لە هەر كەسێك بپرسی بۆ دەربازبوون لەم دۆخە و باشكردنی ژیانی خەڵك و ئامادەبوون لەبەرامبەر ئەو گۆڕانكارییانەی لە ناوچەكەدا بەڕێوەن چیبكەین باشە؟ راستەوخۆ پێت دەڵێت گفتوگۆ و یەكخستنی نێوماڵی كوردستان، یەكخستنی نێوماڵ داخوازییەكی لەمێژینەی خەڵكی كوردستانە، هەر لەبەر ئەوەشە هیچ حزبێك نییە جورئەت بكات و بڵێ من ئەو یەكخستنەم ناوێ، لەبەرئەوەی داخوازییەكە هێندە گرنگە، حزبەكان نەك ناوێرن پشتی تێبكەن، بەڵكو پێی لەسەر دادەگرن و هەر هەموویان بە بەردەوام دەستەواژەی (با نێوماڵی خۆمان رێكخەینەوە) لە گوتاری خۆیاندا بەكاردێنن.
كێشەی گەورە ئەوەیە، ململانێی حزبی سنووری ئاسایی ململانێی تێپەڕاندووە، بۆیە كاریگەرییەكی خراپی لێكەوتۆتەوە، رق و كینە و لێكدڕدۆنگ بوونی بەرهەمهێناوە، ئەم بەرهەمە خراپە، بێ متمانەیی لێ وەپاش كەوتووە، بۆیە بەبێ هیچ شەرمێك، وێڕای ئەوەی تا ئێستا نزیكەی 1500 پێشمەرگە شەهید بووە، سەنگەرەكان خوێنیان لەبەر دەڕوات، پێشمەرگە بەخوێنی خۆی خەڵك لە دڕندەیی داعش دەپارێزێت، كەچی لە پشت ئەو سەنگەرانەوە، حزبەكان بێباكانە ململانێ دەكەن، لە میدیا دەڵێن خەمی خەڵكمانە، كەچی لە كۆبوونەوەكان لیستی داواكردنی پۆست دەردەكەون، هەندێ جاریش وتاری ئاگرین دەدەن، بڕێك هەوادار و لایەنگر تاودەدەن، خەڵكێكی زۆریش بێ ئومێد دەكەن.
دانیشتن و مەجلیسی كۆمەڵایەتی، هەر چەند خولەكێكی سەرەتا دانیشتنی كۆمەڵایەتییە، زۆر نابات دەبێتە مشتومڕی سیاسی و دڵی یەكتر دەهێشێنن، سەیری تۆڕی كۆمەڵایەتیی فەیسبووك بكەن، قسەی بیرمەند و دانایەك پۆست بكە كەس بە لایشیدا ناچێت، بەڵام یەك دوو قسەی سیاسی بنووسە، هەرئەوەندە دەزانی بەلێشاو كۆمێنتی سەیر و سەمەرە و نەشیاو بەدوای یەكدا دێن، هەموو ئەو كۆمێنتانەش لە تێڕوانینی سەقەتی حزبییەوە سەرچاوەیان گرتووە، ئاخر هەر ئەوەشە وایكردووە لایەنگرانی حزبەكان، لەبەر ئەو ململانێ ناشیرنە، بەسەر سەربەخۆیی خواز و دژە سەربەخۆییدا دابەش ببن، بەدرێژایی سەدەی بیستەم تا بە ئەمڕۆ دەگات، خوێن بۆ وەدیهێنانی ئاواتی خەڵكی كوردستان دەڕژێ، كەچی ململانێی حزبی كەسانێكی بەو ئاقارەدا بردووە گاڵتەیان پێ بێت. رووداوێك لەوسەری دونیا رووبدات، لە كوردستان بە تێڕوانینی حزبی سەیردەكرێ، بەڵكو خوایە ببێتە زیانگەیاندن بە حزبی بەرامبەر.
دەرمانی ئەم دەردە تەنیا لای خۆمان دەست دەكەوێت، ئەویش بریتییە لەوەی هەموومان بەخۆماندا بچینەوە، ناخی خۆمان خاوێن بكەینەوە، هەرچی رق و كینە و بوغزاندنی یەكدییە، بیهێنینەدەر و تا خوا قوەتمان دەداتێ توڕتێیهەڵدەین، ئینجا وەك جاری جاران یەكتریمان خۆشدەوێتەوە، تا ئەمە نەكەین، نە دەست پێشخەری دیالۆگ قبووڵ دەكەین و نە یەكتریش قبووڵ دەكەین، نە چارەسەری كێشەكانمان دەكەین، نە ماڵی خۆشمان رێكدەخەینەوە، بۆیە تا زووە با ناخمان لەو رەشییە خاوێن بكەینەوە، دەی دەستم دامێنتان بێ با وابكەین.