پێشمەرگە پێوەندییەكی رۆحی لەگەڵ میللەت و خاكی كوردستاندا هەیەو لە رووی مێژووییەوە بەشێكی زیندووی پڕمۆراڵی خەباتی نەتەوەكەمانە. ناوی پێشمەرگە لە هزری شاعیر، ئەدیب و نووسەرێكەوە بگرە تا هاووڵاتییەكی سادە و ساكار، ناوێكە بەهایەكی مەزنی هەیەو وەك شۆڕەسواری بەرگری و ئازادیخوازی و دواتریش بەدیهێنەر و پارێزەری تەواوی دەستكەوتەكانی میللەتەكەمان وێنا دەكرێ. پێشمەرگە بەو هەموو مێژووە پڕسەروەرییەوە لە شەڕی تیرۆرستانی داعشدا سەرەڕای كەمی و كۆنیی چەك و تەقەمەنی و نەبوونی مەشق و راهێنانی پێویست و بێبەشكردنی لەلایەن حكومەتی عێراقەوە لە بودجە و مووچە، بەڵام توانیویەتی لەبەر چاوی جیهان و نەوەی ئەمڕۆی نەتەوەكەمان كەلتووری خۆڕاگری و نەبەزینی خۆی درێژە پێبداو بە هەمان گیانی رووبەڕووبوونەوەی رابردووی بەرانبەر دڕندەترین دوژمنی مرۆڤایەتی راوەستاو بەو ئازایەتییەی لەم رووبەڕووبوونەوەیەدا نواندی، توانی پاڵپشتیی هەموو جیهان بەدەست بهێنێت و تەواوی دونیا بە متمانەوە چاوەڕوانی سەركەوتنەكانی بكەن و وەك سومبوڵی ئازایەتی ببێتە وێردی سەر زاری سەركردە و سەرۆكی وڵاتان و لە میدیاكانی جیهاندا پێشبڕكێ لەسەر هەواڵ و پێشڕەوییەكانی پێشمەرگە بكرێت، ئەمەش بۆ سیاسەتی حەكیمانەی سەرۆك بارزانی دەگەڕێتەوە. دیارە لەو پێگە نوێیە جیهانییەی پێشمەرگەی كوردستان هەیەتی، لە پێناویدا قوربانیەكی زۆر و خوێنی و فرمێسكێكی زۆری بۆ رژاوە، ئێستا شوناسی پێشمەرگە شوناسێكی دیموكراتخواز و مرۆڤدۆستە لە جیهانداو ئەو هێزەیە كە بەرگری لە ئاشتی و پێكەوەژیان و مافەكانی مرۆڤ و پێشكەوتنی رەوتی دیموكراسی لە ناوچەكەو لە جیهاندا دەكات، هێزێكە سەرەڕای بوونی قەیرانی سیاسی و دارایی بە هیچ شێوەیەك لایەنگیری بۆ هیچ لایەنێكی سیاسی رانەگەیاندووە و بە بیرو گیانێكی نیشتمانییەوە لە رووی دوژمن و تیرۆریستاندا وەستاوەو ئەزموونی دوو ساڵی رابردوو بە كردەنی سەلماندنی پێشمەرگە زۆر نیشتمانپەروەرانە بیردەكەنەوە. ئەو تایبەتمەندی و خەسڵەتانەی پێشمەرگە لە مێژوویداو لە ئێستایدا باشترین بەڵگەیە كە خاوەن ئامانج و پەیامێكە بۆ ئایندەی هەرێم و میللەتەكەی و پرسی سەربەخۆیی. ئەم هێزە لەم قۆناغەی ئەمڕۆماندا شەرەفێكی گەورەی تری بەرجەستە كرد، كاتێ دەبینین بەو یەك سەنگەرییەی نیشانیداوە زەمانەتی دووبارەنەبوونەوەی لێكترازنی ناوخۆییمانی زامن كردووە، كە ساڵانێكی زۆری دەویست دامەزراوە پێوەندیدارەكان بۆ چارەنووسی كوردستان ئەنجامی بدەن، بەڵام ئەوەتا پێشمەرگە بە خوێن و گیان بەخشین و هەڵوێستی مەردانەی لە ماوەیەكی زۆر كورتدا تۆماری كرد. لێرەدا پێویستە هەڵوەستە لەسەر ئەو هەڵوێستە جوامێرانەی پێشمەرگەش بكەین كە لەم رۆژانەداو لە بەیاننامەیەكدا رایگەیاند، ئامادەیە رێژەیەك لە مووچەی پڵە باڵاكانی ببەخشێت بە مامۆستایانی كوردستان لە پێناو رانەوەستانی پرۆسەی خوێندن و پەروەردەی منداڵانی كوردستاندا. بێگومان ئەمانەش كەسایەتی و خەسڵەتە بەرزەكانی پێشمەرگەی رۆشنتر كردووەو ناسنامەی ئەم هێزە نەبەزەی كردۆتە فاكتەرو هاندەرێكی گەشبینانەو ئومێدبەخش بۆ تەواوی نەتەوەكەمان.
