بەرپرسێ ئێکەم ژ گەلەک ئاریشەیێن سیاسی ل تورکیا و نەخاسمە کودەتایا تیر مەھا ئەڤسالە، فەتحۆلا گوولەن، ئەو کەساتیێ ئایینییە ئەوێ بەردەوام تەلەفزیۆن و دەزگەھێن میدیایی وێنێ وی نیشان ددەن. دەمێ مرۆڤ تەماشەی سەروچاڤێن وی یێن نویرھانی دکەتن دمینیتە حێبەتی. حێبەتی ژ ھندێ ئەو ل چ دگەڕھیتن؟ دیارە ئەڤ سەروچاڤێن ھۆسا د دیرۆکا تووند و تیژیێ دا تشتەک و وێنەیەک نوی نینە. ھەکەر ئەم بیرا خوە بینین گەلەک کەس وەسا بین: میلۆسۆڤیچ و ھیتلەر و ... ھتد. دیارە ل پشت وی وێنێ ئارام و سەروچاڤێن نویرھانی و نەرم و نیان دا دلەکێ ڕەش و ژ ئاسنی یێ ھەی کە ل پشت وان تاوانانە ئەوێن ھاتینەکرن.
مە شۆل ژ ھندێ نینە کا فەتحۆلا گوولەنی چەند پارە ھەیە و ژکیڤە ئیناندییە. بەلێ ئەوا کو دیارە و ڕاستە زەنگینییا وی یا بێ وێنەیە. ئەو کەسێ بشێتن ب سەدان ژنرال و ئەفسەر و پلەدارێن لەشکەری و مامۆستایێن زانینگەە و فەرمانبەرێن میری بۆ لایێ خوە ڕابکێشیتن، چ پێنەڤێتن دێ ب پارەی ڤی کاری کەتن. کەس ژ وان مرۆڤان ژ قەنجی و ب خێرا خوە نەکەفتینە دویڤ وی. فەتحۆلا گوولەن ھەڤڕکێ سیاسییا دەستھەلاتا تورکیایێ، ب ھێجەتا گەندەلیێ، ئانکۆ گەندەلییا ئەردۆغانی و کۆڕێ وی و لایەنگرێن وی- وەکی ئەو دبێژیتن، دڤێتن بگەھیتە دەستھەلاتێ ل وی وەلاتی. دیارە وی دڤێتن ڤێ گەندەلیێ ب گەندەلییەکا دیتر چارەسەر بکەتن، و ناڤێ وێ یا کرییە بزاڤەک ئیسلامی. پا یا داد و گەشەپێدانا ئەردۆغانی چ تشتە؟ ئاشکرایە فەتحۆلا گوولەن نە ل سەربانێ ھەیڤێ مەزن بیە ھەتاکۆ ئەم بێژین چ ژ حال و کاودانێن تورکیا و جیھانا ئیسلامی و جیھانێ بگشتی نەزانیتن. نەیا سەیرە ھەکەر ئەو خوە ل ڤێ ڕاستیێ ل گێلی بدەتن کە ڤی وەلاتی و جیھانێ بگشتی ھزاران ھزار مۆسلمانێن ھەژار و بەلەنگازێن ھەین ژ نەداریێ و نەچاریێ بۆ پارییەکێ نانی و چەند دۆلارێن پارەی پەیوەندی ب ڕێزێن ڕێکخراوێن تیرۆریستی کرین، لدەمەکی ئەو خوە ب مۆسلمان و سەرکردەیەکێ میانەڕۆ و قوتابیێ مەلا سەعیدێ نوورسی، دزانیتن. دیارە ھەکەر ئەو مرۆڤەکێ مۆسلمانێ ڕاستەقینە بایە ل شوینا ھندێ پارێ خوە ل وان تەخێن زەنگین و پێچێبووی و سەر ب کەرتێ حکومی ل تورکیا و جھێن دیتر بمەزێخیتن، بلا ب ھزاران ھەژار و نەدار تێرکربانە داکۆ ھیچ نەبیتن ئەو ژ باند و مافیایێن تیرۆریستی کڕێبانە و دویر کربانە. دیارە ئەو میانەڕۆییە، ئەوا ئەو پێ دخۆڕیتن، وەکی یا گەلەک پارتێن سەر ب ئیسلاما سیاسییە، تشتەک ڕووکەشە و ئیسلام تنێ ناڤ و نیشانەکێ پیرۆزە بۆ پیرۆزترکرنا بزاڤ و لڤینێن خوە و شەرعیەتدان ب تاوانێن خوە و گەھشتن ب مەرەمێن خوە یێن سیاسی، و ئەزموون د ڤێ چەندێ دا گەلەکن و ژ وان ژی ئەوا لڤێ کودتایێ دەرکەفتین نیشان ددەن کە ئەڤ میانەڕۆییە تشتەک دەمەکی و نەچارییە و ھەکەر دەلیڤە ھەلبکەڤیتن ھەر جارەکا ھەبیتن و ل کیرێ بیتن دێ نموونەیێن وەکی وێ کودەتایێ و گەلەک تشتی َخرابتر لسەر دەستێ وان ھێنەکرن. فەتحۆلا گوولەن وەکی ھەر مرۆڤەک دیتر، ئاساییە وەکی چەوا ئابراھام ماسلۆ دەروونناسێ بناڤ و دەنگێ ئەمریکی د تیۆرییا