بەقەدەر هەموو مێژووی چەندهەزارساڵەی كورد لەم چەندساڵەدا كوردەكان جنێویان بە یەكتر دا. شەڕەجنێو بە شێوەیەكی سیستەماتیك كاری بۆ كرا، دەیان ملیۆن دۆلاری لە سامانی گەل بۆ تەرخان كرا، سەدان ڕۆژنامەنووس و نووسەری بۆ بەكرێ گیرا. بووەتە بەشێك لە كوولتووری سیاسی، بووەتە شانازی و كارتی فشار لە دەستی بەشێك لە سیاسییەكان بۆ ئەوەی بەرانبەریان بشكێنن. ئەوە لە حاڵێكدایە حزبەكان هەموو میكانیزمی كاری سیاسیی مەدەنی و یاساییان لەبەردەستدایە بۆ چالاكیی سیاسیی.
بەڵام بۆچی سیاسییەكان پەنا بۆ ئەم كردە ناتەربەویی و بێ كەلكە دەبن؟ بۆ دانبەخۆیاندا ناگرن و ناتوانن ڕێزی بەرانبەر بگرن؟ بۆچی بەزەییان بە باری دەروونیی خەڵك نایێت؟ بۆچی ناتوانن ئارام بن، هەڵنەچن، دووربین بن؟
هۆكارەكەی لە ناپێگەییشتووییدایە یان بابەتێكی سایكۆلۆژییە؟
هۆكاری سەرەكیی جنێودان و جنێوفرۆشی لە عوقدەی خۆبەبچووكزانینی جنێودەردایە. خۆبەبچووكزان خۆپەرستیشە و بڕوای وایە ئەوەی بۆ ئەو نەبێ با بۆ هیچ كەسیش نەبێ. حەزی لە پێشكەوتنی خەڵك نییە، تەنانەت گرفتی لەگەڵ شكۆ و سەروەریی وڵاتەكەیشی هەیە. خۆبەبچووكزان چاوچنۆكە بۆی بڕەخسێ هەرگیز دەست لە دزی و گەندەڵی ناپارێزێ. خۆبەبچووكزان دڵڕەق و بێبەزەییە، ئەتوانێ مرۆڤكوژ بێ. لە دەستەڵاتدارێتیدا زاڵم و خۆسەپێنە، لە ڕێی ستەمكاریدا قەرەبۆی گرێ دەروونییەكانی دەكاتەوە.
جنێودەر ئەو خۆبەبچووكزانەیە هەڕەشەیە بۆ ئاشتی و ژیانی دەرووبەری.