سەرۆکوەزیرانی عێراق رایدەگەیێنێت، دەبێت دەروازە سنوورییە نافەرمییەکان دابخرێن و "لێپرسینەوە لەگەڵ کارمەندە گەندەڵەکان" بکرێت.

رۆژی یەکشەممە 8ی تشرینی دووەمی 2020، مستەفا کازمی، سەرۆکوەزیرانی عێراق لەگەڵ عومەر وائیلی، سەرۆکی دەستەی دەروازە سنوورییەکانی عێراق کۆبووەوە و گفتوگۆیان لەبارەی کۆمەڵێک پرسی تایبەت بە کاری دەروازە سنوورییەکان کرد.

سەرۆکوەزیرانی عێراق جەختیکردەوە لە گرنگیی داخستنی دەروازە سنوورییە نافەرمییەکان، کە ئەمە کاریگەریی ئەرێنیی کردووەتە سەر دۆخی ئابووریی نیشتمانی و پاراستنی بەرهەمی خۆجێیی.

مستەفا کازمی ئاماژەی بەوەش کردووە، پێویستە تاقیگە دابنرێت بۆ پشکنینی کاڵا هاوردەکراوەکان لەژێر دەسەڵاتی دەزگای ناوەندی پێوانە و کۆنترۆڵی جۆریدا، هەروەها گرنگە هاوئاهەنگیی هاوبەش هەبێت لەنێوان فەرمانگەکان لە دەروازە سنوورییەکان، بە چاکی بەڕێوەبردن، کە بەشێوەیەکی ئەرێنی رەنگدانەوەی هەبێت بۆ بەدیهێنانی داهات، بەمەبەستی پشتیوانیکردن لە بودجەی فیدراڵی و نەهێشتنی قاچاخچێتی و ساختەکاری و بەهەدەردانی دارایی گشتی.

هەروەها سەرۆکوەزیرانی عێراق نۆژەنکردنەوە و ئاوەدانکردنەوەی دەروازە سنوورییەکانی بە گرنگ زانی و داوادەکات، لێپرسینەوەش لەگەڵ کارمەندانی گەندەڵ بکرێت و رێکاری یاسایی گونجاو لە بەرامبەریان بگیرێتەبەر.
rudaw -