خوە لدۆر پێدڤیاتییا ئاماژەی ب گرنگییا تێرکرنا وان ددەتن، وی ژی پێدڤیاتیێن خوە ھەبن و بزاڤی َبۆ دابینکرنا وان بدەتن و نەخاسمە کو ئەو کەسەکێ تێرخواری و تێر ڤەخوارییە و ئەڤ تشتە، بەرۆڤاژی ملیۆنەھا مرۆڤ و مۆسلمانان، بۆ وی نە گرنگن، بەلێ پێدڤیاتیێن وەکی ڕاکێشان سەرنج و ڕێزگرتنا خەلکێ بۆ لایێ خوە و ناڤ و دەنگ و گەلەک لایەنێن جڤاکیێن دیترێن بڤی ڕەنگی ئەو پێدڤیاتینە ئەوێن فەتحۆلا گوولەن ل تێرکرنا وان دگەڕھیتن. چ گۆمان تێدا نینە ھیچ کەسەک دژی ڤێ چەندێ نەبیتن، ھەکەر بشێوەیەکێ ئاسایی بھێنە تێرکرن، بەلێ ئەوا جھێ دلگرانیێ یە ئەوە ئەو و گەلەکێن وەکی وی ل جیھانێ و کوردستانێ ڤی کاری و بدەستڤەئینانا ئارمانجێن خوە و پاراستنا بەرژەوەندیێن خوە ب تشتەکێ پیرۆزڤە گرێددەن کە دبیتن بۆ گەلەک کەسێن مۆسلمان ببیتە پالدەرەک مەزن و بھێز و وان بسەرداببەتن و ئەو مرۆڤ نەزانن ئەو یێن بناڤێ ئایینی دھێنە خاپاندن و نەزانن ژی ئەو یێن بووینە کەرەستەک لبەردەستێ ھندەک کەس و لایەنێن ھەلپەرەست، دا بگەھنە مەرەمێن خوە، و خەلک د ڤێ پرۆسێسێ دا دبنە پێسترک و ھندەک خژبەرک لبەر پێیێن وان و سوتەمەنی بۆ ئاگرێ وان. فەتحۆلا گوولەن و یێن وەکی وی بلا ل شوینا مەزاختنا ھزاران و مەلیۆنەھا دۆلاران ل ژنرالێن سەربازی، کە ب تەخەکێ زەنگین ل جیھانێ و تورکیا دھێنە ھژمارتن، و وان پالبدەتن کودەتا و تیرۆر و تالانکرنێ و ئاژاوەگێڕیێ بکەن،و نەڤێتن بدەنە مۆسلمانێن ھەژار، بلا وەکی دەیکا ترێزایێ وی پارەی ببەن و ل وەلاتێن ھەژار ل سەرتانسەری جیھانێ بگێڕینن و بسەر ھەژار و بەلەنگازان دابەش بکەن، ھیچ نەبیتن وەکی چەوا دەیکا ترێزایێ ب سەدان ھندی یێن ھەژار حێبەتی رەفتار و ئایینێ خوە کرن و کرنە شەیدایێ خوە و ئینانە سەر ئایینێ مەسیحیەتێ، فەتحۆلا گوولەن ژی ھزاران مرۆڤان بینیتە ناڤ ڕێزێن ئیسلامێ.



یێن وەکی دەیکا ترێزایێ چەندەھا سالان ژ ژیێ خوە بۆ خزمەتکرنا مرۆڤاتیێ تەرخان کرن و ل گۆندێن بیابانی و ھەژار و دناڤ خەلکەکا برسی و ڕویس و پاشکەفتی بۆراندن، و چ گرمان تێدا نینە دێ جھێ وێ بەھشتا بەرین بیتن، و یێن وەکی فەتحۆلا گوولەنی و دار و دەستەکا وی و ژبەر تێکدانا تەناھییا جیھانێ و ئاژاوەگێڕیێ دێ بەھرا وان جەھەننەم بیتن، چونکی پارێ مۆسلمانان ژ دەڤێ وان و زارۆک و مالباتێن وان ڤەدکەتن و ل دژی وان بخۆ بکار دئینن و ل ڤی چاخێ تەژی ئاریشەیێن ھەمەجۆر ل جیھانێ، ل شوینا دەستێ مرۆڤایەتیێ بگرن دا ب ئاڤێ دا نەچیتن و نەخەندقیتن ھندێ دیتر پێھنا لێبدەتن دا زوویتر دەستێ خوە ژ وان قچیلک و تڕاشان بەردەتن ئەوێن خوە پێڤە گرتی و داکۆ باشتر ب ئاڤێ دا بچیتن. ئەڤەیە میانەڕۆییا وی و ڕاستی و کەتوارێ سایکۆلۆژیایا کەساتیا تیرۆرپەروەران، یێن کو لبن سیبەرا ھزر و مێنتالیتە( ئەقلیەتێ) وان ئەڤرۆکە جیھان گەھشتییە سەرێ دوو ڕییانا ژناڤچۆنێ و تێداچۆۆنێ.
*ئەڤ بابەتە ل ژمارا (١٩٣٣) ێ ڕۆژناما ئەڤرۆ ل ( ١٤/٨/٢٠١٦) ل لاپەڕێ(١٢) ھاتیە بەلاڤکرن.

*مامۆستای ئەکادیمی/پسپۆرێ زانستەکانی پێداگۆگی و سایکۆلۆژی/زانینگەی زاخۆ