مه‌سرور بارزانی: به‌دڵێكی پڕ له‌ خه‌مه‌وه‌ یادی شه‌هیدان و قوربانیانی شاڵاوه‌ به‌دناوه‌كانی ئه‌نفال ده‌كه‌ینه‌وه‌

مه‌سرور بارزانی: به‌دڵێكی پڕ له‌ خه‌مه‌وه‌ یادی شه‌هیدان و قوربانیانی شاڵاوه‌ به‌دناوه‌كانی ئه‌نفال ده‌كه‌ینه‌وه‌

له‌ 35ـه‌مین ساڵیادی شاڵاوی ئه‌نفالدا، مه‌سرور بارزانی په‌یامێكی بڵاو كرده‌وه‌ و رایگه‌یاند  تاوانی ئەنفال، دژی هەموو بەها مرۆیی و ئەخلاقییەکان بوو، داواشی كرد حكوومه‌تی عێراق زيانلێکەوتووان و بنەماڵە و کەسوکاری ستەملێکراوی دەستی ڕژێمی پێشووی عێراق، قەرەبوو بکاتەوە.

ئه‌مڕۆ هه‌ینی 14/4/2023، مه‌سرور بارزانی سه‌رۆكی حكوومه‌تی هه‌رێمی كوردستان په‌یامێكی بڵاو كرده‌وه‌ و رایگه‌یاند: ئەمڕۆ بە دڵێکی پڕ لە خەم و کۆڤانەوە، یادی شەهیدان و قوربانیانی شاڵاوە بەدناوەکانی (ئەنفال) دەکەینەوە، کە یەكێك بوو لە دڕندانەترین شێوازی جینۆساید دژی گەلی كورد و كوردستانیان، سی و پێنج ساڵ لەمەوبەر، ڕژێمی بەعسی عێراق، بە چەند قۆناغێكی جیا، بە هەزاران خەڵكی سیڤل و بێتاوانی گوند و ناوچە جیاجیاكانی كوردستانی ڕاپێچ كرد و لە بیابانەكانی باشوور و ناوەڕاستی عێراق زیندەبەچاڵی كردن و بەشێكی زۆریان تا ئێستاش بێسەر و شوێنن و چارەنووسیان نادیارە.

سه‌رۆكی حكوومه‌ت دووپاتی ده‌كاته‌وه‌: تاوانی ئەنفال، جینۆسایدێكی دڕندانە بوو نەک تەنیا دژی گەلی کوردستان، بەڵکوو دژی هەموو بەها مرۆیی و ئەخلاقییەکان بوو، کە بە داخەوە لێكەوتە و دەرهاویشتە هەمەلایەنەکانی ئەم تاوانە هۆڤانەیە، هەر ماون و برینەکان تا ئێستاش ساڕێژ نەبوون.

لەم یادە خەمگینەدا، کە بەشێکە لە زنجیرەیەک تاوان کە بەرامبەر گەلی کوردستان ئەنجام دراون، داوا لە حکوومەتی عێراق دەکەین ئەرک و بەرپرسیاریەتیی ئەخلاقی و دەستووریی خۆی جێبەجێ بکات و زيانلێکەوتووان و بنەماڵە و کەسوکاری ستەملێکراوی دەستی ڕژێمی پێشووی عێراق، بە شێوەیەکی شایستە قەرەبوو بکاتەوە و هاوکاریی حکوومەتی هەرێمی کوردستان بکات بۆ ئەوەی بە شێوەیەکی باشتر، بتوانێت خزمەتی کەسوکاری سەربەرزی شەهیدان بکات.

مه‌سرور بارزانی له‌ كۆتایی په‌یامه‌كه‌دا رایگه‌یاندووه‌: لە یادی پڕخەمی شاڵاوەكانی ئەنفالدا، سەری ڕێز و نەوازش بۆ شەهیدان و ئەنفالکراوانی کوردستان دادەنوێنین و هەمیشە لە یادمانن.

Top