ل بیره‌وه‌ریا ۱۸ی شوباتێ
ژیان طاهر زێوه‌ی
قوتابی و لاوێن كورد شیاینه د ماوێ شێست و نه‌ه سالێن خه‌باتێدا ببنه به‌رگریكارێن كارایێن مافێن ره‌وایێن گه‌لێ خو. وەکی بابێ نەمر بارزانی فەرمووی: «قوتابی سەرێ رمێنە دهەمی شورەش و سەرهلدانادا». دڤی سه‌رده‌میدا گه‌لێ مه پتری هه‌ر جار پێتڤی ب گه‌هاندنا ده‌نگێ مه‌غدووریه‌ت و قوربانیدانا خۆ بو گەلێن جیهانێ هەیە دا وژدانا مروڤایەتیێ بلڤینیت. لەوما ئه‌ركه‌كێ ئه‌خلاقی و نیشتمانیه لسه‌ر ملێت قوتابی و لاوێت مە كو بۆ رێزگرتن ل هه‌می بهایێن مروڤایەتیێ و پێشڤه‌برنا كلتوورێ پێكڤەژیانا ئایینی و نه‌ته‌وه‌یی و هه‌ڤدو قه‌بیلكرنێ هه‌می بزاڤێن خۆ بو بدەستخستنا چه‌كێ زانین و تێگەهشتنێ بمه‌زێخن.
پێتڤیه قوتابی و لاوێن مە هه‌رده‌م هه‌لگرێن چرایێ زانستا سه‌رده‌م بن و نه بتنێ وی چرای ژبۆ ئاسوده‌یی و به‌رژه‌وه‌ندیێن كه‌سی بكار بینن، به‌لكو ژبۆ پاراستنا ره‌وشت، ژینگه‌ه و میراتێ هه‌ڤپارێ مروڤایه‌تیێ ژی مفای ژێ وه‌ربگرن. زانست دكاریت كوشنده‌ترین هۆكارێن ژناڤبرنا مروڤان به‌رهه‌م بینیت، لێ د هه‌مان ده‌مدا دكاریت بهێزترین چه‌ك بیت ژ بۆ گه‌هاندنا ده‌نگێ مه‌زلوومیەت و سه‌پاندنا ئاشتیا جیهانی و شه‌رمه‌زاركرنا بێدادیێ. ناساندنا ناسناما مە یا نەتەوەیی و به‌رچاڤكرنا وێ نادادپه‌روه‌ریا پتری سه‌ده‌یه‌كێ یه خه‌لكێ مه ژێ دنالیت ئه‌ركێ هه‌ر تاكه‌كێ كوردستانیه، نەخاسمە و ل پێشیا هه‌میان یێ قووتابی و لاوێن كورد. پێنوسێ وان پیتڤیه زمانحالێ گه‌لێ مه بیت.
زانست چرایێ ملله‌تانه، لێ ئارمانجا سه‌ره‌كیا زانستێ پێتڤیه ئاشتی و پێشڤه‌چوون بیت. به‌لێ پا پێشڤه‌چوونا زانستی و ئابووری بێی به‌رچاڤ وه‌رگرتنا پیڤه‌رێن ره‌وشتی خزمەتا مرۆڤایەتیێ ناکەت. ئەم هەوجەی جڤاکەکێ خودان لاوێن رەوشتبەرزین یێن کو د ئاستێ بەرپرسیارەتیێدا بن و خو ل پرسێن جۆراوجۆرێن جڤاكێ خو بکەنە خودان و ئەرکێ ئەخلاقی و نیشتیمانیێ خو ل هەمبەر هەڤدو و گەلێ خو و بەرەبابێن پاشەرۆژێ ب درستی ب ﺟﻬ بینن.
بڤێ هه‌لكه‌فتێ سه‌رێ رێزێ بۆ وان قووتابی و لاوان دچەمینین یێن گیانێ خۆ بۆ هه‌لكرنا چرایێ ئازادیێ كریە قوربانی. سلاڤ ل گیانێ پاكێ سه‌ركرده فره‌نسو حه‌ریری و تەڤایا شه‌هیدێن رێیا ئازادیێ و سه‌ركاروانێ وان بارزانیێ نه‌مر بن. پیرۆز بیت رۆژا دامه‌زراندنا ئێكه‌تیێن قووتابی و لاوان و بۆ پێشڤه به‌ره‌ڤ ئاسویه‌كێ گه‌شتر.
په‌رله‌مانتار:
