پۆلینكرنا دووانی و ئایدیۆلۆجیا تیرۆریزمێ
د.نەسرەدین ئیبراهیم گۆلی*
ئەم دێ لڤێرێ ئێینە سەر ڕێكخراوێن تەكفیری كە وەك فەلسەفە و لۆژیكا بەرێ ئایدیۆلۆژیایا خۆ یا لسەر پیڤەرێ دووانی ئاڤاكری. د ئایدیۆلۆژیایا وان دا جڤاكا مرۆڤایەتی دوو تەخ و دەستە و گرووپن: هندەك كافرن و هندەك نەكافرن. تو دێ بێژی وان تاقیكرنەك یا ب جڤاكێ كری و نمرەیا ( 50 ) پیڤەرێ وێ تاقیكرنێ یە و ئەو كەسێ ژ ڤێ نمرەی درەباز بیتن ئەو نەكافرە و ئەو كەسێ نمرا وی نەگەهیتە وێ نمرەی ئەو كافرە و مافێ وی كۆشتن و سەربڕین و سۆتن و ب بلۆكا هەڕشاندنە !
هەكەر ئەڤ ڕێكخراوێن تووندرۆ و تەكفیری د ڕاستن و هزردكەن كافری و نەكافربوون ژی وەك تاقیكرنێیە، بلا باش بزانن كۆ ئەڤ جۆرێ پۆلینكرنا دووانی بۆ تاقیكرنا، ( دەرچۆ ) یان ( كەفتی ) بوون، دروست بیتن، بەلێ ئەڤ پیڤەرە د سەرەدەریكرن دگەل مەلیۆنەها مرۆڤان ناهێتە پراكتیكیكرن یێن كۆ ب هژمارا وان كەساتی و بیروباوەر و هزرێن جیاوازێن ئایینی و نەئایینی یێن هەین و ئاستێ باوەرییا وان ب سەرێ درێزیكێ دگەل هەڤدۆ جیاوازە و ئەڤ جیاوازییە د خالەكا وەكی ( 50 ) ێ دا رەها و داخستی نینە كۆ مرۆڤ بێژیتن ئەوێ د سەر ڤێ خالێدا یە ئەو مرۆڤەك نەكافرە و كەسێ دبن ڤێ خالێدایە كافرە و مافێ ژیانێ نینە چونكی ئێزدییە یان كوردە یان جۆهییە یان مەسیحییە یان كاكەییە یان فارسە یان شێعەیە.
ئەڤ جۆرێ پیڤەران چەوا ل هیچ سەردەمەكی ناخۆتن، بەلكۆ ژی بۆ ڤی سەردەمی، یێ كۆ سەردەمێ ئازادییا بیروباوەر و ئایین و نەتەوە و نەژاد و مەزهەبی یە ب هیچ رەنگەكی ناگۆنجیتن و بەلگە ژی بۆ ڤێ چەندێ هەمی ئەو ئاریشە و كێشە و قۆربانیدان و بەدبەختینە یێن كۆ ژ ئەگەرێ بكارئینانا ڤی پیڤەری ژ لایەنێ هژمارەكا مرۆڤێن مەژی هشك و دۆگماتی و پەیدا بووی و دڤێتن بڤێ مێنتالیتەیا نەگۆنجای سەرەدەریێ دگەل هزارەی سێیەمدا بكەن و ڤێ چەندێ ژی چ مفا نەگەهاندینە ڕێبازا وان چونكی ڕێبازا وان بەرهەمێ ئایدیۆلۆژیایەكا تەژی پارادۆكس و دژایەتییە و دگەلەك تشتان دا ناكۆكییا د ناڤەرۆكا وێ دا هەی.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە (1350 ) ڕێكەفتی (15/6 /2015) ل( 6).
