Derbarê deriyê sînorî yê li Wanê biryar hat dayîn
Deriyê Sînorî yê Kapikoy ê li Wanê ji Adara 2020an ve bi sedema vîrusa Coronayê girtiye.
Odeya Bazirganî û Pîşesazî ya Wanê (TSO) di daxuyaniyekê de li ser rewşa wî deriyê sînorî yê di navbera Bakur û Rojhilatê Kurdistanê de amaje bi karîgeriya xerab a girtina wî derî li ser aboriya Wan û deverê kir.
Odeya Bazirganî û Pîşesazî ya Wanê di daxuyaniyê de tekezî li ser girîngiya wî derî ji bo aboriya herêmê kir û got, wan di heyama salekê de her tim daxwaz kiriye ku ew derî bê vekirin.
Herwiha Odeya Bazirganî û Pîşesazî ya Wanê, behsa hewldanên Şêwirmenda Serokomarê Tirkiyê Gulşen Orhan, Endamê Rêveberiya AK Partiyê Burhan Kayaturk û Serokê Yekîtiya Borsa û Odeyan a Tirkiyê (TOBB) M. Rifat Hîsarciklioglu kir ji bo vekirina deriyê sînorî yê Kapikoy û tekez kir ku li ser van hewldan û daxwazan, Serokomarê Tirkiyê Recep Tayyîp Erdogan ferman daye ku ew derî bê vekirin.
Odeya Bazirganî û Pîşesazî ya Wanê aşkere kiriye ku biryar e Deriyê Sînorî yê Kapikoy piştî 17ê Gulanê bê vekirin û ev yek weke `mizgînî` bo xelkê binav kiriye û spasiya hemû aliyan kiriye ku di vê heyamê de hewl dan ew derî bê vekirin.
Deriyê Sînorî yê Kapikoy ku wek “şahdamara aboriya Wan û herêmê” tê binavkirin, di navbera navçeya Mehmudî (Saray) ya Wana Bakurê Kurdistanê û bajarê Xoy ê Rojhilatê Kurdistanê de ye.
Ev deriyê sînorî ji Adara 2020an ve ji ber vîrusa Coronayê girtiye û vê yekê jî ziyaneke mezin gihandiye aboriya herêmê û ev demek bû daxwaza vekirina derî dihat kirin.
Li Tirkiyê piştî Hezîrana 2020an deriyên sînorî di bin rêkarên taybet bi Coronayê de hatin vekirin, lê deriyê Kapikoy ê li Wanê, Gurbulak ê li Bazîdê û Esendere yê li Geverê, nehatin vekirin û ev yek jî rastî nerazîbûnê hatiye.
Rudaw
