ئەمرۆ پشتیوان سادق وەزیری پەروەردەی حکومەتی ھەرێمی کوردستان پیشوازی لە کۆمەڵێک قوتابی پۆلی ١٢ ئامادەیی کرد کە بەمەبەستی نارەزایی دەربرین لە بەرامبەر ئاشکرابوونی پرسیارەکانی تاقیکردنەوەی بەکالۆریا و بەکارھێنانی ئامێری بلوتوز لەبەردەم وەزارەت گردبوونەوە ..


لەراگەیندراوێکی وەزاەرتی پەروەردە کە لەپەیجی تایبەتی وەزارەتی بڵاوکراوتەوە تێیدا ھاتووە ..


ئەمڕۆ پێنجشەممە ڕێکەوتی (٢٥/٦/٢٠١٥)ی زایینی کە دواھەمین ڕۆژی تاقیکردنەوە وەزارییەکانی وەزارەت بوو، بەڕێز (د. پشتیوان سادق) وەزیری پەروەردەی حکومەتی ھەرێمی کوردستان،سەعات ۲:٠٠ی نیوەڕۆ لەگەڵ ۳٠ نوێنەری قوتابیانی ناڕازی پۆلی ۱۲ی ئامادەیی کۆ بووەوە.

سەرەتا ھەردوو نوێنەری ھەردوو ڕێکخراوی (کۆمەڵەی خوێندکارانی کوردستان) و (یەکیەتی قوتابیانی کوردستان) کە وەک نوێنەر و ڕێنوێنیکەری قووتابییە ناڕازییەکان ھاتبوون، باسی خەمی قوتابییەکانی لەسەر ئەو دەنگۆیانەی کە بڵاو دەبنەوە کرد و دواتریش زۆرینەی قوتابییەکان ڕوانگە و ڕەخنە و دڵەڕاوکێیەکانی خۆیان لەسەر غەش و ئەسیلە و پێگوتنەوە ڕاستەوخۆ بە وەزیری پەروەردە ڕاگەیاند.

دواتر وەزیری پەروەردە سەرەڕای مووناقشە و دایەلۆگ و وەرگرتنی زانیاری لە قوتابییەکان گوتی: "ئەو لێکۆڵینەوانەی کە کراون و ئەنجام دەدرێن، لە سەرەتای خۆیدایە و زۆریشیان گەیشتوونەتە ئەنجام و ئەوەیش کەدەستی لەو دیاردە نەشیاوانە ھەبێت، دڵنیا بن ناھێڵین گەمە بە چارەنووسی یەک قوتابییەوە کرێت و ھەموو کەس مافی خۆی وەردەگرێتەوە."

سوپاسی قوتابییەکانی کرد و پێشی گوتن دەرگای وەزارەت بۆ ئێوە کراوەیە و "دڵنیا بن ئەوەی لە بەرژەوەندی ئێوە بێت ئێمە وا دەکەین."

قوتابییەکانیش سوپاسی وەزیریان کرد کە دەرگای بۆ واڵا کردوون بۆ ڕەخنەو پێشنیارەکنیان.