گیانی پێشمەرگە گرنگترە!
June 16, 2016
وتار و بیروڕا
*بن جدۆ دەڵێ؛ كە زانیم سەرۆك شڵەژاوە بە كامێرەمانەكانم گوت: كامێرەكانتان جێگیر بكەن و هەمووتان بچنە دەرەوە، لەوێ كۆنتڕۆڵی كامێرەكانتان بكەن چونكە سەرۆك بە ئامادەبوون و بزاوی ئێوە ناتوانێ وەك پێویست قسە بكات!. ئیتر ئیتر كارەكە بە ئەنجام دەگا و یەكێك دەبێ لەسەر كەوتووترین پرۆگرامەكانی بن جدوە، لای خەڵكی لوبنانیش حێی ڕامان و سەرسامی دەبێ.
*مەبەستم لەو نموونەیە (بەشێك) لە بەرپرسانی خۆمان، كە بە پێچەوانەی ناوبراو عاشقی قسەكردنن و هیواخوازن بچووكترین دەرفەت هەڵبكەوێ تاكو بێنە دوان، ئەمە لە كاتێكدا زۆر جار قسەكان دەبنە مایەی سەرئێشە و گرفت بۆ بەرەكانی جەنگ.
*شەڕی داعشی داسەپا و بۆ كورد و پێشمەرگە، وەچەرخانێكی بواری سەربازی بوو لە رووبەرووبوونەوەی پارتیزانی بۆ شەڕی بەزەیی، بۆیە سروشتییە رۆژنامەنووس هەڵەبكا و بەهۆی كەم ئەزموونی لەپێشی بەرەكان بەرپرسان بدوێنێ و، لەو بەرەوە بەدووری چەند سەد مەترێك دوژمن بزانێ لای ئەوبەر چی روودەدا و بەهۆی پەخشی راستەوخۆ و (جی پی ئێس)ەوە شوێنی پێشمەرگە و جموجۆڵی بزانێ و زیانی پێ بگەیەنێ. بەڵام، نا ئاساییە ئەو بەرپرسانە، كە بەشێكیان بەكیلۆمەتر دوورن لەشەڕ، ئاخاوتن بدەن و لەززەتی دەركەوتن وایان لێ بكات بنهماکانی زانستی شەڕ ببەزێنن و ژیانی خۆیان و پێشمەرگەكان بخەنە مەترسی. لە شەڕی ئیسرائیل ـ عەرەب ساڵی 1967 رادیۆی تەلەئەبیب تا جەنگەكە تەواو بوو یەك لێدوان لە هیچ سیاسی و جەنەڕاڵێك وەرنەگیرا. راستە، ئەمێستا قۆناغەكە گۆڕاوە، وەلێ هەمدیس نابێ فیشەكێك بتەقێندرێ و چەندین كاژێر ئاخاوتن بدرێ!.
*ئەم بابەتە زۆر باس كراوە، كە لە كاتی پێویست، سروشتییە بەرنامە و ئاخافتن هەبێ وەگەر ئێستا ئاسا بەردەوام بێ بەدڵنیاییەوە چۆن زەرەری هەبووە، زیانەكانی داهاتووی فرەتر دەبێ.
*ئەمین لحود چاكی پێكاوە لە جوڵەی كامێرا و كامێرامانان سڵی كردۆتەوە، چونكە زانیویەتی چی بەدوای خۆیدا دەهێنێ، ئەمە رێك پێچەوانەی (بەشێكی) لای خۆمانە، كە بۆ گرتەیەك گوێ بەهیچ نادەن و دەرخستنەكەیان لە هەموو شتێك لا گرنگرترە. وەك تێبینی، لە هەموو شەڕە گرنگە مەیدانییەكانی جیهانی نوێ، وتەبێژی وەزارەتی پەیوەندیدار لە بەردەم جورناڵیستان دەوەستێ و روونكردنەوە پێشكەش دەكا وەكو ئەمریكا لە ئەفغانستان و عێراق ـ توركیا ـ سعودیا و یەمەن و..تاد. هەموو ئەوانەش لە پێناو پاراستنی نهێنی شەڕ و نەخشە و پلانەكانی هەنووكە و دواترە.