بەهۆی وەرگەڕانی پاسێك لە مەکسیک 18 کۆچبەرگیانیان لەدەستدا
لەئەنجامی وەرگەڕانی پاسێکی کۆچبەرانی نایاسایی لە مەکسیک، ١٨ کەس گیانیان لەدەستدا و ٢٣ کەسی دیکەش برینداربوون.
بەگوێرەی میدیا ناوخۆییەکانی مەکسیک، پاسێک کە کۆچبەرانی نایاسایی هەڵگرتبوو لە ویلایەتی نایاریت لە ڕێگا دەرچووە و لە بەرزی ٤٠ مەترەوە هەڵدێراوە و بەهۆیەوە ١٨ کەس گیانیان لەدەستدا و ٢٣ کەسی دیکەش برینداربوون.
ڕووداوەکە بەهۆی ئەوەوە ڕوویداوە کە شۆفێری پاسەکە خەوی لێكەوتووە و دوای ئەم ڕووداوە پۆلیس شۆفێرەكەی دەستبەسەر کردووە.
هەروەها ئەم پاسە لە مەکسیکۆ سیتیەوە بەرەو ویلایەتی باخای کالیفۆرنیا گەشتی دەکرد.
کۆچبەرە نایاساییەکانی ئەم پاسە هاووڵاتی وڵاتانی ئەفریقا و هیندستان و کۆماری دۆمینیکان بوون.
دەوترێت مەبەستی ئەو کەسانە گەیشتنیان بە ئەمریکا بووە.
گوڵان: سەردار خەلیل
