دەمێ پرسیارەكا لۆژیكی ئاراستەی تیرۆریزمێ دهێتەكرن كە بۆچی دگەل كاودانێن جیهانا سەردەم ناكۆكیێ دكەن، دبیتن بەرسڤا هەرە دیارا وان ئەو بیتن كە ئەو دژی نویگەرایی و نویبوونێ نە و وێ چەندێ ب ( بدعە ) ددەنە زانین و وەسا ددەنە زانین و خویاكرن كە ئەڤ نویخوازییە دگەل بنەما و پرەنسیپ و بۆهایێن ئایینێ ئیسلامێ ناگۆنجن. ژڤێ هزرێیە ئەو نۆكە و چاخێ نوی ب پیڤەرەكێ كەڤن دپیڤن و ل هەمان دەمدا هەر ئەون كە گەلەك ژ لایەنێن ڤێ نویخوازیێ و پێشكەفتنێ بۆ مەرەم و مەبەستێن تایبەتێن خۆ بكار دئینن و مەبەست ژی هەمی ئەو كەرەستە و ئالاڤ و دەزگەهێن راگەهاندنێ و لەشگەرینە یێن كۆ ئەو رۆژانە د كار و كریار و رەفتارێن خۆ یێن تیرۆریستانەدا بكار دئینن و بڤێ چەندێ ڤێ ( بدعێ ) بۆ خۆ ( حەلال ) دزانن و بۆ خەلكا دیتر ب ( حەرام ) دهژمێرن. ئایا ئەڤ ئایدیۆلۆیایا تێر پارادۆكس و هەڤدژ و نەوەك ئێك ژ كیڤە سەرچاڤەی دگریتن؟
پشتی كڤشكرنا نەستی ( لاشعوری ) وەك ئێك ژ پێكهاتەیێن سایكۆلۆژیایا كەساتییا مرۆڤی كە ژ لایەنێ فرۆیدێ دەروونناس هاتە ئەنجامگرتن، كۆ گرنگییا وێ وەكی ڤەدیتنا ئەنتگرێتی یە د فیزیكی دا، زانست ڤێ چەندێ نیشان ددەتن كە دەمێ هزرا مرۆڤی بێ مفا لدەوروبەری تشتەكی دزڤڕیتن و بەردەوام هەمی هێز و شیانێن خۆ لسەر ڤێ چەندێ كۆم دكەتن، ئەڤە ئانكۆ وی هەم هەست ( شعور ) و هەم نەستێ خۆ سەرقالی ڤێ چەندێ كر و بگرە و دەست و پێ یێن نەستی ژی كرنە د ناڤ زكێ وی دا و نەهێلان نەست ببیتە ژێدەرێ سروش ( ئیلهامێ ) بۆ هاتنا هزر و بیروباوەرێن داهینەرانە د مێشكی دا، و ئەڤ یاسایە لسەر كەساتییا تیرۆریستان ژی جێبەجێ و پەیادە دبیتن. چ گۆمان تێدا نینە هندی هزرا دژایەتیكرنا ڤێ ناكۆكی و ناتەباییا دناڤبەرا بۆهایێن وی و یێن جیهانا دەرڤە و سەردەمیانە، كە یا بوویە بابەتەكێ دیفاكتۆ و ناهێتە حاشالێكرن، چەوا ئەڤ كەسێ تیرۆریست دشێتن داهینانێ بكەتن و خزمەتا خێزان و جڤاك و ژینگەهێ و جیهانێ بكەتن؟ ب هاتنا نوییاتی و نویخوازیێ هیچ زیانەك ل كەساتییا تیرۆریستی ناكەڤیتن، بەلكۆ هەكەر تیرۆریست یێ تێگەهشتی و هشیار بیتن دێ خۆ ب رویبارێ شارستانیەتێ و نویخوازیێدا بەردەتن و بڤێ چەندێ مێشكێ خۆ ژ هەمی قەید و بەندێن بەرتەنگكەر ئازاد كەتن و دێ بینیتن كە چەوا نەستێ وی دێ هارییكارییا ئاڤاكرنا كەساتییا وی كەتن و ب سروش هندەك هزر و بیروباوەر و داهینان و سەركەفتنا ئیننە گۆڕێ كە ببیتە گۆرزەكێ مەزن ل دژی وان كەسێن ئەو ب هەڤڕك و دوژمنێن خۆ دزانن و ژ لایەك دیتر ڤە وی ژ ڤێ پارادۆكسا هزری یاكۆ بەردەوام وەكی كرمێ ددانا وی ژناڤداڤە دخۆتن، قۆرتال كەتن.
• ئەڤ بابەتە یا ل رۆژناما ( ئەڤرۆ ) هاتیە بەلاڤكرن ل ژمارە( 1680) ڕێكەفتی (5/7/2015) ل(13 ).