دوای سەرنەكەوتنی دوایین فیلمی خۆی كە بە ناوی (Rock On2) بەتایبەت لە رووی فرۆشتنی پلیتی فیلمەكە كە بە پێوەرێكی سەرەكی دادەنرێت بۆ سەركەوتنی هەر فیلمێك، بە پێی رۆژنامەی (mid-day) لە ئێستادا خانمە ئەكتەری ناسراوی بۆڵیۆد شرادها كاپوور تووشی حاڵەتێكی دەروونی سەخت بۆتەوە.
فیلمی ناوبراو رووبەڕووی رەخنەیەكی زۆری رەخنەگرانی سینەمایی بۆوە و بەرهەمهێنەرانی فیلمەكەش ئەم شكستەیان بۆ سیاسەتە سەرنەكەوتووەكانی ناریندرا مۆدیی سەرۆك وەزیرانی هیندستان گەڕاندەوە لە بواری ئابووری و دارایی.
بەرهەمهێنەران پێیان وایە ئەو بڕیارانەی كە بەم دواییە حكومەتی هیندستان دەریكردووە بۆ مامەڵە كردن و رووبەڕووبوونەوەی بارودۆخی سەختی ئابووری و دارایی وڵات و یەكێك لە بڕیارانە كار نەكردن بوو بە دراوی (500 و 1000) روپییە كە زیاتر لە هەموو دراوەكانی دیكە كاری پێدەكرێت، زەبرێكی كوشندە بوو كە لە خەڵكی هەژاری ئەو وڵاتە درا و بە حوكمی ئەوەی خەڵكی هەژار زیاتر هەوادارانی سینەمان بۆیە یەكێك لە دەرەنجامە بەرچاو و دیارەكانی ئەوە بوو كە خەڵك وەك جاران نەتوانن روو لە هۆڵەكانی سینەما بكەن و لە داهاتوودا ئەمە زیاتر دەردەكەوێت.
بەرهەمهێنەران پێیان فیلمەكە لە رووی هونەرییەوە زۆر سەركەوتوو بوو، بەڵام ئەم بڕیارە چۆن زیانی بۆ ئەم فیلمە هەبوو لە داهاتوودا فیلمەكانی دیكەش بە دەست هەمان گرفتەوە دەناڵێنن.