ئێوارەی ئەمڕۆ سێشەممە 20 خۆپیشاندەر لە پارێزگای نەجەف لەلایەن هێزە ئاسایشییەكانی عێراقەوە بریندار كران.

خۆپیشاندانەكانی هاووڵاتییانی ناڕازی عێراق لە دژی حكوومەتی وڵاتەكەیان بە هۆی نەبوونی خزمەتگوزارییەكانی وەكو ئاو و تەزووی كارەبا بەردەوامە و چەندین شاری ناوەڕاست و باشووری عێراقی گرتووەتەوە.

ئەم ئێوارەیەش كۆمسیۆنی مافەكانی مرۆڤی عێراق برینداربوونی 20 خۆپیشاندەری لە نەجەف راگەیاند، كە لەلایەن هێزەكانی حكوومەتەوە بە توندی پەلامار دراون.

كۆمسیۆنەكە دەشڵێ خۆپیشاندانەكە ئاشتیخوازانە بووە و هاووڵاتییان تەنها داوای مافەكانیان كردووە لە خزمەتگوزارییە گشتییەكان و تەزووی كارەبا.

لەلایەكی ترەوە هێزە ئاسایشییەكانی عێراق خۆپیشاندەرانیان بە هێرشكردنە سەر دیوانی پارێزگای نەجەف و ماڵی لوئەی یاسری پارێزگاری نەجەف تۆمەتبار كردووە، گوایە بەم هۆیەوە ڕووبەڕوویان بوونەتەوە.












باسنيوز