Çend karwanên din ên vaksîna Koronayê digihin Herêma Kurdistanê
Dr. Dilovan Mihemed ji K24ê re ragihand: “Di vê hefteyê de karwaneke din a vaksîna Sinopharm digihe Herêma Kurdistanê, herwiha hefteya bê karwaneke din a vaksîna Pfizer dê bigihe ku hezar û 170 derzî vaksîn e.”
Mihemed diyar kir: “Hatina vaksîna Pfizer bo Herêma Kurdistanê bi dema heşt hefteyan dibe, Navenda Rizgarî ya li Hewlêrê, di nava van heşt hefteyan de şeş car dê werbigre, niha karwanek wergirtiye û hemû vaksînan hatine bikaranîn.”
Rêveberê Tendirustiya Hewlêrê destnîşan kir: “Ji karwana bê ya vaksînê, beşek dê ji navçeyên Koye û Soranê werin dayîn.”
Herwiha diyar kir: “Bi giştî li sînorê parêzgeha Hewlêrê 19 hezar û 500 derzî li ber dest bûn, nêzîkî 15 hezar derzî hatine bikaranîn û prose berdewam e.”
Dr. Dilovan Mihemed got: “Vaksîna Pfizer daxwazeke zêde li ser bû û di heman demê de jî hejmara wê kêmtir bû, loma niha li Hewlêrê nemaye, tenê hinek li Soranê maye.”
K24