جێگای وەبیرهێنانەوەیە تەواوی ئەو سەركەوتنانەی هێزی پێشمەرگەی كوردستان لە چوارچێوەی ستراتیژێكی دیراسەتكراوی فەرماندەیی فەرماندەی گشتی هێزی پێشمەرگەی كوردستان و پلانی سەركردایەتی كردنی و ئاراستەكردنیدا بەدەست هاتون، نابێت ئەوەمان لەبیر بچێت هیچ هێزێكی سیاسی و سەربازی بە بێ سەركردایەتی كردن و فەرماندەیی كردن لە لایەن فەرماندەیەكی ژیرو ئەقڵمەندەوە سەركەوتوو نابێت. بۆیە پشكی شێری تۆماری ئەم دەستكەوتانەی پێشمەرگە، وەبەر بەڕێز سەرۆكی هەرێمی كوردستان دەكەوێت، لەبەر ئەوەی سەرباری سەركردایەتی كردنی هێزی پێشمەرگە وەك فەرماندەیەكیش هەمیشە لەگەڵ هێزەكانی پێشمەرگە و لەناو میحوەرەكانی بەرگری بوونی هەبووەو هەمیشە هۆكاری بەهێزی مۆراڵی پێشمەرگە بووە، زیاتر لەوانەش لەسەر ئاستێكی باڵای دیپلۆماسی و نێودەوڵەتی سەرۆكی هەرێمی كوردستان توانیویەتی پشتگیرییەكی زۆر بۆ پێشمەرگەی كوردستان دروست بكات، بە شێوەیەك وەزیری بەرگریی زۆرینەی وڵاتانی دۆست و هاوپەیمان هاتوونەتە هەرێم و سەردانی وەزارەتی پێشمەرگەیان كردووەو پشتگیرییان بۆ پێشمەرگە راگەیاندووەو بە بەردەوامی پێشمەرگە و هاوپەیمانە نێودەوڵەتییەكانی لە چوارچێوەی زۆری ئۆپەراسیۆندا پێكەوە هاوكارو هەماهەنگن و پێكەوە پلانی لەناوبردنی تیرۆریستان دادەڕێژن.
بەڕێز سەرۆكی هەرێم و فەرماندەی گشتیی پێشمەرگەی كوردستان رۆڵی سەرەكییان لە واژۆكردنی پڕۆتۆكۆڵی نێوان وەزارەتی پێشمەرگە و وەزارەتی بەرگری ئەمەریكادا هەبوو، ئەو پڕۆتۆكۆڵەی لە مێژووی ئەمریكادا بۆ یەكەم جار لەگەڵ وەزارەت و هێزێكدا واژۆی دەكات كە دەوڵەت نییە. لە یادمان نەچێت هەرێمی كوردستان و پێشمەرگە زۆریان بەخشیوە، تا گەیشتۆتە ئەو ئاستەی ئەو پێگەو متمانە بەرچاوە بۆ پێشمەرگە دروست ببێت. لە روانگەیەكی دیكەوە پێشمەرگە ئەو هێزەیە كە سەنگی سیاسەتی هەرێمی كوردستان بەرامبەر بە نەیارەكانی لە ناوچەكە و بەتایبەتی عێراقی پڕ لە كەلتووری تائیفی و مەزهەبی و پڕ لە كێشە راگرتووە، بۆیە چۆن لە رابردوودا پێشمەرگە رەمزو سوارچاكی كاروانی شۆڕش و سەركەوتنەكانی نەتەوەكەی بووە، لە ئێستای شەڕێكی فراوانی (1500) كیلۆمەتری لەگەڵ تیرۆریستان و قۆناغی پاش ئازادكردنی نەینەواش-دا ئەوە هێزی پێشمەرگەی كوردستانە لەژێر بڕیاری جەنابی سەرۆكی هەرێم پارێزەری دۆخەكەو راگری باڵانسی هێز دەبێت. بۆیە پێویستە راشكاوانە بڵێین هێزی پێشمەرگەی كوردستان لەو ناوچە پڕ كێشەیەدا و لە عێراقێكی بێ متمانەدا كە بودجە و مووچەی خەڵكی كوردستانی بڕیوەو پێشمەرگەی لە هەموو مافێكی دەستووری و یاسایی بێبەش كردووە، لە هەرێمێكی پڕ هەڵاوسان و قەیرانی سیاسیدا پێشمەرگە هێزی راگری باڵانس و گەرەنتی ئێستا و ئایندەمانەو لەژێر فەرمانی فەرماندەو سەركردەیەكی حەكیم و ئەقڵمەندا بووەتە سیمبولی یەكڕیزیی ناوخۆییمان و فاكتەری سەركەوتنمان لە ئەمڕۆو ئایندەدا. هەموو ئەمانەش وزەو فاكتەری هێزە بۆ ستراتیژییەكی متمانەداری دۆزی كوردو پرسی چارەنووسی میللەتەكەمان لە ئەمڕۆو ئایندەدا.
* بەڕێوەبەری گشتی راگەیاندن و رۆشنبیری و هوشیاری نیشتمانی لە وەزارەتی پێشمەرگە