لە گوندی دەکەی نووری میکایل سێ کەس کوژران کە دووانیان کوردن و برای یەکن، ئەوی دیکەش شۆفێرێکی بە رەچەڵەک عەرەبە.

عەقید شەماڵ عەبدولڕەحمان، بەڕێوەبەری ئاسایشی کۆکس بە رووداوی گوت "کاژێر 09:40 خولەکی ئەمشەو لەسەر رێگەی گوندی دەکەی نووری میکایل چەکداری نەناسراو بەدووریی 100 مەتر لە بازگەیەکی سوپای عێراق دوو ئۆتۆمبێل رادەگرن و گڕی تێبەردەدەن، شۆفێری یەکێک لە ئۆتۆمبێلەکان دەکوژن و شۆفێرەکەی دیکەش چارەنووسی نادیارە".

بەڕێوەبەری ئاسایشی کۆکس گوتیشی "ئۆتۆمبێلەکان تایبەتن بە گواستنەوەی جووجک بۆ کێڵگەی پەلەوەر، رووداوکە لەنزیک کێڵگەکە بووە و خاوەنی کێڵگە رۆشتووە بەهانای ئۆتۆمبێلەکەوە بیکوژێنێتەوە، لەوکاتەدا دەکەونە بۆسەی چەکدارەکانەوە و دوو برا بە ناوەکانی لوقمان داوود و سامان داوود دەکوژرێن، کە بە رەچەڵەک کوردن و لە عەشیرەتی زرگۆشن".

عەقید شەمال گوتیشی "ئەوەی سەیرە ئەوەیە کە ئەو هێزەی سوپای عێراق نزیک بوون، بەڵام هیچ تەقەیان لەو چەکدارانە نەکردووە و نەڕۆشتوون بەهانای خەڵکەکەشەوە".

گوندی دەکەی نووری میکال دەکەوێتە باشوروی رۆژئاوای خانەقین و دانیشتووانەکەی کوردن.



rudaw