نوری سەعید وەزیرێ بەرگریێ حکومەتا عەبدۆلمۆحسن سەعدونی ل سالێن بیستا چەرخێ بۆری و سەرۆک وەزیرێن سالێن دویڤدا نموونەکە ژ دۆماھیکا سیاسەتڤانێن ڤی وەلاتێ تڕۆھات. نوری سەعیدی ژی وەکی نوری مالیکیێ نۆکە دەستێن خوە تێکەلی ئیرانێ کرن و ڤیا وەلاتێ خۆ مەزنتر و ئێکپارچە بکەتن بەلێ پێلێن دیرۆکێ ئەو وەسا دگەل خوە بر کێم کەس یێ ھەی ب ڕەنگ و شێوەی وی و پاشایێ وی ھاتبیتە کۆشتن و پارچەپارچەکرن(١٩٥٨)، و ئەو ئێکە ژ ھزاران نموونەیێن وەکی وی ل ڤێ ئاخا نەحس بڤی دەردی چۆین. دیرۆکا ڤی وەلاتێ شووم و بێ فەڕ و بێ وەغەر و بێ ئیفلەح مەزنترین پالدەرە بۆ ھندێ ئەم ھندی خوولەکەکێ زوویتر خوە ژ ئاگرێ وێ قۆرتال بکەین ھێشتانێ ژی درەنگە.
ئەڤرۆکە نوری سەعیدێ دۆھی یێ بوویە نوری مالیکی و ئەوی ھەمی ھێز و خەم و خەیالا خوە یا کری کوردستان قڕاندن. ڤێجا خنێکێن مە ئەم زوویتر خوە ژ ئاگرێ کەرب و کینەیا وی قۆرتال بکەین. مەزنا یا گۆتی " ژ وی بترسە یێ ژ خۆدێ نەترست"! ئەو مالیکیێ ھەمی چەکێ خوە ڕادەستی داعشێ کرین دا کوردان پێ نەھێلن و ئەو کارەسات ئافراندی، و پاشی دەستێ خۆ ھاڤێتە ڕزقێ خەلکێ کوردستانێ، بێگۆمان ژی ژ خۆدێ ناترسیتن و نۆکە ژی ژ ھەمی تشتەکی و ژ خوەیێ خوە ژی بێ ھیڤیە و ژ دەستێن وی دھێتن ھەر تشتەکێ بشێتن دژی کوردستانیان بکەتن، تەنانەت ئەوا ئەسکەندەرێ مەقدونی و چەنگیزخانی و ھۆلاکۆی و سەدامێ گۆڕ بگۆڕ ژی کری دبیتن ل چاڤ تاوانێن وی ھێشتانی ھیچ نەبن. ئاگرێ پالدانا خەلکێ بۆ بایکوتێ ژی ھەر ئەوە و ھوین وەکی وی بکەن دا ئەم جارەکا دی ب چیای بکەڤین. *بسپۆرێ زانستێن پێداگۆگی و پەروەردەیی/ زانینگەھا زاخۆ