ئەوەی كە لە ماوەی شەش مانگی رابردوو بینیمان بە جۆرێك لە جۆرەكان فشار خستنە سەر حكەومەتی هەرێم بوو ئەویش لە رێگای راگرتنی هەناردە كردنی نەوتی كەركوك بە تایبەتی كێلگەكانی نەوتی بای حەسەن وهافانا كە لە رێگای بۆرییەكانی نەوتی (كوردستان- جەیهان) جێبەجێ‌ دەكرا ، بۆ ئەوەی كە لە رێگای رای گشتی بۆ سەر حكومەت گوشار دروست بكەن بۆ ئەوەی حكومەت نەتوانیت وەكوو پێویست ئەركەكانی رایی بكات و بەو شێوەیەش لە رێگای مانگرتنی فەرمانبەران و خۆپێشاندانەكان ئەو سیناریۆیە زیاتر بەرجەستە بكرێت .سەرەرای هەموو ئەوانەش هەروەكوو بەڵینش بە ئێران درابوو لە پێناو پشتگیری كردن لە سیاسەتەكانی یەكیەتی بۆ بەردەوام بونیان لە دژایەتی كردن لە گەڵ پارتی دیموكرات بەردەوام بیت هەرچەندە كە لە رابردوو بە شێوەیەكی بەرچاو ئەو نارەزایەتییانە درێژەیان هەبوو بەڵام نەبوونە هۆكاری حكومەت شكست بهینیت.لە بەر ئەوەی كە حكومەتی هەرێم سەرەرای ئەوەی كە زیاتر لەیەك ملیۆن و سێ‌ سەد هەزار كەس ئاوارەی لە هەموو شوێنەكان كە روویان لە هەرێمی كوردستان كردووە سەرەرای ئەوانەش خەرجی شەری داعش، بێشك لە رووی داراییی بارگرانییەكی یەكجار زۆر لە سەر حكومەتی هەرێم دروست كردووە ولە سەر هەموو ئەوانەش دابەزینی نرخی نەوت بووە كە ئەوەش نەوەك لە كوردستان بەڵكوو لە سەر ئاستی جیهان ئەو دابەزینە هەبوو و تەواوی ئەو وولاتانەی كە سیستەمی بەرێوەبردنیان لە سەر مۆنۆپۆلی بەرێوە چووە ئەو قەیرانە بەرۆكیانی گرتووە.تەواوی ئەو بەكگراوندەیە كە هۆكار ی قەیرانی داراییی لە كوردستان بووە و لە كاتی ئێستادا بەرجەستە كردنی كێشەكان تەنیا بۆمەبەستی گەوجاندنی رای گشتی بووە.
لە ئەنجامی دانووستاندنەكانی نێوان نێچیرڤان بارزانی سەرۆك وەزیرانی هەرێمی كوردستان و، حەیدەر عەبادی، سەرۆك وەزیرانی عێراق رێككەوتن لە سەرئەوەی رۆژانە 150 هەزار بەرمیلی نەوتی كێڵگەكانی بابە گوڕگوڕ و خەبازە لەلایەن حكومەتی هەرێمی كوردستان لە رێگەی هێڵە نەوتییەكەیەوە بنێردرێتە بەندەری جەیهانی توركیا، لەوێش 75 هەزار بەرمیل لەلایەن وەزارەتی نەوتی عێراق و 75 هەزار بەرمیلەكەی دیكەش لەلایەن وەزارەتی سامانە سرووشتییەكانی هەرێمی كوردستان بفرۆشرێت.
بەو پێیە حكومەتی عێراق پابەند دەبێت بە پێدانی مووچەی ئەو فەرمانبەرانەی كەركووك كە پێشتر داویەتی، حكومەتی هەرێمی كوردستانیش مووچەی ئەو فەرمانبەرانەی كەركووك و دەزگا ئەمنییەكان و پێشمەرگەكانی كەركووك دەدات. 7 هەزار و 606 فەرمانبەر و كارمەندی كەركووك مووچە لە حكومەتی هەرێمی كوردستان وەردەگرن، جگە لەوانەش حكومەتی هەرێمی كوردستان مانگانە پارەی پترۆ دۆلار دەداتە كەركووك، كە دەوروبەری 10 ملیۆن دۆلارە.سەرە رای ئەوەی كە وەستاندنی نەوتی كەركوك لە لایەن هێرۆ ئیبراهیم ئەحمەد كێشەیەكی یەكجار زۆری بۆ پارێزگای كەركوك و موچەی فەرمانبەرانی هەرێم دروست كرد بەڵام پارێزگاری كەركووك و بەرپرسانی كەركووك چەندجارێك رایانگەیاندبوو كە ئەوان دەیانەوێت بۆ خێرایی پرۆسەكە و شەفافیەت، نەوتەكە لە رێگەی بۆڕی نەوتی هەرێمی كوردستانەوە بفرۆشرێت هاوشێوەی پێشتر، نەك بە تانكەر و لە رێگەی ئێرانەوە.