Li navçeya Zaxo ya Duhokê, piştî 5 rojan termê keça 16 salî, Lîna Welîd hate dîtin. Rêveberiya Tendurustiya Zaxoyê dibêje, piştî pişkînînan eşkere bûye, ku ti delîlên êşkence û gulleyê liser laşê wê nebûye.

Roja Îna derbasbûyî (02-06-2017), li Zaxoyê keçekê 16 salî ya bi navê Lîna Welîd, wenda bû. Piştî 5 rojan îro Çarşemê (07-06-2017), termê Lînayê li nêzîkî gundê Çemîşko, di nav ava Xabûrê de hate dîtin.

Berpirsê Ragihandina Rêveberiya Tendurustiya Zaxoyê ji Rûdawê re ragihand, “Li pizîşkê dadwerî pişkînîna termê wê hatiye kirin û liser canê wê ti şûnên êşkence an jî gulleyê nehatiye dîtin. Lewma jî ne eşkere ye ka xwe xeniqandiye an jî hatiye xeniqandin.”

Beriya niha Polîsên Zaxoyê derbarê vê bûyerê de 2 kesên gumanbar binçavkiribû.

Bavê Lînayê, Welîd Ebas jî ji Rûdawê re ragihandibû, ku keça wî xwendekara qonaxa amedeyiyê ye.

Rudaw