Şaredarê Nahiyeya Dêrgul a Şirnexê ji Rûdawê re ragihand, piştî ku gencekî Kurd ji ber mesrefên zêde yên dawetê di rojên dawî ya sala 2019 de xwe kuştibû, bi amadebûna wî, mezin û ridînspiyên eşîra Botî li hev civiyan û jibo kêmkirina mesrefên dawetan de wan hin biryar dan.

Li gor agahiyên Rûdawê, gencekî Kurd ê bi navê Yahya Baran ê 22 salî ku xwestibû bi destgirtiya xwe re bizewice, ji ber ku malabata keçikê daxwaza 100 milyar qelen ji wî kiribû û wî ji ber rewşa xwe ya darayî nekarîbû wî pereyî bide, roja 17ê Kanîna 2019an xwe kuştibû.

Xwekuştina wî xortê Kurd li wê deverê û di nava xelkê de gelek deng vedabû û mijara mesrefa zêde ya dawetan li cem xelkê deverê bû mijareke germ û kete rojeva xelkê herêmê

Li ser vê yekê, li nahiyeya Dêregul a ser bi parêzgeha Şirnex a Bakurê Kurdistanê ve, mezin û ridînspiyên eşîra Botî bi amadebûna Şaredarê Dêregulê Nimet Demir roja Sêşemê 6ê Sibata 2020 li hev civiyan.

Şaredarê Nahiyeya Dêrgul a Şirnexê, Nimet Demir derbarê civînê de ji Rûdawê re ragihand: “Me di civînê de mijara qelenê bûkan û mesrefên dawetan gotûbêj kir û têkildarî mijarê em hin biryar dan.”

Nimet Demir got: “Di civînê de biryar hat dan, ku li herêmê qelenê bûkan êdî nemîne, merasimên şîraniyên dawetan bihê rakirin, dawet li gor bingehên îslamê bêne kirin.

Demir diyar kir: Herwiha ji bo xişlê bûkan jî biryar hat dan ku 2 bazin, 75 cm zincîra zêr, guharek û 2 gustîl bêne kirîn û nabe xişlê bûkan ji vê rêjeyê zêdetir be.”

Bi gotina Şaredarê Dêrgulê, bi biryarên ku di civînê de hatine danîn, mesrefa her dawetekê ji 100-150 milyar lîreyan bo 50 milyar lîreyî kêm dibe.

Nimet Demir diyar kir, ew biryarên ku hatine dan wek hêsankariyekê ji bo gencan e ku bikarin bi mesrefekî kêmtir bizewicin û tekez kir, biryar ji aliyê xelkê herêmê û gencan ve bi germî hatiye pêşwazîkirin.

Pêştir li nahiyeyên Şêxan, Sêgirk, Dêra Hînê yên ser bi Şirnexê ve biryarên bi vî awayî hatibûne dan.


Rudaw