەساتیا مامۆستایی یا پر بها یا كو مللەت لسەر دەستێ مامۆستایی دهێنە ئاڤاكرن، بۆ مەرەمێن خوە یێن سیاسی و بەرژوەندیێن خوە یێن بەرتەنگ بكارئیناینە و دڤێن ئەڤێ ئەزموونا ب ساڵەها شەهید بۆ هاتینەدان نەشرین و نە جوان بكەن، د دەمەكێدا مامۆستا و دلسوزێن هەر ڤێ پارێزگەهێ هەر ل هەمان رۆژا مامۆستا هندەك باژێركان جادە تژی كرین گرتین بریارێن بایكوتێ داین، مامۆستایێن مە پارێزگەها دهۆك چەپەرێن پێشمەرگەی گرتنە بەر و سلاڤ و دەست خوەشی لێ كرن و دووپاتكرن كو ئەم هەردوو چەپەرێن بەرگرێی داینە، پێشمەرگە ب تڤەنگا خوە بەرەڤانیێ ژ كەرامەت و خاكا پیروزا كوردستانێ دكەت، ئەم مامۆستا ب پێنوسێ خوە دێ بەردەوامیێ دەینە ژیانێ، ناهێلین بیروكێن نەحەزو دوژمنێن مللەتێ كورد وەلاتێ مە نەشرین بكەن، دبینم یا فەرە مامۆستا وەك تەخەكا رەوشەنبیرا جڤاكێ مە كا چەوا لگەل هەموو شوڕەشێن كوردی رۆلەكێ هەرە بەرچاڤ هەبوویە، شیایە بیتە چرا و مفا ژ ئەزموون و شارەزایی و زانستێ وی هاتیە وەرگرتن، ئا نوكە ژی مللەت پێدڤی ب مامۆستایە ب هزر و بیرێن خوە دور بكەت ژ هەر بیروكەكا كەڤنار و هەرفتی یا نە د بەرژوەندیا مللەتێ كورد دا، بەرۆڤاژی ئەو دەرزینكا رەوشەنبیری و ساخلەم و ئاڤاكەر بیت بۆ هەموو تەخێن جڤاكی و خودیك بیت هەموو خوە تێدا ببینن.
* سەرۆكا لژنا پەروەردێ ل جڤاتا پارێزگەها دهۆك