Li Amsterdama paytexta Holendayê li Salona (Muziekgebouw aan’t ij) konsêrteka ji bo grûbên mûzîkî yên cîhanî hat rêkxistin, li ser navê Kurdistanê jî Grûpa Niştîman beşdar bû.

Festîvala Kulturan a Holendayê yek ji mezintirîn û navdartirîn çalakiya kulturî ye li wî welatî. Serperştyarê Grûpa Mûzîkî ya Niştîman Hejar Zehawî ji medyayê re ragehand ku bi alîkariya hikûmeta Herêma Kurdistanê û taybetî nûnertiya hikûmetê li Yekîtiya Ewropayê karîn li ser navê Kurdan beşdarî Festîvala Kulturan a Holendayê bibin.

Nûnerê Hikûmeta Kurdistanê li Yekîtiya Ewropayê Dilawer Ajgeyî ji BasNewsê re got ku wan alîkariya grûba binavê Niştîman kiriye ku ew beşdarî festîvalê bibin û li ser navê Kurdan mûzîka hemu herêmên Kurdan pêşkêşî Holenda û dostên kurdan bikin ku wê derdora 90 hezar kes beşdar bibin.

Hêjayê gotinê ye ji sala 1948’an ve festîval tê lidarxistin û salane bi beşdariya navbera 70 bo 90 hezar kes beşdar dibin, konser, pêşangeh û karên hunerî têde tên pêşkêş kirin. Grûba Niştîmanî li ser navê Kurdistanê beşdar bû û heta saetekê stranên Kurdî ên hemu herêman pêşkêş kirin.

Basnews