له یادی 70 ساڵه‌ی دامه‌زراندنی پارتیدا تكایه غه‌در له بارزانی نه‌مر مه‌كه‌ن
سووره مه‌رگه‌یی
خاڵێكیتر كه ده‌مه‌وێ ئاماژه‌ی بۆ بكه‌م ئه‌وه‌یه له‌و یاده‌دا غه‌در له بارزانی نه‌مر مه‌كه‌ن و چیتر به كامیره‌ی حزبی وێنه‌ی بارزانی نه‌مر مه‌كێشن، چونكه به هه‌موو پێوه‌ره سیاسی و مێژوویی و شۆڕشگێڕیه‌كان بارزانی نه‌مر له‌وه گه‌وره‌تره مڵكی هیچ حزب و ریكخراوێكی سیاسی بێت، هه‌ڵوێست و شاكاره مێژووییه‌كانی بزووتنه‌وه‌ی رزگاریخوازی كوردیش پێمانده‌ڵێ: بارزانی نه‌مر مڵكی نه‌ته‌وه‌یه‌كه و بۆ نه‌ته‌وه‌یه‌ك ژیاوه و كۆچی دواییشی خه‌ساره‌یه‌ك بوو له نه‌ته‌وه‌یه‌ك كه‌وتووه، بۆیه پێوه‌ر بوون بۆ خاوه‌ندارێتی بارزانی نه‌مر و وه‌فا بۆ رێبازه‌كه‌ی گه‌شه پێدانی هزر و بیری نه‌ته‌وه‌یی و بڕوا بوونه به سه‌ربه‌خۆیی كوردستان و دامه‌زراندنی ده‌وڵه‌تی كوردی.
كه‌سانێك له‌ناو پارتی و ده‌ره‌وه‌ی پارتیش ده‌كه‌ونه هه‌ڵه‌وه كه پێیان وابێ هه‌موو پارتی بوونێك پابه‌ند بوونه به ریبزی بارزانی نه‌مر، تێگه‌یشتن له رێبازی بارزانی نه‌مر تێگه‌یشتنه له كوردایه‌تی و هاوخه‌باتی و هاوچاره‌نووسی، تێگه‌یشتنه له داده‌په‌روه‌ری سیاسی و كۆمه‌ڵایه‌تی، تێگه‌یشته‌نه له كاره‌سات و نه‌هامه‌تیه‌كانی ژێرده‌سته‌یی و رێز گرتنه له‌و خوێن و خه‌باته‌ی له پێناو سه‌ربه‌خۆییدا به‌خشیومانه، رێبازی بارزانی نه‌مر كار و كرداره، نه‌ك درووشمی بریقه‌دار و وتاری فریوده‌ر، بۆیه وه‌ك پێشتر ئاماژه‌م بۆ كرد مه‌رجی وه‌فا و پابه‌ند بوون به ریبازی بارزانی نه‌مر بڕوا بوون و كار كردنه بۆ گه‌یشتن به سه‌ربه‌خۆیی كوردستان و دامه‌زراندنی ده‌وڵه‌تی كوردی، نه‌ك ئه‌وه‌ی سه‌ر به كام حزبی و ئه‌و حزبه له كام به‌شه‌ی كوردستانه، بۆیه ده‌كرێ حزبێكی رۆژهه‌ڵاتی كوردستان یان رۆژئاوا یان باكوور و باشوور گره‌وی مێژوو به‌رنه‌وه و خۆیان بكه‌ن به خاوه‌نی كۆی سه‌روه‌ریه‌كانی بارزانی نه‌مر، ئه‌وه‌ش كاتێك ده‌كرێ كه هه‌ڵوێسته نه‌ته‌وه‌یی و شۆڕشگێڕیه‌كانی بارزانی نه‌مر له ره‌وشت و كارنامه‌ی سیاسی و په‌یامی نه‌ته‌وه‌ییاندا ره‌نگ بداته‌وه.
له كۆتا خاڵدا ده‌ڵێم: هه‌ستیاری قۆناغه‌كه و گۆڕانكاریه چاوه‌ڕوان كراوه‌كان له به‌رپرس و بڕیار به‌ده‌ستان ده‌خوازێ ده‌ستبه‌رداری به‌رژه‌وه‌ندی تایبه‌تی ببن و ده‌ست به رێبازی بارزانی نه‌مره‌وه بگرن، خۆ ئه‌گه‌ر ئه‌وه نه‌كه‌ن جیا له‌وه‌ی ریسوا و خه‌جاڵه‌تی به‌ر لیقای مێژوو ده‌بن، ئه‌و سه‌روه‌ت و سامانش له ده‌ست ده‌ده‌ن كه به دزی و گه‌نده‌ڵكاری به‌سه‌ریه‌كتانه‌وه ناوه.
