Li bajarê Hewlêrê dayîkekê bi awayekî nemirovî zarokê xwe yê 8 salî îşkence kiriye û 20 roj li nav hewşa malê hiştiye.

Zarokekî 8 salî ku di wê malbatê de herî biçûk ew e, bi alîkariya zirbav û birayên wî, ji aliyê diya xwe ve bi awayekî nemirovî hatiye îşkencekirin û hemû laşê wî birîn e.

Bi hinceta ku zarokekî nerehet e, 20 roj li hewşa malê hatiye girêdan û di nav du mehên derbasbûyî de jî, tenê piçek nan û mast dane wî.

Piştî ku cîranên wê malbatê, rewşa zarok ji aliyên peywendîdar re gilî kirine, zarok ji destê dê û zirbavê wî hate rizgarkirin.

Zarokê ku ji aliyê diya xwe hatiye îşkencekirin li nexweşxaneyê ji Rûdawê re ragihand, ku diya wî her roj bi darê li wî dixist û birayên wî jî dengê xwe nedikirin. Herwiha aşkere kir, ku dewsa birînên li ser rûyê wî jî ji ber lêdana bi darê ne.

Zarokê 8 salî diyar kir, ji ber ku îro hatiye rizgarkirin, ew gelek kêfxweş e ku ji wê îşkenceyê xilas bûye.

rudaw