كۆبوونه‌وه‌یه‌ك بۆ جێبه‌جێ كردنی ناوه‌ڕۆكی ڕاپۆرتی لیژنه‌ی لێكۆڵینه‌وه‌ی لافاوه‌كه‌ی هه‌ولێر
دوای فه‌رمانی مه‌سرور بارزانی سه‌رۆكی حكومه‌تی هەرێمی كوردستان بۆ پێكهێنانی لیژنه‌یه‌كی لێكۆڵینه‌وه سه‌باره‌ت به هۆكاری دروستبوونی لافاو له شاری هه‌ولێر و ده‌ستنیشانكردنی ڕێگاچاره بۆ به‌رگرتن و دووباره نه‌بوونه‌وه‌ی لافاو، هەروەها ئاماده‌كردنی ڕاپۆرت له‌لایه‌ن لیژنه‌كه و په‌سه‌ندكردنی له‌لایه‌ن سه‌رۆكی حكومه‌ت، ئێواره‌ی دوێنێ چوارشه‌ممه به ئاماده‌بوونی ساسان عه‌ونی وه‌زیری شاره‌وانی و گه‌شتوگوزار و ئومێد خۆشناو پارێزگاری هه‌ولێر و دكتۆر محه‌مه‌د شوكری سه‌رۆكی ده‌سته‌ی وه‌به‌رهێنان و سه‌رۆك و ئه‌ندامانی لیژنه، له دیوانی پارێزگا كۆبوونه‌وه‌یه‌كی تایبه‌ت به گرتنه‌به‌ری ڕێوشوێن و میكانیزمی پێویست بۆ جێبه‌جێكردنی بڕیار و ڕاسپارده و پێشنیاره‌كانی ڕاپۆرتی لیژنه‌كه ئه‌نجامدرا.
له‌میانی كۆبوونه‌وه‌كه‌دا، بڕیاردرا كە هەموو لایه‌نه په‌یوه‌ندیداره‌كان ڕاسپێردران كە لەمڕۆوە سه‌رجه‌م خاڵه‌كانی ڕاپۆرتی لیژنه‌ی لێكۆڵینه‌وه سه‌باره‌ت به هۆكاری دروستبوون و گرتنه‌به‌ری ڕێوشوێنی پێویست بۆ دووباره نه‌بوونه‌وه‌ی لافاو له‌شاری هه‌ولێر و چاره‌سه‌ركردنی كه‌مته‌رخه‌می و كێشه‌كان كه بوونه‌ته هۆكاری دروستبوونی لافاوه جێبه‌جێ بكرێن، هه‌روه‌ها ڕێكاری پێویست بگیرێته‌به‌ر لەهەمبەر ئه‌وانه‌ی كه زیاده‌ڕۆییان كردووه‌ته سه‌ر ڕێڕه‌وی ئاو، بوونه‌ته هۆكاری دروستبوونی ئه‌و كاره‌ساته و ئه‌و ڕووداوه نه‌خوازراوه‌ی لێكه‌وتووه‌ته‌وه.
