بەڕێوەبەری ناحیەی قەیرەوانی سەر بە قەزای شنگال ئاشکرای کرد هێزی حەشدی عەشایری کە لەلایەن حەشدی شەعبییەوە بۆ پێکهاتەکانی دەڤەری قەیرەوان پێک هێندراوە، ئێستا شەڕ و ناکۆکی لە نێوان ساز بووە و بوونەتە مەترسیی سەر ناوچەکە.

لەمبارەوە عەبدولحەمید قاسم، بەڕێوەبەری ناحیەی قەیرەوانی سەر بە قەزای شنگال ڕاگەیاند: "حەشدی عەشایری کە بۆ پێکهاتەکانی ئێزدی و عەرەبی پێک هێنراوە، ئێمە بە هەنگاوێکی باشی نابینین، چونکە هەر هۆزێکی دەڤەرەکە چەکدار بکرێت، یان چەک لە هۆزێکی دیکە بسەندرێت، دەبێتە هۆی کیشە و ئاڵۆزی و ئێستاش حەشدی عەشایری بۆ پێکهاتەی سنوورەکە ساز کراوە و ئەمەش بووەتە هۆی کێشە و ناکۆکی لە نێوان خۆیان".

ئاماژەی بەوەش کرد: "لەلایەک عەرەبی سوننە بوونەتە حەشدی عەشایری و سەر بە حەشدی شەعبین، هاوکات حەشدی عەشایریی ئێزدیان کە ئەوانیش چەندین هێزن و ناکۆکییەکی زۆر لە نێوان ئەوان و حەشدی عەشایریدا هەیە و ئەمەش بووەتە هۆی کیشەیەکی گەورە لە دەڤەری قەیرەوان".

بەریوەبەری ناحیەی قەیرەوان گوتیشی: "هەتا ئێستا ٨٠٪ی عەرەبەکانی ئەو سنوورە گەڕاونەتەوە، بەڵام هاووڵاتیانی کورد هەتا ئێستا ٥٠٪یان گەڕاونەتەوە قەیرەوان و هاوکات عەرەبەکان ناچنە شوێنی ئیزدییەکان و ئێزدییەکانیش ناچنە سنوووری ژیانی عەرەبەکان و باوەڕیان بە یەکتر نییە و ترس لەناو پێکهاتەکانی سنوورەکە دروست بووە و ئێستاش ناوچەکە لەژێر کۆنترۆڵی حەشدی شەعبی و حەشدی عەشایری دایە".

عەبدولحەمید قاسم ئاماژەی بەوەش کرد: "ڕێککەوتنی نێوان حکوومەتی هەرێمی کوردستان و حکوومەتی عێراق بۆ ئاساییکردنەوەی ڕەوشی شنگال، باشترین هەنگاوە بۆ خزمەتکردنی خەڵکی سنوورەکە و دابینکردنی ئاسایش و سەقامگیری لە شنگال، چونکە شنگال و ناحیە و ناوچەکانی بەبێ بوونی پێشمەرگەی کوردستان وەک جاران ئارامی تێیدا جێگیر نابێت".




باسنيوز