لێدوانی ژمارەیەك پارلەمانتار و سیاسیی كورد و مامەڵەی بەشێك لە میدیا كوردییەكان لەگەڵ كێشەكانی نێوان هەرێم و بەغدا وای كردووە خەریكە لەبیری هاووڵاتیانی كوردستان دەبەنەوە كە كێشەی هەرێمی كوردستان لەگەڵ حكوومەتی عێراقدا بابەتێكی مێژوویی و سیاسی و نەتەوەییە. گرفتی سەرەكی سیادە و ناسنامە و جیۆگرافیایە. وەرگرتنەوەی مافە زەوتكراوەكانە. قەرەبووكردنەوەی قوربانییانی ئەنفال و جینۆساید و كیمیابارانكردنەكانە كە حكوومەتی عێراق تا ئێستا یەك هەنگاویشی بۆ نەناوە.
جێگەی داخە سەرباری ئەو هەموو ئەزموونەی كورد لەگەڵ عێراقدا هەیەتی خەڵكمان هەبێ ساویلكانە بكەوێتە بچووككردنەوەی كێشەكانی گەلی كورد و دەهۆڵی پاشكۆبوونی كورد لە عێراقدا بكوتێ و هەندێكیشیان وەك دەمڕاستی حكوومەتی عێراق پاكانە بۆ سیاسەت و پێشێلكارییەكانی حكوومەتی عێراقی بهێننەوە.
ڕاستە خەڵك مافی خۆیەتی لەوە بگات ئەو پاڵنەر و هۆكارانە چین قەیرانی نێوان هەرێم و بەغدای قووڵتر كردووەتەوە، بەڵام لەگەڵ ئەوەیشدا ئیختیزالكردنی لە مەسەلەی كۆمپانیا نەوتییەكان ئەوەیش بە خوێندنەوەیەكی تەواو عاتفی و حزبیانە، زوڵمێكە لە دەستكەوت و داواكارییەكانی گەلی كورد دەكرێت.
دەبێ لەوە بگەین مەسەلەی تێپەڕاندنی بوودجە بە بێی كورد و دژایەتییكردنی سیاسەتی نەوتیی كوردستان لە لایەن بەغداوە ئاماژەن بۆ ئەوەی بتوانین لە نییەتی ڕاستەقینەی حوكمدارانی بەغدا بگەین. ئەگەر سیاسەتی نەوتیی كوردستان تۆزقاڵێك بە زیانی هەرێمی كوردستان تەواو ببا ئەوا عەقڵیەتی حاكمی عێراق پێشوازیی لەو سیاسەتە دەكرد. بەڵام پلانی نەوتیی هەرێم پەیامێكی ڕوونە بۆ دەستەڵاتی عێراق كە هەرێم پاشكۆ نییە و نایەوێ ببێتە بەشێك لە فەشەلی ئابووریی و سیاسیی دەوڵەتی عێراق. نەوت بۆ هەرێمی كوردستان كلیلی هەنگاونانە بەرەو تۆكمەكردنی كیانی نەتەوەیی بۆیە وا بە چڕی ڕووبەڕووی هەڵمەتی دژایەتیكردن بووەتەوە هەم لە لایەن حكوومەتی عێراقییەوە هەمیش لە لایەن تەوژمێكی خۆبەبچووكزانی نێوخۆییەوە كە سەروەری و كیانی نەتەوەیی لە ئەجێندا سیاسییەكەیدا غایبە.

قەیرانە تازەكانی نێوان هەرێم و بەغدا وامان لێ دەكات دووبارە بە كۆمەڵێك هێڵی گشتیدا بچینەوە و خۆمانی لەگەڵدا یەكلایی بكەینەوە:
یەكەم: كورد دەبێ بۆی ڕوون بێتەوە كە ئایا شەریكە یان نا؟ ئەگەر شەریكە شەراكەت وا نابێت كە ئێستاكە هەیە.
دووەم: ئەگەر سیاسییەكانی عێراق هێشتا كورد بە پاشكۆ دەزانن دەبێ لەنێو خۆیشماندا ڕێككەوین ئایا پاشكۆ بین یان نا؟
سێیەم: بەڕێوەبردنی عێراقی تازە ئایا لەڕێی تەوافوقەوە دەكرێت یان شتێكی دی ئەگەر جگە لە تەوافوق بێت كورد لە دواڕۆژی عێراقدا هیچ پشكێكی بەر ناكەوێت.
چوارەم: نابێ لەبیركەین كێشەی كورد نەتەوە و جیۆگرافیایە نەك بە ئیداریكردنی داواكاریی گەلێك كە سەد ساڵە دەچەوسێندرێتەوە.
پێنجەم: بەشداریی كورد لە عێراقدا لەسەر بنەمای یەكگرتنی ئارزوومەندانەیەی نەتەوەیەكە لەگەڵ دەوڵەتێك نەك سەپاندنی مەنتیقی زۆرینە بەسەر كەمینە چونكە بەو مەنتیقە بێت كورد تاهەتایە پلە دوو و پاشكۆیە.
شەشەم: ئەو تاوانانەی دەوڵەتی عێراق دەرهەق گەلی كورد كردوویەتی ئەو بەرپرسیارێتییە دەسەپێنێتە سەر دەوڵەتی عێراق كە قەرەبووی هەموو زیانێكی مەعنەوی و ماددی گەلی كورد بكات تەنانەت ئەگەر هاتوو بڕیاڕی جیابوونەوەیشی دا.
ئەم نووسینە لە ڕۆژی چوارشەممە 13ـی 3ـی 2013 لە ڕۆژنامەی هەولێردا بڵاو بووەتەوە.