Ji bo ku Dêra Axdamarê ya li Gola Wanê li Bakûrê Kudistanê bikeve nav Listeya Mîrata Dinyayê ya Rêxistina Çand, Zanist û Perwerdeyê ya Neteweyên Yekbûyî (UNESCO) serî li Wezareta Çand û Tûrîzmê hat dayîn.

Rêveberiya Çand û Tûrîzmê ya Wanê ji bo ku Dêra Axdamarê ya li navçeya Gewaşa Wanê a ku li ser navê Qralê Vaspûrakanê I. Gagik ji bo Qeşe Manûel di navbera salên 915 û 921an de hat çêkirin, bikeve listeya UNESCOyê bi awayekî fermî serî li Rêveberiya Giştî ya Mûzeyan da.

Rêveberê Çand û Tûrîzmê yê Wanê Mûzaffer Aktûg derbarê serlêdanê de agahî da rojnamegeran û got ku ji bo serlêdanê 10 pîvan hene, divê di serî de Dêra Axdamarê bikeve nav Lîsteya Mîrata Dinyayê ya Berwext û wiha dewam kir:
"10 kirîterên UNESCOyê hene û 6 kIrîterên Dêra Axdamarê jî li gor van kirîteran in. Piştî ku me serî li wezaretê da, wezaretê ji bo şert û mercên ku bi cih bên anîn rê nîşanî me da. Me jî kirîterên di lîsteyê de ne nirxand û him bi tirkî him jî bi îngilîzî dosya amade kir û radestî wan kir. Di 2014an de dê dosya bê nirxandin û piştre dê Dêra Axdamarê bixin nav Lîsteya Mîrata Dinyayê ya Berwext û dûv re jî bixin nav Lîsteya Mîrata Dinyayê."

Aktûg got ku ji bo ku berhemekê hildin nav Lîsteya Mîrata Dinyayê kirîterek têrê dike.

Rudaw