لە وڵاتی مەغریب گرنگییەكی زۆر بە هونەرمەندە گەنجەكان دەدرێت، ئەمەش بۆتە هۆی ئەوەی كە بە دەیان كوڕ و كچ لە قۆناغە زووەكانی خوێندن روو لە كۆلێژ و پەیمانگاكانی هونەرە جوانەكان دەكەن، بەتایبەتی لە بەشی سینەما و شانۆ، شەیما عەباسی یەكێكە لەو كچانەی كە تا ئێستا بەشداری لە چەندین شانۆگەری و ڤیدیۆ كلیپدا كردووەو چاوەڕێی دواڕۆژێكی پرشنگداری لێ دەكرێت.
لە لێدوانێكیدا بۆ گوڵان شەیما دەربارەی تێڕوانینی كۆمەڵگە بۆ هونەر و هونەرمەندان دەڵێ: ئێستا لە كۆمەڵگەكانی هاوشێوەی ئێمەدا كۆمەڵگە تێڕوانینێكی نەرێنیی بۆ هونەر هەیە و پێموانییە ئەم تێڕوانینە بە ئاسانی بگۆڕێت، بەڵام تێڕوانینی خەڵك بە گوێرەی ئاستی تێگەیشتن و رۆشنبیرییان دەگۆڕێت، بۆیە هەندێكیان وەك هونەرمەند سەیری ئێمە دەكەن، بەڵام هەندێكی دیكەیان بە سووك و سەرەڕۆ لە ئێمە دەروانن، بەداخەوە لە وڵاتی ئێمە ئەوەندەی گرنگی بە هونەرمەندانی بیانی دەدرێت بە ئێمە نادرێت.
سەبارەت بە ململانێی نێوان شانۆ و سینەما لە مەغریب دەڵێ: هونەر بە بەهرە دەست پێدەكات و بە خوێندن كۆتایی دێت، ئەكتەر دەتوانێت پەرە بە تواناكانی خۆی بدات و سوود لە هەڵەكانی رابردووی ببینێت، بەڵام بە شێوەیەكی گشتی مەرج خوێندن ببێتە هۆی ئەوەی ببیت بە هونەرمەندێكی سەركەوتوو، چونكە زۆر كەس هەن كە لە بواری هونەریدا بڕوانامەی زۆر بەرزیان هەیە و كەسیش نایانناسێت و بەپێچەوانەش راستە.