ئه‌گه‌ر ئه‌رکی میدیا گه‌یاندنی ڕاستی هه‌واڵ و گواستنه‌وه‌ی زانیاری گرینگ بێت بۆ بینه‌ر و بیسه‌ری، له‌ هه‌مانکاتیش به‌رپرسیاریه‌تیه‌کی گرنگتری له‌ ئه‌ستۆیه‌ که‌ ئه‌ویش پاراستنی ئاسایشی نه‌ته‌وه‌ییه‌‌، که‌‌ به‌داخه‌وه‌ هه‌ندێکجار و به‌تایبه‌ت له‌ کاتی ڕووماڵی ئوپه‌راسیۆنه‌کانی پێشمه‌رگه‌، میدیاکان ئه‌رکی خۆیان فه‌رامۆش ده‌که‌ن به‌ ‌درکاندنی هه‌ندێ زانیاری سه‌ربازی که‌ پێیان ده‌درێت و‌ لێدوان وه‌رگرتن له‌ هه‌ندێک فه‌رمانده‌ که‌ پلان و ئامانجه‌کانیان ئاشکرا ده‌که‌ن، هه‌روه‌ها پیشاندانی شوێن و جۆری چه‌که‌کان و ژماره‌ی پێشمه‌رگه‌کان به‌ شێوه‌ی ڕاسته‌وخۆ!که‌ بێگومان ئه‌مه‌ش زیانی زۆرتره‌.

به‌ڵام ئایا ئه‌مه‌ ته‌نها که‌مته‌رخه‌می میدیایه‌ یان که‌‌مته‌رخه‌می لایه‌نی په‌یوه‌نداره‌ به‌هۆی نه‌بوونی یاساییه‌کی ڕێکخراو بۆ میدیاکان له‌ به‌ره‌کانی جه‌نگ و شێوازی گواستنه‌وه‌ی هه‌واڵ و هه‌روه‌ها ده‌ستنیشان نه‌کردنی که‌سێکه‌ وه‌کو ووته‌بێژی سه‌ربازی ئۆپه‌راسیۆن، که‌ ته‌نها ئه‌و که‌سه‌ مافی لێدوانی هه‌بێت؟

له‌لایه‌کی تریش کێبڕکێی نێوان که‌ناڵه‌ بێلایه‌نه‌کان! که‌ هه‌ریه‌که‌و بۆ پڕبینه‌ری که‌ناڵه‌که‌یان و گرینگی ڕووماڵه‌کانی، به‌داخه‌وه‌ گره‌و له‌سه‌ر پیشاندان و باس کردنی هه‌موو زانیارییه‌ک ده‌که‌ن!
که‌ ده‌بوایه‌ گه‌یاندنی ئه‌و زانیارییانه‌ و پیشاندانیان له‌ میدیاکان له‌ دوای ته‌واو بوون و سه‌رکه‌وتنی ئۆپه‌راسیۆنه‌کان بێت له‌ پرێس کۆنفڕانسێک له‌ لایه‌ن ووته‌بێژی ئۆپه‌راسیۆن یان فه‌رمانده‌یه‌کی پێشمه‌رگه‌وه‌ باس بکرێن.

تێبینی: له‌م ڕووه‌وه‌ به‌رپرسانی پێشمه‌رگه‌ و فه‌رمانده‌کانیش هێنده‌ی میدیاکان که‌مته‌رخه‌من.

سه‌نگه‌ر مسته‌فا