رێکخراوی تەندروستیی جیهانی بڵاوی کردووەتەوە، 100 بۆ 120 هەزار تووشبووی ئایدز لە ئێران هەن، بەڵام بەرپرسانی ئێرانی ئەو ئامارە ڕەت دەکەنەوە و وەزارەتی تەندروستیی ئێرانیش دەڵێ، 7 هەزار کەس بەو نەخۆشییە گیانیان لەدەست داوە.

ئەمڕو سێشەممە (26.4.2016)، هەواڵدەریی (ئیرنا) لەزاری حەسەن هاشمی، وەزیری تەندروستیی ئێرانەوە بڵاوی کردووەتەوە: "ڤایرۆسی HIV ناسراو بە ئایدز لە ئێران بە رێژەیەکی بەرچاو پەرەی ساندووە، بە جۆرێک ساڵانە 10% رێژەی تووشبوان بەو ڤایرۆسە زیاد دەکات و ئەمەش هەڕەشەیەکی جدییە لەسەر تەندروستیی هاووڵاتیان".

هاوکات بەپێی ئاماری فەرمی وەزارەتی تەندروستیی ئێران 30 هەزار کەس لەو وڵاتە تووشی ئایدز بوون و لەو ئامارەش 15%یان ئافرەتن و لەو رێژەیەش 7 هەزار کەسیان گیانیان لەدەست داوە.

ئەوە لە کاتێک دایە کە رێکخراوی جیهانیی تەندروستی رایگەیاندووە کە ئاماری تووشبوان بە نەخۆشیی ئایدز لە ئێران گەیشتووەتە نزیکەی 100 بۆ 120 هەزار کەس.