له هاوخه‌باتیه‌وه بۆ ته‌خوین و له ته‌خوینه‌وه بۆ هاوخه‌باتی
سووره مه‌رگه‌یی
1ــ وه‌ك خۆیان ده‌ڵێن ئه‌گه‌ر ئه‌و هه‌موو كاره‌ساتانه‌یان به ناوی شۆڕش كردنه‌وه به‌سه‌ر كورد هێناون، بۆچی بۆ ماوه‌ی ده‌یان ساڵ په‌رده پۆشیان كردوون و له خه‌ڵكیان شاردوونه‌وه؟ به‌ڵام كاتێ به‌رژه‌وه‌ندیه‌كانیان ئاڕاسته‌ی پێچه‌وانه‌یان وه‌رگرت كه‌وتنه هه‌ڵدانه‌وه‌ی فایلی تاوانی یه‌كتری، دیاره لای ئه‌وان خۆیان له حزب به گه‌وره‌تر و پیرۆزتر ده‌زانن و حزبیش له نه‌ته‌وه گه‌وره‌تر و پیرۆزتره، خۆ ئه‌گه‌ر به‌رژه‌وه‌ندیه تایبه‌تیه‌كانیان ئاڕاسته‌ی پێچه‌وانه‌یان وه‌رنه‌گرتبا، ئه‌وا ده‌یان ساڵی تریش كورد و شۆڕشه‌كه‌ی له‌ناو به‌رداشی كه‌ینوبه‌نی دوولایه‌نه ده‌هاڕدران.
2ــ كاك نه‌وشیروان ده‌ڵێ: له هاوخه‌باتیه‌وه بۆ ته‌خوین، واته وه‌ك نه‌وشیروان مسته‌فا ده‌ڵێ: مام جه‌لال ده‌یان ساڵ خه‌باتی نه‌وشیروان مسته‌فای داوه‌ته به‌ر نه‌شته‌ری ته‌خوین كردن، باشه ئه‌گه‌ر وایه و ته‌خوین كردنه‌كه‌ی مام جه‌لال راست نییه! بۆچی نه‌وشیروان مسته‌فا دوای حه‌وت ساڵ ته‌خوین كردنی له‌گه‌ڵ بنه‌ماڵه‌ی مام جه‌لال چۆوه ناو سه‌نگه‌ری هاوخه‌باتی؟
3ــ خولاندنه‌وه‌ی كورد و ئامانجه نه‌ته‌وه‌ییه‌كانی له‌ناو نهێنیه‌كانی سیاسه‌تی له هاوخه‌باتی بۆ ته‌خوین و دواتر له ته‌خوینه‌وه بۆ هاوخه‌باتی زۆر هه‌ڵده‌گرێ و زۆر مه‌ترسی شاراوه‌شی له هه‌ناوی خۆیدا حه‌شار داون، ئایا خه‌ڵكی كوردستان كه‌ی به‌ده‌نگ دێ و كه‌ی هه‌ڵوێست وه‌رده‌گرێ؟ ئایا كورد له‌و سیاسه‌ت گۆڕكێیه‌ی نه‌وشیروان مسته‌فا چی ده‌ست كه‌وتووه و چی ده‌ست ده‌كه‌وێ؟ له كۆتاییدا ده‌ڵێم: بۆ ده‌ركه‌وتنی رووی راسته‌قینه‌ی نه‌وشیروان مسته‌فا و روانینی بۆ دۆزی كورد و ئه‌و خوێنه‌ی كورد له پێناو ئازادی و سه‌ربه‌خۆییدا رشتوویه‌تی، خۆزگه هه‌موو تاكێكی كورد راپۆرته‌كه‌ی مام جه‌لال و نامیلكه‌ی (له هاوخه‌باتیه‌وه بۆ ته‌خوین)ی نه‌وشیروان مسته‌فای ده‌خوێنده‌وه، ئه‌وجار تێده‌گه‌یشتین نه‌وشیروان مسته‌فا چی به‌سه‌ر كورد هێناوه و له داهاتوودا مه‌به‌ستیه‌تی چی به‌سه‌ر بێنێ.
