باڵیۆزی کوەیت لە ئەمەریکا داوای لە هاوڵاتیانی وڵاتەکەیکرد پێش سەردانیکردنیان بۆ ئەمەریکا موبایلەکانیان بپشکنن و دڵنیاببنەوە کە وێنە و بابەتی سەبارەت بە ملیشیا ئیسلامیەکان تێدانیە.

ئاژانسی هەواڵی کونای سەر بە حکومەتی کوەیت بڵاویکردەوە ، باڵیۆزی کوەیت لە ئەمەریکا لە بەیانامەیەکدا ڕایگەیاندووە " بەرپرسانی بەشێک لە فڕۆکەخانەکانی ئەمەریکا پشکنین بۆ موبایلی گەشتیاران دەکەن".

لە بەیانامەکەدا هاتووە" باڵیۆزی کوەیت لە ئەمەریکا هاوڵاتیانی وڵاتەکەی ئاگاداردەکاتەوە پێش هاتنیان بۆ ئەمەریکا هەموو بابەت و وێنەیەک لە موبایلەکانیاندا بسڕنەوە کە سروشتێکی توندڕەوی پێوەدیاربێت و تایبەتبێت بەو ناوچانەی شەڕو پێکدادانی تێدایە و ڕێکخراوە تیرۆرستیەکانی لێیە یاخود وێنەی توندوتیژی بە هەموو جۆرەکانیەوە".

باڵیۆزەکە ئاماژەی بەوەشکردووە" ئەم داوایە بۆ خوێندکار و هاوڵاتی کوەیتە بۆ ئەوەی لەلایەن بەرپرسانی فڕۆکەخانەکانی ئەمەریکاوە ڕوبەڕوی پرسیار نەبنەوە یاخود توشی گرفتێک نەبن کە ببێتە هۆی پوچەڵکردنەوەی ڤیزاکانیان و قەدەغەکردنی گەشتکردنیان بۆ ئەمەریکا".

هاوکات ڕۆژنامەی ئەلڕەئی عەرەبی مانگی تەمووزی ڕابردوو بڵاویکردەوە سێ بازرگانی کوەیت کە گەشتیان بەرەو ئەمەریکا کردبوو لە فڕۆکەخانەی لۆس ئەنجیلسدا بۆ ماوەی ٢١ کاتژمێر لێکۆڵینەوەیان لەگەڵداکرا و پشکنین بۆ موبایلەکانیانکراو نێردرانەوە بۆ کوەیت کە ئەمەش دووەم ڕووداوی لەوجۆرەیە لەمساڵدا.

وڵاتی ئیماراتی عەرەبی مانگی تەمووزی ڕابردوو بە هاوڵاتیەکانی وڵاتەکەی ڕاگەیاند لە کاتی گەشت و سەردانەکانیاندا جلوبەرگی عەرەبی لەبەرنەکەن، ئەوەش دوای ئەوەی بازرگانێکی وڵاتەکە لە ئوتێلێکی ئۆهایۆی ئەمەریکا بە جلوبەرگی عەرەبیەوە و بە گومانی ئەندامبوون لە ڕێکخراوی داعش دەستگیرکرا.
NRT -